7.5 കോടി ചെലവഴിച്ച് നിര്‍മിച്ച കാസര്‍കോട് ജില്ലയിലെ ബെള്ളൂര്‍ ഗ്രാമപഞ്ചായത്തിലെ ജലനിധി പദ്ധതി, 5 കോടി രൂപ മുടക്കി മലപ്പുറം ചോക്കാട് പഞ്ചായത്തില്‍ പൂര്‍ത്തീകരിച്ച പദ്ധതി, വയനാട് തൊണ്ടര്‍നാട് ഗ്രാമപഞ്ചായത്തില്‍ 2.45 കോടി ചിലവഴിച്ച് നിര്‍മിച്ച പദ്ധതി, കണ്ണൂര്‍ കുന്നോത്ത് 66 ലക്ഷം രൂപ ചെലവഴിച്ച് സ്ഥാപിച്ച മഞ്ഞക്കാഞ്ഞിരം ജലനിധി പദ്ധതി, കോട്ടയം ഭരണങ്ങാനം ഗ്രാമപഞ്ചായത്തില്‍ 41.30 ലക്ഷം രൂപ മുടക്കി നിര്‍മിച്ച പാമ്പൂരാന്‍ പാറ ജലനിധി പദ്ധതി, 20 ലക്ഷം രൂപ ചെലവിട്ട് നിര്‍മിച്ച വയനാട് പുല്‍പ്പളളിയിലെ പദ്ധതി തുടങ്ങിയവ ഉപഭോക്താക്കള്‍ക്ക് യാതൊരു പ്രയോജനവും ലഭിക്കാതെ നിശ്ചലാവസ്ഥയിലാണെന്ന് വിജിലന്‍സ് കണ്ടെത്തി.

കോഴിക്കോട് കാട്ടിപ്പാറ പഞ്ചായത്തിലെ കണികയില്‍ സ്ഥാപിച്ച ജലനിധി പദ്ധതി ആകെ രണ്ട് മാസം മാത്രമാണ് പ്രവര്‍ത്തിച്ചത്. പത്തനംതിട്ടയിലെ കണ്ണന്താനം പഞ്ചായത്തില്‍ സ്ഥാപിച്ച 15 ജലനിധി പദ്ധതികളില്‍ 6 എണ്ണം നിലവില്‍ പ്രവര്‍ത്തിക്കുന്നില്ലെന്നും കാസര്‍കോട് ജില്ലയിലെ പെരിയ പഞ്ചായത്തിലെ രണ്ടു പദ്ധതികളും കോട്ടയം ജില്ലയിലെ കടപ്ലാമറ്റം പഞ്ചായത്തിലെ നിള പദ്ധതിയും വര്‍ഷങ്ങളായി പ്രവര്‍ത്തനരഹിതമാണെന്നും വിജിലന്‍സ് കണ്ടെത്തി.

പല പദ്ധതികളും ജലലഭ്യത ഉറപ്പ് വരുത്താതെ ആരംഭിച്ചിട്ടുള്ളതാണെന്നും ജലം ലഭിക്കാത്തതിനാല്‍ പല ഉപഭോക്താക്കളും കണക്ഷന്‍ സ്വയം വിച്ഛേദിക്കുന്നുണ്ടെന്നും വിജിലന്‍സ് കണ്ടെത്തി. ചില സ്ഥലങ്ങളില്‍ ജലനിധി പദ്ധതി പ്രകാരം ഉപഭോക്താക്കള്‍ക്ക് നല്‍കുന്ന ജലം ശുദ്ധീകരിക്കാറില്ലെന്നും കണ്ടെത്തി.