പിണറായി സര്‍ക്കാരിന്റെ ഏറ്റവും അഭിമാന പദ്ധതിയായാണ് ശബരിമല വിമാനതാവള പദ്ധതിയ്ക്കായി ഇടതുപക്ഷം രംഗത്തിറങ്ങിയത്. വിനോദസഞ്ചാരത്തിന് പ്രത്യേകിച്ച് ആത്മീയ ടൂറിസത്തിനു വലിയ വാര്‍ത്തയാണിതൊണ് ് പ്രധാനമന്ത്രി നരേന്ദ്രമോദി ആശംസയറിച്ചു കൊണ്ട് ട്വീറ്റ് ചെയ്തിരിക്കുന്നത്.

വിമാനത്താവളത്തിനായി ഇപ്പോള്‍ തിരഞ്ഞെടുത്തിരിക്കുന്ന ചെറുവള്ളി എസ്റ്റേറ്റ് ഉള്‍പ്പെടെയുള്ള ഭൂമി വിമാനത്താവള നിര്‍മാണത്തിന് അനുയോജ്യമാണെന്ന അനുമതിയാണ് കഴിഞ്ഞ ദിവസം ലഭിച്ചത്. വിമാനത്താവളത്തെ സംബന്ധിച്ച് സുപ്രധാന അനുമതിയാണിത്. എന്നാല്‍ ചെറുവള്ളി എസ്റ്റേറ്റിന്റെ നിലവിലെ ഉടമകളെ സംബന്ധിച്ചുയരുന്ന സംശയം വിമാനത്താവളമെന്ന സ്വപ്നത്തെ കോടതിയിലെത്തിച്ചിരിക്കുകയാണ്.

ചെങ്കോട്ടു കോണം ആശ്രമത്തില്‍ നടന്നു കൊണ്ടിരിക്കുന്ന ഹിന്ദു മഹാ സമ്മേളനത്തിലെ പ്രഥമ ചടങ്ങുകളിലൊന്നായിരുന്നു ചെറുവള്ളി എസ്റ്റേറ്റിന്റെ ഭൂമിയുടെ ആധാര പൂജ. ചെറുവള്ളി എസ്റ്റേറ്റ് ഭൂമി ദേവസ്വം ബോര്‍ഡിന്റെ വകയായിരുന്നെന്ന് സൂചിപ്പിക്കുന്ന പ്രമാണങ്ങളാണ് കഴിഞ്ഞ ദിവസം അഡ്വ.കൃഷ്ണരാജ് പൂജിച്ചു വാങ്ങിയത്. ഭൂമി ദേവസ്വം ബോര്‍ഡിനുവേണ്ടി തിരിച്ചു പിടിക്കുന്നതിനുള്ള നിയമ പോരാട്ടവും അദ്ദേഹം തുടങ്ങി കഴിഞ്ഞു.

 പ്രധാനമന്ത്രി പോലും കാത്തിരിക്കുന്ന വികസന പദ്ധതിയ്ക്ക് എതിരായി ഹിന്ദു ഐക്യവേദി തന്നെ മുന്നിട്ടിറങ്ങിയിരിക്കുന്നുവെന്നതാണ് ശ്രദ്ധേയം.ബിജെപി യുടെ കഴിഞ്ഞ ലോക്‌സഭ തിരഞ്ഞെടുപ്പിലെ പ്രകടന പത്രിയകയിലും ശബരിമല വിമാനത്താവളം യാഥാര്‍ത്ഥ്യമാക്കുമെന്ന പ്രഖ്യാപനമുണ്ടായിരുന്നു. ആധാരങ്ങള്‍ ചെങ്കോട്ടു കോണം ആശ്രമത്തില്‍ നിന്ന് പൂജിച്ച് വാങ്ങിച്ച ശേഷം അഡ്വ.കൃഷ്ണരാജ് തന്റെ ഫെയ്‌സ് ബുക്ക് പോസ്റ്റില്‍ കുറിച്ചതിങ്ങനെയാണ്.

