ഒന്നും ഓര്മ്മിക്കാന് വയ്യ... വളരെ വേഗം പടര്ന്നു പിടിക്കുന്ന കോവിഡ് ആശങ്ക പരത്തുന്നു; രണ്ട് ദിവസം കൊണ്ട് രാജ്യത്തെ സ്ഥിതിയൊക്കെ മാറി; മാസ്ക് മാറ്റി ദൂരെയറിഞ്ഞവര് വീണ്ടും വയ്ക്കുന്നു; കോവിഡില് ജാഗ്രത കൂട്ടണമെന്ന് പ്രധാനമന്ത്രി; എയര്പോര്ട്ടിലും നിരീക്ഷണം
പ്രധാനമന്ത്രി രാജ്യത്തെ അഭിസംബോധന ചെയ്യുമോയെന്നാണ് ജനങ്ങള് ഉറ്റു നോക്കുന്നത്. ഇതുപോലൊരു കൊറോണ കാലത്താണ് രാജ്യം അടച്ചിടലിലേക്ക് പോയത്. 120 ദിവസത്തോളം അതനുഭവിച്ചു. പിന്നീട് വാക്സിന്റെ വരവോടെ കൊറോണയ്ക്കൊപ്പം ജീവിച്ചു. വീണ്ടും കോവിഡ് പ്രതിരോധത്തില് പ്രധാനമന്ത്രി നേരിട്ടിറങ്ങുകയാണ്. രാജ്യത്തെ അഭിസംബോധന ചെയ്യുമോയെന്നാണ് അറിയേണ്ടത്.
മാസ്കുള്പ്പടെയുള്ള കൊവിഡ് പ്രതിരോധ മാര്ഗങ്ങള് കര്ശനമായി പാലിക്കണമെന്ന് പ്രധാനമന്ത്രി നരേന്ദ്രമോദി പറഞ്ഞു. രാജ്യത്തെ ആശുപത്രികള് സജ്ജമാക്കണമെന്നും രാജ്യത്തെ കൊവിഡ് സാഹചര്യം വിലയിരുത്താന് വിളിച്ച് ചേര്ത്ത ഉന്നത തലയോഗത്തില് പ്രധാനമന്ത്രി നിര്ദ്ദേശിച്ചു.
മൂക്കിലൂടെ നല്കാവുന്ന വാക്സീന് അടുത്തയാഴ്ച വിതരണത്തിനെത്തും. ചൈനയില് സാമൂഹ്യ വ്യാപനത്തിനിടയാക്കിയ കൊവിഡ് വകഭേദം രാജ്യത്ത് റിപ്പോര്ട്ട് ചെയ്ത സാഹചര്യത്തില് ജാഗ്രത കൂട്ടണമെന്ന് പ്രധാനമന്ത്രി നിര്ദ്ദേശിച്ചു. വരാനിരിക്കുന്ന ഉത്സവ കാലങ്ങളിലുള്പ്പടെ മാസ്ക് ധരിക്കുന്നത് കര്ശനമാക്കണം, കൊവിഡ് പരിശോധനയും ജനിതക ശ്രേണീകരണ നിരക്കും വര്ധിപ്പിക്കണം.
വാക്സിനേഷന്റെ മുന്കരുതല് ഡോസ് വിതരണം ഊര്ജ്ജിതമാക്കണം, സംസ്ഥാനങ്ങളില് ഓക്സിജന് പ്ലാന്റുകളും വെന്റിലേറ്ററുകളും അടക്കം ആശുപത്രി സൗകര്യങ്ങള് സജ്ജമാക്കണമെന്നും പ്രധാനമന്ത്രി നിര്ദ്ദേശിച്ചു. ക്രിസ്മസ് പുതുവത്സരാഘോഷങ്ങളുടെ പശ്ചാത്തലത്തില് മാസ്കുള്പ്പടെയുള്ള മാനദണ്ഡങ്ങള് കര്ശനമാക്കാന് സംസ്ഥാനങ്ങള്ക്ക് നിര്ദേശം നല്കിയതായി കേന്ദ്ര ആരോഗ്യമന്ത്രിയും പറഞ്ഞു.
ചൈന ഉള്പ്പടെയുള്ള രാജ്യങ്ങളില് നിന്നുള്ള വിമാന സര്വ്വീസുകള് തത്ക്കാലം റദ്ദാക്കില്ല. എന്നാല് രണ്ട് ശതമാനം യാത്രക്കാരെ പരിശോധനയ്ക്ക് വിധേയമാക്കും. ഫലം ഒരാഴ്ച്ച നിരീക്ഷിച്ച ശേഷമാകും തുടര് നടപടികള്. വരും ദിവസങ്ങളില് ആവശ്യമെങ്കില് വിദേശത്ത് നിന്നെത്തുന്നവര്ക്കെല്ലാം പരിശോധന നിര്ബന്ധമാക്കുമെന്നും ആരോഗ്യമന്ത്രി രാജ്യസഭയില് പറഞ്ഞു.
