പുഞ്ചിലെ ഭീകരാക്രമണത്തില്‍ 5 സൈനികര്‍ വീരമൃത്യു വരിച്ചുവെന്ന വാര്‍ത്ത വന്നതിന് പിന്നാലെ മറ്റൊരു ഞെട്ടിക്കുന്ന വാര്‍ത്ത പാകിസ്ഥാനില്‍ നിന്നും വരുന്നു. ഇന്ത്യയുമായി യുദ്ധസാധ്യതയെന്ന് പാകിസ്ഥാന്‍.

പാക്കിസ്ഥാനിലെ പഞ്ചാബ് പ്രവിശ്യയില്‍ തിരഞ്ഞെടുപ്പു നടത്തുന്നത് നീട്ടിവയ്ക്കണമെന്നു സുരക്ഷാ കാരണങ്ങള്‍ ചൂണ്ടിക്കാട്ടി ആഭ്യന്തരമന്ത്രാലയം സുപ്രീം കോടതിയോട് അഭ്യര്‍ഥിച്ചു.
രാജ്യത്തെ രാഷ്ട്രീയ അസ്ഥിരത, വര്‍ധിച്ചുവരുന്ന ഭീകരവാദം എന്നിവയോടൊപ്പം ഇന്ത്യയുമായുള്ള യുദ്ധഭീഷണിയും തിരഞ്ഞെടുപ്പിനു തടസ്സമായി മന്ത്രാലയം പറയുന്നു.

രാഷ്ട്രീയമായി നിര്‍ണായകമായ പഞ്ചാബ് പ്രവിശ്യയിലെ തിരഞ്ഞെടുപ്പ് രാജ്യത്തെ വംശീയ പ്രശ്നങ്ങള്‍, ജല തര്‍ക്കങ്ങള്‍ തുടങ്ങിയവ മുതലെടുക്കാന്‍ ഇന്ത്യയെ പ്രോത്സാഹിപ്പിക്കുമെന്നും റിപ്പോര്‍ട്ടില്‍ പറയുന്നു. ഈ മാസം 10നു പ്രഖ്യാപിച്ചിരുന്ന തിരഞ്ഞെടുപ്പ് മാറ്റിയ കമ്മിഷന്റെ ഉത്തരവ് സുപ്രീം കോടതി ബെഞ്ച് റദ്ദാക്കിയിരുന്നു. തുടര്‍ന്ന് മേയ് 14നു തിരഞ്ഞെടുപ്പു നടത്തണമെന്നു നിര്‍ദേശിക്കുകയും ചെയ്തു.

അതേസമയം പാക്കിസ്ഥാന്‍ വിദേശകാര്യ മന്ത്രി ബിലാവല്‍ ഭൂട്ടോ സര്‍ദാരി അടുത്ത മാസം ഇന്ത്യ സന്ദര്‍ശിക്കും. ഷാങ്ഹായ് സഹകരണ സംഘടനയുടെ (എസ്സിഒ) ഗോവയില്‍ നടക്കുന്ന വിദേശകാര്യ മന്ത്രിമാരുടെ യോഗത്തില്‍ പങ്കെടുക്കാനാണ് അദ്ദേഹമെത്തുന്നത്.

മേയ് 4, 5 തീയതികളില്‍ ഗോവയില്‍ നടക്കുന്ന എസ്സിഒ കൗണ്‍സില്‍ ഓഫ് ഫോറിന്‍ മിനിസ്റ്റേഴ്സ് (സിഎഫ്എം) ലേക്കുള്ള പാക്കിസ്ഥാന്‍ പ്രതിനിധി സംഘത്തെ ബിലാവല്‍ ഭൂട്ടോ സര്‍ദാരി നയിക്കുമെന്ന് പാക്കിസ്ഥാന്‍ വിദേശകാര്യ വക്താവ് മുംതാസ് സഹ്റ ബലോച്ച് അറിയിച്ചു.

