ഒടുവില്‍ ആ രണ്ടു ഭീമന്‍ ട്രെയിലറുകളും താമരശ്ശേരി ചുരം കടന്നു. മൂന്നുമാസത്തെ കാത്തിരിപ്പിനൊടുവില്‍ അടിവാരത്തുനിന്ന് ഇന്നലെ രാത്രി 10.56ന് യാത്ര തുടങ്ങിയ കൂറ്റന്‍ യന്ത്രങ്ങളാണ് പുലര്‍ച്ചെ 2 മണിയോടെ ചുരത്തിലെ ഒന്‍പതാം വളവും കയറി വയനാട്ടിലേക്കെത്തിയത്.



കര്‍ണാടകയിലെ നഞ്ചന്‍കോട്ടേയ്ക്കു കൊണ്ടുപോകാനായി എത്തിച്ച കൂറ്റന്‍ യന്ത്രഭാഗങ്ങളാണ് രണ്ടു ട്രെയിലറുകളിലുണ്ടായിരുന്നത്. യുദ്ധസമാനമായ ഒരുക്കങ്ങളോടെയാണ് രണ്ടു ട്രെയിലറുകളും യാത്ര തുടങ്ങിയത്. മൂന്നു മാസമായി തുടരുന്ന വാദപ്രതിവാദങ്ങള്‍ക്കും നിയമപ്രശ്‌നങ്ങള്‍ക്കുമൊടുവിലാണ് ട്രെയിലറുകള്‍ യാത്ര തുടങ്ങിയത്. നഷ്ടപരിഹാരമായി കമ്പനി 20 ലക്ഷം രൂപ കെട്ടിവച്ചതോടെയാണ് ചുരം വഴി കൊണ്ടുപോകാനായി അനുമതി നല്‍കിയത്.


ട്രെയിലറുകള്‍ ചുരം കയറുന്നതിനു മുന്നോടിയായി ഇന്നലെ രാത്രി 11 മുതല്‍ ചുരത്തില്‍ ഗതാഗത നിയന്ത്രണം പ്രഖ്യാപിച്ചിരുന്നു.
20 ടണ്ണിലേറെ ഭാരമുള്ള വാഹനങ്ങള്‍ കയറ്റിയാല്‍ ചുരം റോഡ് തകരുമെന്നതായിരുന്നു ആശങ്ക.

വാഹനങ്ങളിലെ വീതിയേറിയ യന്ത്ര ഭാഗങ്ങള്‍ വീതി കുറഞ്ഞ ചുരം റോഡിലൂടെ കൊണ്ടുപോകാന്‍ കഴിയുമോ എന്നതായിരുന്നു മറ്റൊരു ആശങ്ക. നെസ്ലെയുടെ നഞ്ചന്‍കോട്ടെ ഫാക്ടറിയിലേക്ക് കൊണ്ടുപോകുന്നതിനായി കൊറിയയില്‍നിന്ന് ഇറക്കുമതി ചെയ്ത യന്ത്രഭാഗങ്ങളാണ് ട്രെയിലറുകളിലുണ്ടായിരുന്നത്.


പാലക്കാട് സ്വദേശി സ്വാമിനാഥന്‍, ബാലമുരുകന്‍, നഞ്ചന്‍കോട് സ്വദേശികളായ ചന്ദ്രന്‍, മുരുകന്‍ തുടങ്ങിയ ഡ്രൈവര്‍മാര്‍ അടക്കം 14 ജീവനക്കാര്‍ ചേര്‍ന്നാണ് രണ്ടു ട്രെയിലറുകള്‍ കൊണ്ടുപോയത്. ചെന്നൈയിലെ അണ്ണാമലൈ ട്രാന്‍സ്‌പോര്‍ട്ട് കമ്പനിയുടേതാണ് രണ്ട് ട്രെയിലറുകളും.


ഏറ്റവും മുന്നിലായി വെളിച്ച സംവിധാനങ്ങള്‍ ഘടിപ്പിച്ച വാഹനമാണ് ഓടിച്ചത്. ഇതിനു പിറകിലായി ട്രെയിലറുകളും അവയ്ക്കു സുരക്ഷ ഒരുക്കാന്‍ കമ്പനിയുടെ പൈലറ്റ് വാഹനങ്ങളുമുണ്ടായിരുന്നു.
വാഹനത്തിന് അറ്റകുറ്റപ്പണി വേണ്ടിവന്നാല്‍ നന്നാക്കാനുള്ള മൊബൈല്‍ വര്‍ക്ഷോപ് സംവിധാനവും ഒരുക്കി. ചുരംസംരക്ഷണസമിതിയുടെ സന്നദ്ധപ്രവര്‍ത്തകര്‍ വാഹനത്തിനുവേണ്ട സഹായങ്ങളുമായി കൂടെ സഞ്ചരിച്ചു. മണിക്കൂറില്‍ ശരാശരി 15 കിലോമീറ്റര്‍ വേഗതയുള്ള വണ്ടികളാണ് രണ്ടും. ആകെ 12 കിലോമീറ്റര്‍ ദൈര്‍ഘ്യമുള്ള താമരശ്ശേരി ചുരത്തില്‍ 9 ഹെയര്‍പിന്‍ വളവാണുള്ളത്. ഒന്നാമത്തെ വളവ് എത്തുന്നതിനു മുന്‍പ് 3 തവണ ഒരു ട്രെയിലര്‍ പണി മുടക്കി.

വയനാട്ടില്‍ നിന്നുള്ള 2 ആംബുലന്‍സുകള്‍ക്ക് കടന്നുപോവാനായി ഏഴാം വളവില്‍ അല്‍പ നേരം നിര്‍ത്തിയിട്ടു. 8, 9 വളവുകള്‍ക്കിടയിലെ വീതികുറഞ്ഞ ഭാഗം ട്രെയിലറുകള്‍ കടക്കുമോ എന്ന ആശങ്കയുണ്ടായിരുന്നെങ്കിലും പ്രശ്‌നങ്ങളില്ലാതെ ഈ ഭാഗവും കടന്നു.

അതേസമയം ട്രെയിലറുകള്‍ സുഗമമായി കടത്തിവിടാനായി പൊതുമരാമത്ത് വകുപ്പ്, പൊലീസ്, വനംവകുപ്പ്, മുക്കത്തു നിന്നുള്ള അഗ്‌നിരക്ഷാസേന, കെഎസ്ഇബി, ആരോഗ്യവകുപ്പ്, മോട്ടോര്‍വാഹന വകുപ്പ് തുടങ്ങിയ വിവിധ വകുപ്പുകളുടെ സഹായവും ഒരുക്കി.