കോവിഡ് കവര്‍ന്ന രണ്ടുകൊല്ലത്തെ ഇടവേളകഴിഞ്ഞ്, ഒരിക്കല്‍ക്കൂടി കോഴിക്കോട്ടെത്തുന്ന സംസ്ഥാന സ്‌കൂള്‍ കലോത്സവത്തെ വരവേല്‍ക്കാന്‍ ഒരുക്കം തകൃതി. പ്രധാന വേദിയായ വെസ്റ്റ്ഹില്‍ വിക്രം മൈതാനത്ത് പടുകൂറ്റന്‍ പന്തലിന്റെ പണി പുരോഗമിക്കുന്നു. 60,000 ചതുരശ്ര അടി വിസ്തീര്‍ണത്തിലാണ് ഒന്നാം വേദിയില്‍ പന്തലൊരുങ്ങുന്നത്. 400 അടി നീളവും 160 അടി വീതിയുമുണ്ടാവും.


ഇരുമ്പുകാലുകള്‍ക്ക് മുകളില്‍ അലുമിനിയം ഷീറ്റ് വിരിക്കും. 15,000 പേര്‍ക്ക് ആദ്യവേദിയില്‍ കാഴ്ചക്കാരായെത്താം. 13,000 കസേരകളെങ്കിലും നിരത്താനാണ് ആലോചിക്കുന്നത്. 3500 ചതുരശ്ര അടിയിലാവും സ്റ്റേജും ഗ്രീന്‍ റൂം അടക്കമുള്ള അനുബന്ധ സൗകര്യങ്ങളുമൊരുക്കുക.

ആണ്‍കുട്ടികള്‍ക്കും പെണ്‍കുട്ടികള്‍ക്കുമായി 14 ഗ്രീന്‍ റൂമുകളുണ്ടാവും. 15 വീതം ശൗചാലയങ്ങളൊരുക്കും. ഇതിനുപുറമേ വിശ്രമമുറിയും സജ്ജമാക്കും.പോലീസ്, ഫയര്‍ ഫോഴ്‌സ് പവിലിയനുകള്‍, വി.ഐ.പി.കള്‍ക്ക് വിശ്രമിക്കാനുള്ള പന്തല്‍, മാധ്യമങ്ങള്‍ക്കുള്ള സ്റ്റാളുകള്‍, സംഘാടകസമിതി ഓഫീസ്, സബ് കമ്മിറ്റികള്‍ക്കുള്ള ഓഫീസ് എന്നിവയും വിക്രം മൈതാനിയില്‍ സജ്ജമാക്കും.

പലഭാഗത്തും ചതുപ്പുനിലമാണെന്നതാണ് മൈതാനത്തെ പ്രയാസം. പുല്ലും കാടും വെട്ടിത്തെളിച്ചതോടെ വെള്ളം വാര്‍ന്നുപോയിക്കിട്ടുമെന്നാണ് കരുതുന്നത്. അങ്ങനെയായാല്‍ വാഹനങ്ങള്‍ നിര്‍ത്തിയിടാനാവും. അല്ലെങ്കില്‍ പാര്‍ക്കിങ് പ്രയാസമാവും. പ്രതിരോധവകുപ്പിന്റെ കൈവശമുള്ള മൈതാനം 24 മുതലാണ് സംഘാടകസമിതിക്ക് വിട്ടുനല്‍കാന്‍ തീരുമാനിച്ചതെങ്കിലും ഡി.പി.ഐ. ഉള്‍പ്പെടെയുള്ളവര്‍ ഇടപെട്ടതോടെയാണ് നേരത്തേതന്നെ പന്തല്‍ നിര്‍മാണത്തിന് അനുമതികിട്ടിയത്.

പ്രധാനവേദി ഉള്‍പ്പെടെ രണ്ടുലക്ഷത്തോളം ചതുരശ്ര അടി വിസ്തീര്‍ണമുള്ള പന്തല്‍ വിവിധ വേദികളിലായി ഒരുക്കേണ്ടിവരും. 40,000 ചതുരശ്ര അടിയിലുള്ള പന്തലാണ് ഭക്ഷണം കഴിക്കാനായി സജ്ജമാക്കുന്നത്. ക്രിസ്ത്യന്‍ കോളേജ് ഗ്രൗണ്ടിലെ ഭക്ഷണപ്പന്തലില്‍ 30,000 ചതുരശ്ര അടി ഇരുന്ന് ഭക്ഷണം കഴിക്കാന്‍ കരുതും. ബാക്കിസ്ഥലം കലവറയും പാചകപ്പുരയും. സാമൂതിരി സ്‌കൂളിലെ ഗ്രൗണ്ടില്‍ 5000 പേര്‍ക്കും നടുമുറ്റത്ത് നാലായിരം പേര്‍ക്കും ഇരിക്കാവുന്ന പന്തലാണ് ഒരുക്കുന്നത്,