അങ്ങനെ രാഹുല്‍ ഗാന്ധിയ്ക്ക് വീണ്ടും ചോദ്യങ്ങള്‍ ചോദിച്ച് കൊണ്ടിരിക്കാം. പക്ഷെ ഉത്തരങ്ങള്‍ ആരും നല്‍കില്ല. കുറ്റക്കാരനെന്നുള്ള വിധി സ്റ്റേ ചെയ്യണമെന്ന ആവശ്യം ഗുജറാത്ത് സെഷന്‍സ് കോടതി തള്ളിയതതോടെ നീണ്ട നിയമപോരാട്ടമാണ് രാഹുല്‍ ഗാന്ധിയെ കാത്തിരിക്കുന്നത്. അദാനി വിഷയം ഉയര്‍ത്തിയതിന് വേട്ടയാടുന്നു എന്ന വാദം ശക്തമാക്കി ഇതിനെ രാഷ്ട്രീയമായി നേരിടാനാണ് കോണ്‍ഗ്രസ് തീരുമാനം. പക്ഷെ ഈ സാഹചര്യത്തില്‍ അത് വിലപോകില്ല.

ഗുജറാത്ത് സെഷന്‍സ് കോടതി വിധി വരുന്നതിന് തൊട്ടുമുമ്പാണ് അദാനിയെ പ്രധാനമന്ത്രി സഹായിക്കുന്നു എന്ന വിഡിയോ രാഹുല്‍ ഗാന്ധി വീണ്ടും പുറത്തിറക്കിയത്. അയോഗ്യത തുടരുന്ന രാഹുല്‍ ഗാന്ധിക്ക് ആദ്യം ഹൈക്കോടതിയിലും പിന്നീട് സുപ്രീംകോടതിയിലും പോകാമെങ്കിലും നിയമനടപടികള്‍ വൈകാനുള്ള സാധ്യതയുണ്ട്. കോടതികള്‍ അവധിക്കാലത്തിലേക്ക് കടക്കുന്നതിനാല്‍ അടുത്ത രണ്ടാഴ്ചയ്ക്കുളളില്‍ രാഹുല്‍ ഗാന്ധിക്ക് ആശ്വാസം കിട്ടണം.

ഗുജറാത്ത് ഹൈക്കോടതി മെയ് ആറിനാണ് അടക്കുന്നത്. സുപ്രീംകോടതിയില്‍ ഇരുപതിന് വേനലവധി തുടങ്ങും. ഗുജറാത്ത് സെഷന്‍സ് കോടതിയിലെ പ്രധാന അപ്പീലിന്‍മേലുള്ള നടപടികള്‍ പൂര്‍ത്തിയാകാന്‍ മേല്‍ക്കോടതികള്‍ കാത്തുനിന്നാല്‍ ലോക്‌സഭ തെരഞ്ഞെടുപ്പില്‍ രാഹുല്‍ മത്സരിക്കാനുള്ള സാധ്യതയും മങ്ങും.

വയനാട് മണ്ഡലത്തില്‍ തല്ക്കാലം തെരഞ്ഞെടുപ്പ് ആലോചിക്കുന്നില്ലെന്ന് തെരഞ്ഞെടുപ്പ് കമ്മീഷന്‍ വൃത്തങ്ങള്‍ വ്യക്തമാക്കിയെങ്കിലും തെരഞ്ഞെടുപ്പിലേക്കാണ് കാര്യങ്ങള്‍ പോകുന്നത്. ഹൈക്കോടതിയോ സുപ്രീംകോടതിയോ അടിയന്തരമായി ഈ വിഷയത്തില്‍ ഇടപെടുമോ എന്ന് നിരീക്ഷിക്കും. കര്‍ണ്ണാടക തെരഞ്ഞെടുപ്പിന് ശേഷം ഇക്കാര്യം ആലോചിക്കും. തല്ക്കാലം ആറു മാസത്തെ സമയം തെരഞ്ഞെടുപ്പിനുണ്ടെന്ന് കമ്മീഷന്‍ വൃത്തങ്ങള്‍ ചൂണ്ടിക്കാട്ടി.

