മെഡിക്കല്‍ കോളേജ് ഹോസ്റ്റലിലെ വിദ്യാര്‍ത്ഥികള്‍ ഹൈക്കോടതിയില്‍ നല്‍കിയ ഹര്‍ജിയില്‍ നിര്‍ണായക തീരുമാനം. വിദ്യാര്‍ത്ഥികള്‍ ഹോസ്റ്റലില്‍ കഴിയുന്നത് പഠിക്കാനാണ്. രക്ഷകര്‍ത്താക്കള്‍ ഉത്തരവാദിത്തപൂര്‍ണമായാണ് കുട്ടികളെ ഹോസ്റ്റലില്‍ നിര്‍ത്തുന്നത്. അവരുടെ സുരക്ഷ കൂടി കോളേജിനുണ്ട്. ആ നിലയില്‍ ലിംഗ വിവേചനം ഇല്ല. ആണ്‍കുട്ടികള്‍ക്കും പെണ്‍കുട്ടികള്‍ക്കും 9.30 സമയം നിശ്ചയിച്ചു.

അതേസമയം വിദ്യാര്‍ത്ഥികള്‍ക്ക് രാത്രി 9.30നു ശേഷവും ഹോസ്റ്റലുകളില്‍ നിന്ന് പുറത്തു പോകാന്‍ അനുമതി നല്‍കുമെന്ന് സര്‍ക്കാര്‍ ഹൈക്കോടതിയെ അറിയിച്ചു. അടിയന്തര സാഹചര്യങ്ങളില്‍ വാര്‍ഡന്റെ അനുമതിയോടെ പുറത്തു പോകാം. മറ്റു സാഹചര്യങ്ങളില്‍ രക്ഷിതാവിന്റെ അനുമതി ഹാജരാക്കണം.

രണ്ടാം വര്‍ഷം മുതലുള്ള മെഡിക്കല്‍ വിദ്യാര്‍ത്ഥികള്‍ക്കാണ് ഇതു ബാധകമെന്നും സര്‍ക്കാര്‍ അറിയിച്ചു. തുടര്‍ന്ന്, രാത്രി ഒമ്പതരയ്ക്കു ശേഷവും ഹോസ്റ്റലിലേക്ക് പ്രവേശിക്കുന്നതിന് തടസമില്ലെന്ന് വ്യക്തമാക്കി കഴിഞ്ഞ 12ന് ഇറക്കിയ ഉത്തരവ് ഇതുകൂടി ചേര്‍ത്തു പരിഷ്‌കരിക്കാന്‍ ഹൈക്കോടതി നിര്‍ദ്ദേശിച്ചു. ഹോസ്റ്റലില്‍ രാത്രി ഒമ്പതരയ്ക്കു ശേഷം പ്രവേശനം നിഷേധിക്കുന്ന ഉത്തരവിനെതിരെ വിവിധ മെഡിക്കല്‍ കോളേജുകളിലെ വിദ്യാര്‍ത്ഥിനികള്‍ നല്‍കിയ ഹര്‍ജികളില്‍ ജസ്റ്റിസ് ദേവന്‍ രാമചന്ദ്രനാണ് നിര്‍ദ്ദേശം നല്‍കിയത്.

ഉത്തരവ് നടപ്പാക്കിയത് അറിയിക്കാന്‍ ഹര്‍ജികള്‍ ജനുവരി 31നു വീണ്ടും പരിഗണിക്കും. ഹര്‍ജിക്കാരെ കോടതി അഭിനന്ദിച്ചു. കാലത്തിനു മുമ്പേയുള്ള ശബ്ദമാണ് കേട്ടത്. സ്വതന്ത്ര ചിന്താഗതികളുള്ള ഒരുകൂട്ടം വിദ്യാര്‍ത്ഥിനികളാണ് ഹര്‍ജിക്കു പിന്നില്‍. പുരുഷ നിയന്ത്രിതമായ സാഹചര്യങ്ങളെയാണ് അവര്‍ എതിര്‍ക്കുന്നത്. വ്യത്യസ്തമായ ഒരു കാഴ്ചപ്പാട് ഉണ്ടാക്കിയെടുക്കാന്‍ ഹര്‍ജി സഹായകമായി.

