കൂടത്തായി കൂട്ടക്കൊലക്കേസ്.... റോയ് തോമസ് വധക്കേസില് സാക്ഷി വിസ്താരം തുടങ്ങുന്ന തീയതി ഫെബ്രുവരി നാലിന് തീരുമാനം
കൂടത്തായി കൂട്ടക്കൊലക്കേസ് പരമ്പരയില്പെട്ട റോയ് തോമസ് വധക്കേസില് സാക്ഷി വിസ്താരം തുടങ്ങുന്ന തീയതി ഫെബ്രുവരി നാലിന് തീരുമാനം.
ഇന്നലെ കേസ് മാറാട് പ്രത്യേക അഡീഷനല് സെഷന്സ് ജഡ്ജ് എസ്.ആര്. ശ്യാംലാല് മുമ്പാകെ പരിഗണിക്കവേ പ്രതിഭാഗത്തിനുവേണ്ടി ഹാജരായ അഡ്വ. ബി.എ. ആളൂര് കൂടുതല് സമയം നല്കാന് അപേക്ഷിക്കുകയായിരുന്നു.
കേസില് കുറ്റവിമുക്തയാക്കണമെന്ന ഹരജി പ്രത്യേക കോടതി തള്ളിയതിനെതിരെ ഹൈകോടതിയില് അപേക്ഷ നല്കിയ സാഹചര്യത്തില് സാക്ഷിവിസ്താരം തുടങ്ങുന്നത് നീട്ടണമെന്നായിരുന്നു പ്രതിഭാഗത്തിന്റെ വാദം.
ജയിലില്നിന്ന് ഓണ്ലൈന് വഴി ഹാജരായ ജോളി തടവില് കഴിയുന്ന തനിക്ക് ചികിത്സ ചെലവിനായി സ്വന്തം അക്കൗണ്ടിലെ പണം അനുവദിക്കണമെന്നാണ് അപേക്ഷ. ഇതിനായി ജയിലധികൃതര് ട്രഷറി അക്കൗണ്ട് വിവരങ്ങള് നല്കിയെങ്കിലും പ്രായോഗിക ബുദ്ധിമുട്ടുള്ളതിനാല് ജയിലിലേക്ക് മണി ഓര്ഡറായി പണം നല്കാനായി കോടതി നിര്ദേശം നല്കി.
കേസില് ജോളിയടക്കം നാലു പ്രതികള്ക്ക് കോടതി കഴിഞ്ഞ തവണ കേസ് പരിഗണിച്ചപ്പോള് കുറ്റപത്രം വായിച്ച് കേള്പ്പിച്ചിട്ടുണ്ടായിരുന്നു. മുഖ്യപ്രതി പൊന്നമറ്റം ജോളിയാമ്മ ജോസഫ് എന്ന ജോളി, സയനൈഡ് നല്കിയെന്ന് ആരോപണമുയര്ന്ന ജ്വല്ലറി ജീവനക്കാരന് മഞ്ചാടിയില് എം.എസ്. മാത്യു എന്ന ഷാജി, സ്വര്ണപ്പണിക്കാരന് പ്രജികുമാര്, വ്യാജ ഒസിയത്ത് നിര്മിച്ചുവെന്ന് കുറ്റം ചുമത്തപ്പെട്ട മനോജ് കുമാര് എന്നിവരാണ് പ്രതികള്.
ജോളി സാമ്പത്തിക നേട്ടം ലക്ഷ്യമിട്ട് മറ്റൊരാളെ വിവാഹം കഴിക്കാനായി ആദ്യ ഭര്ത്താവ് റോയ് തോമസിനെ മറ്റു പ്രതികളുടെ സഹായത്തോടെ ഭക്ഷണത്തില് വിഷം നല്കി കൊന്നുവെന്ന കേസാണ് ഇപ്പോള് പരിഗണിക്കുന്നത്.
കേസില് കുറ്റവിമുക്തയാക്കണമെന്ന ഹരജി പ്രത്യേക കോടതി തള്ളിയതിനെതിരെ ഹൈകോടതിയില് ജോളിയുടെ അപേക്ഷ വാദം കേള്ക്കാനും രേഖകള് പരിശോധിക്കാനും ഹൈകോടതി ഫെബ്രുവരിക്ക് മാറ്റിയിരിക്കുകയാണ്. പ്രതിഭാഗത്തിനായി അഡ്വ. ആളൂരിനൊപ്പം അഡ്വ. ഹിജാസ് അഹമ്മദും ഹാജരായി. സ്പെഷല് പ്രോസിക്യൂട്ടര് എന്.കെ. ഉണ്ണികൃഷ്ണന് പ്രോസിക്യൂഷനുവേണ്ടിയും ഹാജരായി. ജോളി കണ്ണൂര് വനിത ജയിലിലും മാത്യു കോഴിക്കോട് ജില്ല ജയിലിലുമാണ് റിമാന്ഡില് കഴിയുന്നത്. ജാമ്യത്തിലാണ് മറ്റു പ്രതികളെല്ലാം.
"
https://www.facebook.com/Malayalivartha
