വമ്പൻ പരിപാടികളുമായി വന്ദേഭാരത് ട്രെയിനിന്റെ ഉദ്ഘാടനം ചെയ്യാൻ അധികൃതർ. പ്രധാനമന്ത്രിയെ സ്വീകരിക്കാൻ അനന്തപുരിയുടെ മുക്കും മൂലയും ഒരുങ്ങുന്നു. റെയിൽവേയും വിവിധ സംഘടനകളും ഉദ്ഘാടനം ഉത്സവമാക്കാനുള്ള തിരക്കിലാണ്.
വിവിധ വിഭാഗങ്ങളിൽ നിന്നുള്ള ജീവനക്കാരെ പരിപാടിയിൽ പങ്കെടുപ്പിക്കാനും നിർദേശിച്ചിട്ടുണ്ട്. 26 മുതലുള്ള സർവീസുകളിൽ ടിക്കറ്റ് ബുക്ക് ചെയ്യാമെന്ന് റെയിൽവേ അധികൃതർ അറിയിച്ചു.

വന്ദേഭാരത് ഉദ്ഘാടന വേളയിൽ 500 ജീവനക്കാരാണ് എൻജിനീയറിങ് വിഭാഗത്തിൽ നിന്ന് പങ്കെടുക്കുന്നത്. വന്ദേഭാരത് ട്രെയിനിനുള്ളിലെ അനൗൺസ്മെന്റ് സന്ദേശങ്ങൾ മലയാളത്തിൽ റിക്കോർഡ് ചെയ്യാനായി ചെന്നൈ ഐസിഎഫിൽ നിന്ന് അയച്ചുകൊടുത്തതായി റെയിൽവേ അധികൃതർ അറിയിച്ചു. മെട്രോ മാതൃകയിൽ അടുത്ത സ്റ്റേഷൻ സംബന്ധിച്ച അറിയിപ്പുകൾ കോച്ചിനുള്ളിൽ ലഭിക്കും. 25ന് വന്ദേഭാരതിന്റെ കന്നിയാത്രയിൽ ക്ഷണിക്കപ്പെട്ടവർക്കാണു പ്രവേശനം. ഉദ്ഘാടന ദിവസത്തിൽ സർവീസ് സ്റ്റോപ്പില്ലാത്ത ചില പ്രധാന സ്റ്റേഷനുകളിലും നിർത്തുമെന്ന് അധികൃതർ അറിയിച്ചു .തിരുവനന്തപുരം സെൻട്രൽ സ്റ്റേഷനിൽ വന്ദേഭാരത് സെൽഫി പോയിന്റുകളും സജ്ജീകരിക്കും.

ട്രെയിൻ ടിക്കറ്റുകൾ ഐആർസിടിസി വെബ്സൈറ്റിൽ ബുക്ക് ചെയ്യാൻ സാധിക്കും. വന്ദേഭാരതിൽ മികച്ച ഭക്ഷണം ഉറപ്പാക്കാനുള്ള ശ്രമത്തിലാണ് ഐആർസിടിസി. ടിക്കറ്റ് ബുക്ക് ചെയ്യുമ്പോൾ ഭക്ഷണം വേണോ വേണ്ടയോ എന്നു യാത്രാക്കാർക്ക് തീരുമാനിക്കാം. ഇത് അനുസരിച്ചു ടിക്കറ്റ് നിരക്കുകളിൽ വ്യത്യാസപ്പെടുമെന്ന് അധികൃതർ അറിയിച്ചു.
ബിജെപിയും പലവിധ പരിപാടികൾ നിശ്ചയിച്ചിട്ടുണ്ട്.