കര്‍ണാടകയിലെ തോല്‍വിയില്‍ കേരള ബിജെപിയില്‍ കൂട്ടയടി. പോരും ട്രോളും കൊണ്ട് ബിജെപിക്കാര്‍ കൊമ്പുകോര്‍ക്കുന്നു. നാണക്കേട് ഉണ്ടാക്കരുതെന്ന് ബിജെപി കേന്ദ്ര നേതൃത്വം. ദേശീയ സംഘടനാ ജനറല്‍ സെക്രട്ടറി ബി.എല്‍.സന്തോഷിനെ തോല്‍വിയുടെ കാരണക്കാരനായി അവതരിപ്പിച്ചാണ് വ്യാപക പ്രചാരണം നടക്കുന്നത്. സന്തോഷിനെ വിമര്‍ശിക്കുന്നവര്‍ കേരളത്തില്‍ ഉന്നംവയ്ക്കുന്നത് കെ.സുരേന്ദ്രനെയാണ്.
പ്രതിരോധമെന്നനിലയില്‍ സന്തോഷിനെ അനുകൂലിച്ചും സാമൂഹിക മാധ്യമ പ്രചാരണം നടക്കുന്നുണ്ട്. കര്‍ണാടക തോല്‍വി തന്നെ കനത്ത അടിയാണ് ബിജെപിക്ക് അതിന്റെ കൂടെ നേതാക്കളുടെ തമ്മിലടി വലിയ നാണക്കേട് ഉണ്ടാക്കുന്നു.

തലമുറമാറ്റം എന്നപേരില്‍ യെദ്യൂരപ്പ അടക്കമുള്ള മുതിര്‍ന്ന നേതാക്കളെ തഴഞ്ഞതിനു പിന്നില്‍ ബി.എല്‍.സന്തോഷ് ആണെന്ന് ദേശീയതലത്തില്‍ സംഘപരിവാര്‍ കേന്ദ്രങ്ങളില്‍ വ്യാപക പ്രചാരണം നടന്നിരുന്നു. സന്തോഷിനെ വിമര്‍ശിക്കുന്നവര്‍ കേരളത്തില്‍ ഉന്നംവയ്ക്കുന്നത് കെ.സുരേന്ദ്രനെയാണ്. കുമ്മനം രാജശേഖരനും പി.എസ്.ശ്രീധരന്‍ പിള്ളയ്ക്കും ശേഷം സുരേന്ദ്രനെ സംസ്ഥാന പ്രസിഡന്റാക്കിയത് ബി.എല്‍.സന്തോഷിന്റെ പ്രത്യേക താത്പര്യപ്രകാരമായിരുന്നു. അന്ന് എതിര്‍വാദങ്ങളൊന്നും സന്തോഷ് പരിഗണിച്ചതേയില്ല. നിയമസഭാ തിരഞ്ഞെടുപ്പ് തോല്‍വിക്കുശേഷം സുരേന്ദ്രനെ മാറ്റണമെന്ന ആവശ്യം ഉയര്‍ന്നപ്പോഴും സന്തോഷ് സുരേന്ദ്രനൊപ്പം നിലയുറപ്പിച്ചു. ഇപ്പോള്‍ ബി.എല്‍.സന്തോഷിനെ പരിഹസിച്ചും വില്ലനാക്കിയും ട്രോളുകളും മറ്റും പ്രചരിപ്പിക്കുന്നതിനു പിന്നില്‍ സുരേന്ദ്രന്‍ വിരുദ്ധരാണ്.

