അരീക്കോട് കുനിയില്‍ ഇരട്ടക്കൊലപാതക കേസിലെ 12 പ്രതികള്‍ക്ക് ഇരട്ട ജീവപര്യന്തവും 50000 രൂപ വീതം പിഴയും ശിക്ഷ വിധിച്ചു. മഞ്ചേരി മൂന്നാം അഡിഷണല്‍ സെഷന്‍സ് കോടതിയാണ് ശിക്ഷ വിധിച്ചത്. ഒന്നു മുതല്‍ 11 വരെയുള്ള പ്രതികളും 18ാം പ്രതിയും കുറ്റക്കാരെന്ന് കോടതി നേരത്തെ കണ്ടെത്തിയിരുന്നു. ദൃക്‌സാക്ഷികള്‍ ഉള്‍പ്പെടെ 364 സാക്ഷികളാണ് കേസിലുള്ളത്. 273 സാക്ഷികളെ വിസ്തരിച്ചു. കൊലപ്പെടുത്താന്‍ ഉപയോഗിച്ച വടിവാള്‍, മറ്റ് ആയുധങ്ങള്‍, പ്രതികളുടെ മൊബൈല്‍ ഫോണുകള്‍ ഉള്‍പ്പെടെ 100 തൊണ്ടിമുതലുകള്‍ കോടതിയില്‍ ഹാജരാക്കിയിരുന്നു,

പിഴത്തുക കൊല്ലപ്പെട്ടവരുടെ ബന്ധുക്കള്‍ക്ക് നല്‍കണമെന്നും വിധിയില്‍ പറയുന്നു. 2012 ജൂണ്‍ പത്തിനാണ് സഹോദരങ്ങളായ അബുബക്കര്‍, ആസാദ് എന്നിവര്‍ കൊല്ലപ്പെട്ടത്. പികുനിയില്‍ കുറുവാടന്‍ മുക്താര്‍, കോഴിശ്ശേരിക്കുന്നത് റാഷിദ്, റഷീദ്, ചോലയില്‍ ഉമ്മര്‍ തുടങ്ങി 21 പേരായിരുന്നു പ്രതികള്‍, സഹോദരങ്ങളായ കുനിയില്‍ കൊളക്കാടന്‍ അബുബേക്കര്‍, ആസാദ്, എന്നിവരെ മുഖംമൂടി ധരിച്ചെത്തിയ സംഘം കുനിയില്‍ അങ്ങാടിയില്‍ വച്ച് കൊലപ്പെടുത്തി എന്നാണ് കേസ്. കുനിയില്‍ അത്തിഖ് റഹ്മാന്‍ കൊല്ലപ്പെട്ടതിന്റെ പ്രതികാരമായി കൊലപ്പെടുത്തിയെന്നാണ് പ്രോസിക്യൂഷന്‍ വാദം.