എരുമേലി വിമാനത്താവളം വേണോ?...അതോ വേണ്ടയോ?ഇതാണ് ഇപ്പോള്‍ ചൂടായി നില്‍ക്കുന്ന വിഷയം. അതിലൊന്നും അഭിപ്രായം പറയാന്‍ ഞാനില്ല.പക്ഷേ ഇന്ന് അനന്തപുരി ഹിന്ദു മഹാസമ്മേളനത്തിന്റെ ദീപ പ്രോജ്വലനം നടന്നപ്പോള്‍ ഒരു ചടങ്ങും കൂടി ചെങ്കോട്ടുകോണം ആശ്രമത്തില്‍ നടന്നു.എരുമേലി വിമാനത്താവളം നിര്‍മ്മിക്കാനുദ്ദേശിക്കുന്ന ചെറുവള്ളി എസ്റ്റേറ്റിന്റെ റവന്യു രേഖകള്‍ സ്വാമി സത്യാനന്ദ സരസ്വതിയുടെ സമാധിയില്‍ സമര്‍പ്പിച്ചു പൂജിച്ചു തിരികെ വാങ്ങി.യോഹന്നാന്റെ ചെറുവള്ളി എസ്റ്റേറ്റ് പശ്ചിമ ദേവസ്വം ചേനപ്പാടി ദേവസ്വം ചെറുവള്ളി ദേവസ്വം തിരുവല്ല ദേവസ്വം വക ഭൂമിയാണ് എന്നാണ് റവന്യു രേഖകള്‍ കാണിക്കുന്നത്.

സഖാക്കള്‍ ഭരിക്കുന്ന തിരുവിതാംകൂര്‍ ദേവസ്വം ബോര്‍ഡിന് ഈ വസ്തുക്കളില്‍ താല്പര്യം വരില്ല എന്നുള്ളത് സ്വാഭാവികം.
പക്ഷേ ഞങ്ങള്‍ ഭക്തര്‍ അങ്ങനെ വിടാന്‍ ഉദ്ദേശിച്ചിട്ടില്ല സഖാക്കളെ.2006ല്‍ സത്യാനന്ദ സരസ്വതി സ്വാമികള്‍ ചെറുവള്ളി എസ്റ്റേറ്റില്‍ ഉള്ള പഞ്ചതീര്‍ത്ഥ പരാശക്തി ദേവസ്ഥാനം സന്ദര്‍ശിച്ചപ്പോള്‍ പറഞ്ഞ വാക്കുകള്‍ ഇന്നും ചെവിയില്‍ മുഴങ്ങുന്നുണ്ട്. എടോ കള്ള പാതിരി യോഹന്നാനെ...തന്റെ തട്ടിപ്പിന്റെ ളോഹ ആള്‍ക്കാര്‍ വലിച്ചു കീറുന്ന കാലം വിദൂരമല്ല. 'അതുകൊണ്ട് തന്നെ സത്യാനന്ദ സരസ്വതി സ്വാമിജിയുടെ അനുവാദം വാങ്ങി എരുമേലി വിമാനത്താവളത്തിനെതിരായുള്ള നിയമ യുദ്ധം ഞങ്ങള്‍ ആരംഭിക്കുകയാണ്.

നിയമ യുദ്ധത്തിന് മുന്നോട്ട് വന്ന അനന്തപുരി ഹിന്ദു മഹാ സമ്മേളനത്തിന്റെ സംഘാടന സമ്മതിയായ ഹിന്ദു ധര്‍മ്മ പരിഷദിന് നന്ദി. എരുമേലിയില്‍ വിമാനത്താവളം വരുമോ? . എന്നാണ് അദ്ദേഹത്തിന്റെ കുറിപ്പ്. ഹിന്ദു ഐക്യവേദി സംയുക്തമായെടുത്ത തീരുമാനത്തിന്റെ ഭാഗമാണിതെന്ന് അനുമാനിക്കുന്നു. ചെറുവള്ളി എസ്റ്റേറ്റിന് മേല്‍ കാലങ്ങളായി ചേങ്കോട്ടുകോണം ആശ്രമം അവകാശവാദം ഉന്നയിച്ചിരുന്നെന്നതും ശ്രദ്ധേയമാണ്.

