എലത്തൂര്‍ ട്രെയിന്‍ തീവയ്പ് കേസിലെ പ്രതി ഷാറൂഖ് സെയ്ഫിയെ കണ്ണൂര്‍ റെയില്‍വേ സ്റ്റേഷനിലെത്തിച്ച് തെളിവെടുത്തു.... ഇന്നലെ ഉച്ചക്ക് 1.45ന് കോഴിക്കോട് നിന്ന് പത്തോളം പൊലീസ് വാഹനത്തിന്റെ അകമ്പടിയോടെ പ്രതിയുമായി പുറപ്പെട്ട സംഘം വൈകിട്ട് 4.15നാണ് കണ്ണൂര്‍ റെയില്‍വേ സ്റ്റേഷനിലെത്തിയത്.

തലയുള്‍പ്പെടെ മൂടിയായിരുന്നു ഷാറൂഖിനെ സ്റ്റേഷനിലെത്തിച്ചത്. ഇന്ത്യന്‍ റിസര്‍വ്വ് ബറ്റാലിയന്‍ അംഗങ്ങളും പൊലീസുമടക്കം അന്‍പതോളം പേരുടെ മദ്ധ്യത്തിലായിരുന്നു തെളിവെടുപ്പ് മാദ്ധ്യമ പ്രവര്‍ത്തകരെയുള്‍പ്പെടെ ദൂരേക്ക് മാറ്റി .കണ്ണൂര്‍ റെയില്‍വേ സ്റ്റേഷന്റെ കിഴക്കേ കവാടത്തില്‍ നിറുത്തിയിട്ട ബോഗികളിലെ തെളിവെടുപ്പ് 40 മിനിട്ട് നീണ്ടു.

തുടര്‍ന്ന് അഞ്ചോടെ റെയില്‍വേ സ്റ്റേഷനിലെ ഒന്നാം നമ്പര്‍ പ്ലാറ്റ്‌ഫോമില്‍ എത്തിച്ചു. മഹാരാഷ്ട്ര രത്‌നഗിരിയിലേക്ക് രക്ഷപ്പെടുന്നതിനായി ഷാറുഖ് കയറിയ ട്രെയിനിന്റെ 20-ാമത്തെ കമ്പാര്‍ട്ട്‌മെന്റ് നിറുത്തിയ ഭാഗത്തെത്തിച്ചും തെളിവെടുത്തു. തുടര്‍ന്ന് ഷാറുഖിനെയും കൊണ്ട് കോഴിക്കോട്ടേക്ക് മടങ്ങുകയും ചെയ്തു.