സ്ത്രീകള്‍ക്കെതിരായ അതിക്രമം തടയാന്‍ കോളേജുകളില്‍ യു.ജി.സി നിര്‍ദ്ദേശ പ്രകാരം ആഭ്യന്തര പരാതി പരിഹാര സമിതി രണ്ടു മാസത്തിനകം രൂപീകരിക്കാനും കോടതി നിര്‍ദ്ദേശിച്ചു. ലിംഗ സമത്വം ഉറപ്പാക്കാനുള്ള യു.ജി.സി നിര്‍ദ്ദേശങ്ങളും നടപ്പാക്കണം. ഹോസ്റ്റലില്‍ ലൈബ്രറി, റിക്രിയേഷന്‍ തുടങ്ങിയ സൗകര്യങ്ങള്‍ക്കായി വിദ്യാര്‍ത്ഥികള്‍ക്ക് പ്രിന്‍സിപ്പലിനെയോ തുടര്‍ന്ന് ആരോഗ്യ സര്‍വകലാശാലയെയോ സമീപിക്കാമെന്നും വ്യക്തമാക്കി.

അതേസമയം, ഹോസ്റ്റല്‍ പ്രവേശനത്തിനുള്ള ഇളവ് എന്‍ജിനിയറിംഗ് കോളേജുകള്‍ക്കും വേണമെന്ന ആവശ്യത്തില്‍ തീരുമാനമെടുത്തിട്ടില്ലെന്ന് സര്‍ക്കാര്‍ അറിയിച്ചു. ഈ വിഷയം ജനുവരി പത്തിന് പരിഗണിക്കും.

അതേസമയം ഹോസ്റ്റലുകള്‍ ഏതു നേരവും തുറന്നിടണമെന്ന വാദത്തോടു യോജിപ്പില്ലെന്നും അങ്ങനെയാകണമെങ്കില്‍ സമൂഹം മാറണമെന്നും ഹൈക്കോടതി നിരീക്ഷിച്ചു. മെഡിക്കല്‍ കോളേജ് ഹോസ്റ്റലുകളിലെ രാത്രി വിലക്കിനെതിരെയുള്ള ഹര്‍ജികള്‍ പരിഗണിക്കവെയാണ് പരാമര്‍ശം. യാതൊരു നിയന്ത്രണവുമില്ലാത്ത കാമ്പസ് എന്ന നിലയിലേക്ക് നാം എത്തിയിട്ടില്ല. മൗലികാവകാശങ്ങള്‍ക്കു പോലും നിയന്ത്രണമുണ്ട്.

ഹോസ്റ്റലുകളില്‍ അടിസ്ഥാന അച്ചടക്കം ബാധകമാണെന്ന് ആരോഗ്യ സര്‍വകലാശാല വാദിക്കുന്നു. ഇതില്‍ സംശയമില്ല. സര്‍ക്കാരിന്റെ പുതിയ ഉത്തരവ് ഹര്‍ജിക്കാരുടെ ആശങ്ക വലിയൊരളവു വരെ പരിഹരിക്കുന്നതാണ്. കാലം മാറുന്നതിനനുസരിച്ച് കൂടുതല്‍ ഇളവുകളുണ്ടാകും.

പെണ്‍കുട്ടികള്‍ക്കും സ്ത്രീകള്‍ക്കും ഏതുസമയവും പുറത്തിറങ്ങാന്‍ കഴിയുന്ന മാതൃകാപരമായ സാഹചര്യം ഉണ്ടാകണം. നമ്മുടെ നാട് അത്ര പുരോഗമിച്ചിട്ടില്ല. സുരക്ഷയടക്കമുള്ള കാര്യങ്ങള്‍ ഉറപ്പാക്കേണ്ടതുണ്ട്. പതിനെട്ടു കഴിഞ്ഞാലും മക്കളെക്കുറിച്ച് രക്ഷിതാക്കള്‍ക്കുള്ള ആശങ്ക തള്ളിക്കളയാനാവില്ല. നമ്മുടെ പൊതുയിടങ്ങളും തെരുവുകളും വഴികളും രാത്രിയും പകലുമെന്ന ഭേദമില്ലാതെ ഇവര്‍ക്ക് സുരക്ഷിതരായി ഇറങ്ങി നടക്കാന്‍ പര്യാപ്തമാകണം.