പതിനാലുകാരിക്ക് നേരെ അദ്ധ്യാപകന്റെ ലൈംഗിക അതിക്രമ കേസില്‍ പ്രതിക്ക് 33 വര്‍ഷം കഠിനതടവിനും 60, 000 രൂപ പിഴ ശിക്ഷ വിധിച്ച് കോടതി. പതിനാലുകാരിയെ ട്യൂഷന്‍ അദ്ധ്യാപകന്‍ ലൈംഗിക അതിക്രമം നടത്തുകയും ഭീഷണിപ്പെടുത്തി ലൈംഗിക ബന്ധത്തിന് പ്രേരിപ്പിക്കുകയും ചെയ്തതാണ് കേസ്. പുത്തന്‍തോപ്പ് സ്വദേശി സെബാസ്റ്റ്യന്‍ ഷൈജുവിനെയാണ് (33) കുറ്റക്കാരനാണെന്ന് കണ്ടെത്തി കോടതി ശിക്ഷിച്ചത്.

കേസിന്റെ വിചാരണ സമയത്ത് പെണ്‍കുട്ടി മരണപ്പെട്ടിരുന്നു. കഠിനംകുളം പൊലീസ് സ്‌റ്റേഷനില്‍ രജിസ്റ്റര്‍ ചെയ്ത കേസ് അന്വേഷണം നടത്തി കുറ്റപത്രം സമര്‍പ്പിച്ചത് കടയ്ക്കാവൂര്‍ സി.ഐ ആയിരുന്ന ജിബി മുകേഷ് ആണ്. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ എം. മുഹസിന്‍ ഹാജരായി.

ട്യൂഷന്‍ സമയത്തെ പീഡനം പുറത്തു പറയുമെന്ന് ഭീഷണിപ്പെടുത്തി വീഡിയോ ചാറ്റ് ചെയ്യുകയും ഇതിന്റെ സ്‌ക്രീന്‍ ഷോട്ട് എടുത്ത് സൂക്ഷിച്ച് ഫോട്ടോ പ്രചരിപ്പിക്കുമെന്ന് പറഞ്ഞ് ലൈംഗിക ബന്ധത്തിന് പ്രേരിപ്പിച്ചുവെന്നുമാണ് പ്രതിക്കെതിരെയുള്ള കുറ്റം.
സ്ത്രീകള്‍ക്കും കുട്ടികള്‍ക്കും എതിരെയുള്ള ലൈംഗിക അതിക്രമ കുറ്റകൃത്യങ്ങള്‍ വിചാരണ ചെയ്യുന്ന ആറ്റിങ്ങല്‍ ഫാസ്റ്റ് ട്രാക്ക് സ്‌പെഷ്യല്‍ കോടതി ഡിസ്ട്രിക്ട് ജഡ്ജി ടി,പി. പ്രഭാഷ് ലാല്‍ ആണ് ശിക്ഷ വിധിച്ചത്.

2014ല്‍ ആണ് കേസിനാസ്പദമായ സംഭവം. പ്രതി ട്യൂഷന്‍ എടുത്ത വീട്ടില്‍ വച്ചായിരുന്നു പെണ്‍കുട്ടിയോട് ലൈംഗിക അതിക്രമം കാണിച്ചത്. തുടര്‍ന്ന് പെണ്‍കുട്ടിയെ ഭീഷണിപ്പെടുത്തി തുടര്‍ച്ചയായി ലൈംഗിക അതിക്രമത്തിന് വിധേയയാക്കുകയും ചെയ്തു. തുടര്‍ന്ന് ഇക്കാര്യങ്ങള്‍ പുറത്തറിയിക്കുമെന്ന് ഭീഷണിപ്പെടുത്തി വീഡിയോ ചാറ്റ് ചെയ്ത് ദൃശ്യങ്ങള്‍ പകര്‍ത്തി സൂക്ഷിച്ചു. തുടര്‍ന്നും ഭീഷണിപ്പെടുത്തിയെങ്കിലും പെണ്‍കുട്ടി വഴങ്ങിയില്ല. പിന്നീട് പെണ്‍കുട്ടിയുടെ പേരില്‍ വ്യാജ ഫേസ്ബുക്ക് അക്കൗണ്ട് ഉണ്ടാക്കി 2017ലെ ക്രിസ്മസ് ദിവസം ചിത്രങ്ങള്‍ പെണ്‍കുട്ടിക്ക് അയച്ചു കൊടുക്കുകയും പ്രചരിപ്പിക്കുമെന്ന് ഭീഷണിപ്പെടുത്തുകയും പ്രതി ചെയ്തിരുന്നു.