ചൈനയില് കൊവിഡ് കുതിച്ചുയരാന് കാരണമായ ഓമിക്രോണ് ഉപവകഭേദമായ ബിഎഫ്7 ന്റെ നാല് കേസുകള് ഇന്ത്യയില് സ്ഥിരീകരിച്ചിരുന്നു. എന്നാല് തീവ്ര ലക്ഷണങ്ങള് ഇത് സ്ഥിരീകരിച്ചവരില് കണ്ടില്ലെന്നാണ് സൂചന. മാസ്ക് നിര്ബന്ധമാക്കണമെന്നും വിവാഹങ്ങളും രാഷ്ട്രീയ കൂട്ടായ്മകളും നിയന്ത്രിക്കണമെന്നുും ഇന്ത്യന് മെഡിക്കല് അസോസിയേഷന് സര്ക്കാരിനോട് ശുപാര്ശ ചെയ്തു.
അതേസമയം മറ്റ് രാജ്യങ്ങളില് കോവിഡ് വര്ധിച്ചു വരുന്ന സാഹചര്യത്തില് സംസ്ഥാനത്ത് കോവിഡ് പ്രതിരോധ പ്രവര്ത്തനങ്ങള് ശക്തിപ്പെടുത്തിയതായി ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. എല്ലാ ജില്ലകളും ജാഗ്രതയിലാണ്. ജില്ലകള് പ്രത്യേകം യോഗം ചേര്ന്ന് പ്രതിരോധ പ്രവര്ത്തനങ്ങളും നിരീക്ഷണവും ശക്തമാക്കി വരുന്നു. കേസുകള് എവിടെയെങ്കിലും കൂടുന്നതായി കണ്ടാല് ഉടനടി റിപ്പോര്ട്ട് ചെയ്യാനും അതനുസരിച്ച് പ്രതിരോധം ശക്തമാക്കാനും നിര്ദേശം നല്കിയിട്ടുണ്ട്. ഇന്ന് എല്ലാ ജില്ലകളുടേയും പ്രവര്ത്തനങ്ങള് ആരോഗ്യ വകുപ്പ് അവലോകനം ചെയ്യുന്നതാണെന്നും മന്ത്രി വ്യക്തമാക്കി.
പുതിയ വകഭേദങ്ങളെ നിരീക്ഷിക്കാനായി കൂടുതല് കോവിഡ് സാമ്പിളുകള് ജനിതക ശ്രേണീകരണത്തിന് അയക്കാന് ജില്ലകള്ക്ക് നിര്ദേശം നല്കി. വിവിധ കോവിഡ് വകഭേദങ്ങളെ കണ്ടെത്തുന്നതിനായി സമ്പൂര്ണ ജീനോമിക് സീക്വന്സിംഗാണ് (ഡബ്ല്യു.ജി.എസ്.) നടത്തുക. ഓരോ ജില്ലയ്ക്കും നിശ്ചയിക്കപ്പെട്ടിട്ടുള്ള ലാബുകളില് ജനിതക നിര്ണയത്തിനായി സാമ്പിളുകള് അയയ്ക്കേണ്ടതാണ്. ഏതെങ്കിലും ജില്ലകളില് കോവിഡ് വകഭേദങ്ങള് കണ്ടെത്തിയാല് കൃത്യമായി റിപ്പോര്ട്ട് ചെയ്യാനും അതനുസരിച്ച് പ്രതിരോധ പ്രവര്ത്തനങ്ങള് കൂടുതല് ശക്തമാക്കാനും നിര്ദേശം നല്കി. ആശുപത്രികളില് അഡ്മിറ്റാകുന്ന ശ്വാസകോശ സംബന്ധമായ രോഗങ്ങളുള്ളവര്ക്ക് കോവിഡ് പരിശോധന നടത്തുന്നതാണ്. കൂടാതെ തീവ്രമായ പനി, തൊണ്ടവേദന, ശ്വാസതടസം എന്നിവയുള്ളവര്ക്കും കോവിഡ് പരിശോധന നടത്തും.
അവധിക്കാലമായതിനാല് കൂടുതല് ശ്രദ്ധിക്കണം. മാസ്ക് വയ്ക്കാതെ പൊതുസ്ഥലങ്ങളിലും ആള്ക്കൂട്ടത്തിലും ഇറങ്ങരുത്. മാസ്ക് താഴ്ത്തി സംസാരിക്കരുത്. പനി, ചുമ, ജലദോഷം തുടങ്ങിയ രോഗലക്ഷണങ്ങളുള്ളവര് പ്രായമായവരോടും കുട്ടികളോടും അടുത്തിടപഴകരുത്. പ്രായമായവര്ക്കും അനുബന്ധ രോഗമുള്ളവര്ക്കും കുട്ടികള്ക്കും പ്രത്യേക കരുതല് വേണം. പുറത്ത് പോയി വന്നതിന് ശേഷം സോപ്പും വെള്ളവുമുപയോഗിച്ച് കൈ കഴുകുന്നത് ശീലമാക്കണം.
"
https://www.facebook.com/Malayalivartha