പുതിയൊരു വിമാനത്താവളം എതിര്‍ക്കപ്പെടേണ്ടതല്ല. എന്നാല്‍ കേരള സര്‍ക്കാറിന് അവകാശപെട്ട ഭൂമിയാണ് ചെറുവള്ളി എസ്റ്റേറ്റ്. ഹാരിസണ്‍ മലയാളത്തിന്റെ പാട്ടക്കാലാവധി കഴിഞ്ഞ 2500 ഏക്കര്‍ ഭൂമി  തിരികെ സര്‍ക്കാരിന് കൈമാറാതെ അവര്‍ അത് ബിലീവേഴ്‌സ് ചര്‍ച്ചിന് വിറ്റു. ബിലീവേഴ്‌സ് ചര്‍ച്ചില്‍ നിന്നും സര്‍ക്കാര്‍ വിമാനത്താവളത്തിന് വേണ്ടി ഇതേ ഭൂമി  കാശ് കൊടുത്ത് വാങ്ങുന്നു ! അതായത് സര്‍ക്കാര്‍ വക ഭൂമി സര്‍ക്കാര്‍ തന്നെ കാശ് കൊടുത്ത് വാങ്ങുന്ന വളരെ അപഹാസ്യമായ നടപടിയാണിത്. എത്രകോടി രൂപയുടെ അഴിമതിയാണ് പിണറായി വിജയന് ഈ ഡീലിന്റെ ഭാഗമായി ലഭിക്കുക എന്ന് അന്വേഷിക്കേണ്ടതാണ്?.  

മറ്റൊന്ന് ഈ ഭൂമിയില്‍ എരുമേലി ദേവസ്വത്തിന് അവകാശപെട്ട ഭൂമി ഉള്‍പ്പെട്ടിട്ടുള്ളതായ് മുന്‍ദേവസ്വം ബോര്‍ഡ് പ്രസിഡന്റ് തന്നെ വ്യക്തമാക്കിയിട്ടുമുണ്ട്. ദേവസ്വം ഭൂമി വിമാനത്താവളത്തിന് വേണ്ടി ഏറ്റെടുക്കാനാവില്ല. അതിന് നിയമപരമായ സാധുതയും  ലഭിക്കില്ല. ഇക്കാര്യത്തില്‍ നിയമോപദേശത്തിനനുസരിച്ച് ഹിന്ദു ഐക്യവേദി കോടതിയെ സമീപിക്കും എന്ന തരത്തിലുള്ള അഭിപ്രായങ്ങളും സോഷ്യല്‍ മീഡിയയില്‍ ഉയര്‍ത്തിയിരിക്കുകയാണ്.

ചെറുവള്ളി എസ്‌റ്റേറ്റ് സര്‍ക്കാര്‍ ഏറ്റെടുക്കാന്‍ തീരുമാനിച്ചതിന് പിന്നില്‍ യോഹന്നാന്‍ പാസ്റ്ററെ സഹായിക്കാനാണെന്നും ഇതില്‍ വന്‍ അഴിമതി സാധ്യതകളുണ്ടെന്നു നേരത്തെ ആരോപണം ഉയര്‍ന്നിരുന്നു.ശബരിമല വിമാനത്താവളത്തിന് ബിജെപിയും അനുകൂലമായിരുന്നു.എന്നാല്‍ ഹിന്ദു സംഘടനകള്‍ ഇപ്പോള്‍ വിമാനത്താവളത്തിനെതിരെ രംഗത്ത് വന്നിരിക്കുന്നതിന് പിന്നില്‍ വ്യക്തമായ രാഷ്ട്രീയം ഉണ്ടെന്നു തന്നെയാണ് കണക്കു കൂട്ടുന്നത്.