ആര്‍.എസ്.എസിന്റെയും ബി.ജെ.പി.യുടെയും പ്രാദേശികതലങ്ങളിലെ ചില പ്രവര്‍ത്തകരാണ് ഇക്കാര്യത്തില്‍ മുമ്പിലുള്ളത്. മോദിയെ പിന്നില്‍ നിന്നു കുത്തുന്ന 'കട്ടപ്പ'യായി സന്തോഷിനെ ചിത്രീകരിക്കുന്ന ട്രോളുകളും സംഘപരിവാര്‍ വാട്‌സാപ്പ് ഗ്രൂപ്പുകളില്‍ പ്രചരിക്കുന്നുണ്ട്. എന്നാല്‍ കൃഷ്ണദാസ് പക്ഷത്തെ മുതിര്‍ന്ന നേതാക്കളൊന്നും ഇക്കാര്യത്തില്‍ ഒരക്ഷരം പറഞ്ഞിട്ടില്ല. തലമുറമാറ്റം എന്നപേരില്‍ സമീപകാലത്ത് നേതൃനിരയില്‍ നിന്ന് ഒഴിവാക്കപ്പെട്ട പഴയനേതാക്കളും അവരുടെ അഭ്യുദയകാംക്ഷികളും കര്‍ണാടക തോല്‍വി പാഠമാക്കണമെന്നാവശ്യപ്പെട്ട് രംഗത്തുണ്ട്. പ്രതിരോധമെന്നനിലയില്‍ സന്തോഷിനെ അനുകൂലിച്ചും സാമൂഹിക മാധ്യമ പ്രചാരണം നടക്കുന്നുണ്ട്. 'കര്‍ണാടകയിലെ ആദ്യത്തെ ബി.ജെ.പി. സര്‍ക്കാര്‍ രൂപവത്കരിക്കുന്നതു മുതല്‍ ലോക്‌സഭയിലെ വന്‍വിജയമടക്കം ബി.ജെ.പി.യുടെ എല്ലാ വിജയങ്ങളും ബി.എല്‍.സന്തോഷ് സംഘടനാ സെക്രട്ടറി ആയിരുന്ന കാലത്തുതന്നെയാണ് നടന്നിട്ടുള്ളതെന്നാണ് ഇവരുടെ വാദം.

തമ്മിലടി രൂക്ഷമായ് കഴിഞ്ഞു സൈബര്‍ വാളുകളില്‍ ട്രോളുകളും വന്നതോടെ ബിജെപി നേതൃത്വം കൂടുതല്‍ പ്രതിരോധത്തിലേക്ക്. കര്‍ണാടക തോല്‍വിയില്‍ ബിജെപി നേതാക്കളാരും തന്നെ വലിയ രീതിയില്‍ പ്രതികരിച്ചിരുന്നില്ല. വിജയം നേടിയ കോണ്‍ഗ്രസ്സിന് പ്രധാനമന്ത്രി ആശംസകള്‍ അറിയിച്ചിരുന്നു. അമിത് ഷാ ഉള്‍പ്പെടെ തോല്‍വിയുടെ കാര്യങ്ങളൊന്നും വിശദീകരിച്ചിട്ടില്ല. എന്നാല്‍ ഇതിനിടയിലാണ് കേരള ബിജെപി കൂട്ടയടി നടത്തുന്നത്. ഇത് കനത്ത നാണക്കേടാണ് ഉണ്ടാക്കുന്നത്. നേതാക്കള്‍ക്കിടയിലെ പോരില്‍ അതൃപ്തി രേഖപ്പെടുത്തിയിരിക്കുകയാണ് കേന്ദ്ര നേതാക്കള്‍. അല്ലെങ്കില്‍ തന്നെ കേരള ബിജെപിയില്‍ കൂട്ടയടി ആണ്. പല പക്ഷങ്ങളായ് തിരിഞ്ഞാണ് തമ്മിലടി. സുരേന്ദ്ര പക്ഷം ശോഭ പക്ഷം കൃഷ്ണദാസ് പക്ഷം ഇങ്ങനെ പല ഗ്രൂപ്പുകളാണ്. ഈ തമ്മിലടി തന്നെയാണ് ഉണ്ടായിരുന്ന ഒരു സീറ്റ് പോലും കൈവിട്ട് പോകാന്‍ കാരണം. പൂജ്യേപ്പി ആയി നിന്നാലും കുത്തിത്തിരുപ്പിനും കാലുവാരലിനും ഒരു കുറവുമില്ല. കിട്ടുന്ന അവസരത്തിലൊക്കെ അത് കൃത്യമായ് നടക്കുന്നുണ്ട്.