സംസ്ഥാന സർക്കാരിന്റെ രണ്ടാം വാർഷികാഘോഷങ്ങളുടെ ഭാഗമായി സംഘടിപ്പിക്കുന്ന എന്റെ കേരളം പ്രദർശന വിപണന മേള 28 മുതൽ മെയ് നാല് വരെ വാഴത്തോപ്പ് ഗവ. വൊക്കേഷണൽ ഹയർ സെക്കൻഡറി സ്കൂൾ ഗ്രൗണ്ടിൽ നടക്കും . ഇതോടനുബന്ധിച്ച ഒരുക്കങ്ങൾ വിലയിരുത്താൻ ജലവിഭവ വകുപ്പ് മന്ത്രി റോഷി അഗസ്റ്റിൻ മേള വേദി സന്ദർശിച്ചു .

പ്രവർത്തനങ്ങൾ മികച്ച രീതിയിലാണ് പുരോഗമിക്കുന്നതെന്ന് അദ്ദേഹം പറഞ്ഞു. സർക്കാർ നടപ്പാക്കുന്ന വികസന പ്രവർത്തനങ്ങളെക്കുറിച്ചും , സേവനങ്ങളെക്കുറിച്ചുമുള്ള അവബോധം ജനങ്ങളിലേക്ക് എത്തിക്കാൻ ഇത്തരം പ്രദർശന മേളകൾ സഹായിക്കും . സർക്കാർ സ്റ്റാളുകളും വാണിജ്യസ്റ്റാളുകളുമുൾപ്പടെ 150 ഓളം സ്റ്റാളുകൾ ജനങ്ങൾക്ക് സേവനം നല്കാൻ ഉണ്ടാകും.

കുടുംബശ്രീയുടെ നേതൃത്വത്തിൽ വിത്യസ്ത രുചിവിഭവങ്ങൾ അണിനിരത്തിയാകും ഭക്ഷ്യ മേള സംഘടിപ്പിക്കുക. അക്ഷയ , മോട്ടോർ വാഹന വകുപ്പ് തുടങ്ങി നിരവധി വകുപ്പുകളുടെ ഓൺലൈൻ സേവനം മേളയിൽ ലഭ്യമാക്കുമെന്നും മന്ത്രി പറഞ്ഞു.എല്ലാ ദിവസവും വൈകീട്ട് കലാ പരിപാടികൾ, വിവിധ വിഷയങ്ങളിൽ സെമിനിറുകൾ എന്നിവയും ഉണ്ടാകും.

ചൂട് വർധിച്ചു വരുന്ന സാഹചര്യത്തിൽ എയർ കണ്ടീഷൻ ചെയ്ത ഹാങ്ങറുകളിലാണ് മേള ഒരുക്കുക. വിവിധ വകുപ്പുകൾ ജില്ലയിൽ നടപ്പാക്കിയ പദ്ധതികളും വികസന പ്രവർത്തനങ്ങളും പ്രതിഫലിക്കുന്ന രീതിയിലാണ് സ്റ്റാളുകൾ തയ്യാറാക്കുന്നതെന്നും മന്ത്രി പറഞ്ഞു. ജർമ്മൻ ഹാങ്ങർ സംവിധാനത്തിlലാണ് സ്‌കൂളിലെ 2 ഗ്രൗണ്ടുകളിലായി മേള ഒരുങ്ങുന്നത് . പവലിയനുകൾ സന്ദർശിച്ച ശേഷം മന്ത്രിയുടെ അധ്യക്ഷതയിൽ സംഘാടക സമിതി അംഗങ്ങൾ വാഴത്തോപ്പ് ഗവ. സ്കൂളിൽ യോഗം ചേർന്ന് തുടർ പ്രവർത്തനങ്ങൾ വിലയിരുത്തി.

ജില്ലാ കളക്ടർ ഷീബാ ജോർജ്ജ്, ഇൻഫർമേഷൻ വകുപ്പ് കോട്ടയം മേഖല ഡെപ്യൂട്ടി ഡയറക്ടർ പ്രമോദ് കുമാർ, ജില്ലാ ഇൻഫർമേഷൻ ഓഫീസർ വിനോദ് ജി എസ്, ജില്ലാ ആസുത്രണ സമിതി ഉപാധ്യക്ഷൻ സി.വി വർഗീസ്,, ബ്ലോക്ക്‌ പഞ്ചായത്ത്‌ അംഗം ഡിറ്റാജ് ജോസഫ്‌, ഗ്രാമപഞ്ചായത്ത്‌ അംഗം സിജി ചാക്കോ, വിവിധ രാഷ്ട്രീയ കക്ഷി നേതാക്കളായ ഷാജി കാഞ്ഞമല, അനിൽ കൂവപ്ലാക്കൽ, റോമിയോ സെബാസ്റ്റ്യൻ മറ്റ് സംഘാടക സമിതി അംഗങ്ങൾ എന്നിവർ മന്ത്രിക്കൊപ്പം ഉണ്ടായിരുന്നു.