2014ല്‍ നവാസ് ഷെരീഫിന് ശേഷം ഒരു പാക്കിസ്ഥാന്‍ നേതാവ് നടത്തുന്ന ആദ്യ സന്ദര്‍ശനമായിരിക്കും സര്‍ദാരിയുടെ ഇന്ത്യാ സന്ദര്‍ശനം. നിലവില്‍ എസ്സിഒയുടെ പ്രസിഡന്റ് സ്ഥാനം വഹിക്കുന്ന ഇന്ത്യ, ചൈനയുടെ വിദേശകാര്യ മന്ത്രി ക്വിന്‍ ഗാങ്ങിനും പാക്കിസ്ഥാന്‍ വിദേശകാര്യ മന്ത്രി ബിലാവല്‍ ഭൂട്ടോ സര്‍ദാരിക്കും ഉള്‍പ്പെടെയുള്ള എസ്സിഒ അംഗങ്ങള്‍ക്ക് ജനുവരിയില്‍ ക്ഷണം അയച്ചിരുന്നു.

ഷാങ്ഹായ് സഹകരണ സംഘടനയുടെ (എസ്‌സിഒ) യോഗത്തില്‍ പങ്കെടുക്കാന്‍ പാക്കിസ്ഥാന്‍ വിദേശകാര്യമന്ത്രി ബിലാവല്‍ ഭൂട്ടോയെ ക്ഷണിച്ചത് ഔപചാരികതയുടെ ഭാഗമാണെങ്കിലും ഇന്ത്യപാക്ക് ബന്ധങ്ങളെ ചര്‍ച്ചയുടെ പാതയിലേക്ക് തിരിച്ചുകൊണ്ടുവരാന്‍ അതു സഹായിച്ചേക്കും.

ബഹുരാഷ്ട്രസംഘടനാ യോഗത്തിന്റെ ആതിഥേയ രാഷ്ട്രമെന്ന നിലയില്‍ ഇന്ത്യ പാക്കിസ്ഥാനെ ക്ഷണിച്ചേ തീരൂ. അതുകൊണ്ട് ആ ക്ഷണത്തിന് പ്രത്യേകതയൊന്നുമില്ല. എന്നാല്‍, പാക്കിസ്ഥാന്‍ ക്ഷണം സ്വീകരിക്കുകയാണെങ്കില്‍, ചര്‍ച്ചകളുടെ ഭാഗമായി ഇരു രാജ്യങ്ങളും തമ്മില്‍ വിദേശകാര്യമന്ത്രിതലത്തില്‍ ഉഭയകക്ഷി കൂടിക്കാഴ്ചയ്ക്ക് പാക്കിസ്ഥാന്‍ അഭ്യര്‍ഥിച്ചേക്കും. അങ്ങനെ വന്നാല്‍ ഇന്ത്യ സമ്മതം മൂളുമെന്നാണ് കരുതുന്നത്. മേയില്‍ ഗോവയിലാണ് എസ്‌സിഒ സമ്മേളനം.

2011 ല്‍ ഹിന റബാനി ഖറിന്റെ സന്ദര്‍ശനത്തിനുശേഷം ഒരു പാക്ക് വിദേശകാര്യമന്ത്രിയും ഇന്ത്യയിലെത്തിയിട്ടില്ല. 2015 ഓഗസ്റ്റില്‍ പാക്ക് വിദേശകാര്യമന്ത്രി സര്‍താജ് അസീസ് വരാനിരുന്നതാണെങ്കിലും കശ്മീര്‍ നേതാക്കളുമായി കൂടിക്കാഴ്ച നടത്താനാവില്ലെന്ന് ഇന്ത്യ അറിയിച്ചതോടെ സന്ദര്‍ശനം റദ്ദാക്കി. 2015 ല്‍ ഹാര്‍ട്ട് ഒഫ് ഏഷ്യ സമ്മേളനത്തില്‍ പങ്കെടുക്കാന്‍ സുഷമ സ്വരാജ് പോയതിനു ശേഷം ഒരു ഇന്ത്യന്‍ വിദേശകാര്യമന്ത്രിയും പാക്കിസ്ഥാന്‍ സന്ദര്‍ശിച്ചിട്ടില്ല.

2014 ല്‍ നരേന്ദ്ര മോദിയുടെ സത്യപ്രതിജ്ഞാചടങ്ങിന് പ്രധാനമന്ത്രി നവാസ് ഷരീഫ് എത്തിയതും 2015 ല്‍ ഷരീഫിന്റെ കൊച്ചുമകളുടെ വിവാഹസല്‍ക്കാരത്തില്‍ പങ്കെടുക്കാന്‍ മോദി അപ്രതീക്ഷിതമായി ലഹോറില്‍ എത്തിയതുമാണ് അതിനിടയില്‍ പ്രധാനമന്ത്രിതലത്തില്‍ നടന്ന കൂടിക്കാഴ്ചകള്‍.