എംപി സ്ഥാനം നഷ്ടപ്പെട്ട രാഹുല്‍ ഗാന്ധി ഈ മാസം 22 നാണ് വീട് ഒഴിയേണ്ടത്. നാളെയും മറ്റന്നാളുമായി വീട് ഒഴിയാനാണ് കോണ്‍ഗ്രസ് തീരുമാനം. രാഹുല്‍ ഗാന്ധിയുടെ ഓഫീസ് പത്ത് ജന്‍പഥിലേക്ക് മാറ്റി. സര്‍ക്കാര്‍ രാഹുലിനെ വേട്ടയാടുന്നു എന്ന പ്രചാരണം ശക്തമാക്കി രാഷ്ട്രീയമായി നേരിടാനാണ് കോണ്‍ഗ്രസ് ആലോചന. പ്രതിപക്ഷ പാര്‍ട്ടികളെ കൂടെ നിറുത്തിയുള്ള നീക്കങ്ങളിലൂടെ ഇത് പ്രതിരോധിക്കാന്‍ നോക്കും. കോണ്‍ഗ്രസിന്റെ ഈ രാഷ്ട്രീയ നീക്കങ്ങളുടെ ഭാവി നിര്‍ണ്ണയിക്കുന്നതില്‍ കര്‍ണ്ണാടക തെരഞ്ഞെടുപ്പ് ഫലം നിര്‍ണ്ണായകമാകും

രാഹുല്‍ ഗാന്ദിയെ അയോഗ്യനാക്കിയ വിധിക്കെതിരായ അപ്പീല്‍ തള്ളിയ സൂററ്റ് സെഷന്‍സ് കോടതിയുടെ വിധിയെ സ്വാഗതം ചെയ്ത് ബിജെപി രംഗത്തെത്തി. നീതിന്യായ വ്യവസ്ഥയുടെയും സാധാരണ ജനങ്ങളുടെയും വിജയം എന്ന് ബിജെപി വക്താവ് സംപത് പാത്ര പ്രതികരിച്ചു. രാഹുല്‍ ഗാന്ധി നിയമത്തിന് മുകളില്‍ അല്ല. ഗാന്ധി കുടുംബത്തിന്റെ അഹങ്കാരത്തിനേറ്റ തിരിച്ചടിയാണിതെന്നും അദ്ദേഹം പറഞ്ഞു. രാഹുല്‍ ഗാന്ധിക്ക് രാജ്യത്തോട് മാപ്പ് ചോദിക്കാനുള്ള സമയം ഇനിയും ഉണ്ടെന്ന് കേന്ദ്രമന്ത്രി അനുരാഗ് ഠാക്കൂര്‍ പറഞ്ഞു. മോദിയെ ആക്രമിച്ച് പിന്നോക്കക്കാരെ അപമാനിക്കാനുള്ള കോണ്‍ഗ്രസ് ശ്രമം ഒരിക്കല്‍ കൂടി തെളിഞ്ഞുവെന്നും അദ്ദേഹം പറഞ്ഞു.

അപകീര്‍ത്തിക്കേസില്‍ രാഹുല്‍ ഗാന്ധിയുടെ അപ്പീല്‍ സൂറത്ത് സെഷന്‍സ് കോടതി തള്ളിയെങ്കിലും മേല്‍കോടതിയെ സമീപിക്കാന്‍ സാധ്യതയുള്ളതിനാല്‍ ഉടന്‍ നടപടി സ്വീകരിക്കേണ്ടെന്ന നിലപാടിലാണ് തെരഞ്ഞെടുപ്പ് കമ്മീഷന്‍.

എം പി സ്ഥാനത്ത് നിന്ന് അയോഗ്യനാക്കപ്പെട്ട രാഹുലിന് കോടതിയില്‍ നിന്ന് തിരിച്ചടി നേരിട്ടതോടെ വയനാട് വീണ്ടും തെരഞ്ഞെടുപ്പ് ഉണ്ടാകുമോ എന്ന് ഉറ്റുനോക്കുകയായിരുന്നു രാഷ്ട്രീയ കേരളം. എന്നാല്‍, ലക്ഷദ്വീപ് പാഠം ഉള്‍ക്കൊണ്ട് വയനാട്ടില്‍ ഉപതെരഞ്ഞെടുപ്പിന് തിടുക്കം കാണിക്കേണ്ടെന്നാണ് തെരഞ്ഞെടുപ്പ് കമ്മീഷന്റെ നിലപാട്. രാഹുല്‍ ഗാന്ധിയുടെ നിരീക്ഷിക്കുമെന്നും സമയമുണ്ടെന്നും തെരഞ്ഞെടുപ്പ് കമ്മീഷന്‍ വൃത്തങ്ങള്‍ അറിയിച്ചു.