ഗുരുവായൂര്‍ ക്ഷേത്രത്തിലെ ഈ വര്‍ഷത്തെ വിഷുക്കണി ദര്‍ശനം 15-ന് പുലര്‍ച്ചെ 2.45-ന് ആരംഭിക്കും. ഒരു മണിക്കൂര്‍ തുടരും. 3.45-ന് തൈലാഭിഷേകം, വാകച്ചാര്‍ത്ത് തുടങ്ങിയ പതിവു ചടങ്ങുകളിലേക്ക് കടക്കും. ശ്രീലകത്ത് ഗുരുവായൂരപ്പവിഗ്രഹത്തിന്റെ വലതു ഭാഗത്ത് മുഖമണ്ഡപത്തില്‍ സ്വര്‍ണശീവേലിത്തിടമ്പ് അലങ്കരിച്ച പൊന്‍പീഠത്തില്‍ എഴുന്നള്ളിച്ചുവയ്ക്കും. മുന്നില്‍ ഓട്ടുരുളിയില്‍ കണിക്കോപ്പുകളും ഉണ്ടാകും.

മേല്‍ശാന്തി തോട്ടം ശിവകരന്‍ നമ്പൂതിരി ആദ്യം ഗുരുവായൂരപ്പന് കാണികാണിച്ചശേഷം ഭക്തര്‍ക്ക് ദര്‍ശനത്തിന് ശ്രീലകവാതില്‍ തുറക്കും. വിഷുനമസ്‌കാരം ക്ഷേത്രത്തില്‍ വിശേഷതയാണ്. ഉച്ചപ്പൂജയ്ക്ക് നമസ്‌കാരസദ്യയുടെ വിഭവങ്ങള്‍ ഭഗവാന് നിവേദിക്കും. രാത്രി വിഷുവിളക്ക് തെളിയും.

വിഷുവിനെ കുറിച്ചു വ്യത്യസ്ഥ ഐതിഹ്യങ്ങള്‍ പ്രചാരത്തില്‍ ഉണ്ട്. നരകാസുരന്‍ ശ്രീകൃഷ്ണനാല്‍ വധിക്കപ്പെട്ട ദിവസമാണ് വിഷുവായി ആഘോഷിക്കുന്നതെന്നാണ് ഒരു ഐതിഹ്യം. രാവണന്റെ കൊട്ടാരത്തിനുള്ളില്‍ വെയില്‍ തട്ടിയത് രാവണന് ഇഷ്ടപ്പെടാഞ്ഞതിനാല്‍ സൂര്യനെ നേരെ ഉദിക്കാന്‍ രാവണന്‍ സമ്മതിച്ചില്ലെന്നും രാവണനെ രാമന്‍ വധിച്ചശേഷമാണ് സൂര്യന്‍ നേരെ ഉദിച്ചതാണ് വിഷുവായി ആഘോഷിക്കുന്നതെന്നും മറ്റൊരു വിശ്വാസം ഉണ്ട്. കേരളത്തിന്റെ പ്രധാന വിളവെടുപ്പുത്സവങ്ങളാണ് വിഷുവും ഓണവും. ഓണം വിരിപ്പുകൃഷിയുമായി ബന്ധപ്പെട്ടാണെങ്കില്‍ വിഷു വേനല്‍ പച്ചക്കറി വിളകളുമായി ബന്ധപ്പെട്ടാണ് ആചരിക്കുന്നത്.


അതേസമയം, വളരെ പ്രധാനപ്പെട്ടതാണ് വിഷുക്കണി. വിഷുക്കണി കണ്ടുകൊണ്ട് വേണം വിഷു ദിവസം ആരംഭിക്കാന്‍. വിഷുക്കണിക്ക് ആവശ്യമായ സാധനങ്ങള്‍: കണിക്കൊന്ന കൃഷ്ണവിഗ്രഹം നിലവിളക്ക് ഉരുളി കോടിമുണ്ട് വെറ്റില, അടയ്ക്ക നാണയങ്ങള്‍ നാളികേരം പാതി പച്ചക്കറികള്‍ മാമ്പഴം, ചക്ക, ഇലയോട് കൂടിയ തണ്ട് പൊട്ടിക്കാത്ത മാങ്ങ ഉള്‍പ്പെടെയുള്ള പഴങ്ങള്‍ വാല്‍ക്കണ്ണാടി കണിവെള്ളരി കണ്‍മഷിയും ചാന്തും.

അതേസമയം വിഷുക്കണി ദര്‍ശനത്തിന് ദേവസ്വം ഏര്‍പ്പെടുത്തുന്ന ക്രമീകരണങ്ങള്‍ക്ക് ഭക്തജനങ്ങളുടെ സഹകരണം ദേവസ്വം അഡ്മിനിസ്ട്രേറ്റര്‍ അഭ്യര്‍ത്ഥിച്ചിട്ടുണ്ട്.