നിരവധി ക്രിമിനല്‍ കേസുകളിലെ പ്രതിയായ യുവാവ് മയക്കുമരുന്നുമായി കായംകുളത്ത് പിടിയില്‍ . സിന്തറ്റിക് ഡ്രഗ്ഗ് ഇനത്തില്‍പ്പെട്ട മയക്കുമരുന്നായ 84 ഗ്രാം എംഡിഎംഎയുമായി വള്ളികുന്നം കടുവിനാല്‍ മാലവിള വടക്കേതില്‍ വീട്ടില്‍ സഞ്ചു (32) യാണ് അറസ്റ്റിലായത്.

എംഡിഎംഎയുമായി കര്‍ണ്ണാടകയില്‍ നിന്നും ബസില്‍ കായംകുളം കെ എസ് ആര്‍ ടിസി സ്റ്റാന്‍ഡിന് അടുത്ത് കമലാലയം ജാഗ്ഷനിലാണ് ആദ്യം സഞ്ചു എത്തിയത്. അവിടെ നിന്ന് വള്ളികുന്നത്തേയ്ക്ക് വണ്ടിക്കായി കാത്തു നില്‍ക്കവേയാണ് പൊലീസെത്തി ഇയാളെ പിടികൂടിയത്.

അതേസമയം, ഇയാള്‍ നിരവധി ക്രിമിനല്‍ കേസുകളിലും പ്രതിയാണ്. നിലവില്‍ മയക്കുമരുന്ന് കേസുകളുമുണ്ട്. വള്ളികുന്നം ഭാഗത്ത് ചെറുപ്പക്കാര്‍ക്കും കുട്ടികള്‍ക്കും മയക്കുമരുന്ന് എത്തിച്ചു കൊടുക്കുന്നത് ഇയാളാണ്. ഇയാളുടെ ഭാര്യയും മയക്കുമരുന്ന് കച്ചവടത്തില്‍ പ്രധാനിയാണെന്ന് പൊലീസിന് സൂചനകളുണ്ട്. അതേസമയം, വീട്ടില്‍ നിന്ന് ധാരാളം ചെറുപ്പക്കാര്‍ മയക്കുമരുന്ന് വാങ്ങാറുണ്ടെന്നും, പൊലീസ് വീട്ടില്‍ തിരച്ചില്‍ നടത്തിയാല്‍ ഒന്നും കണ്ടെത്താന്‍ സാധിക്കാറില്ലെന്നും ആരോപണവും ഉയരുന്നുണ്ട്.

ബെംഗളൂരുവില്‍ നിന്ന് നേരിട്ട് വാങ്ങി കായംകുളം, വള്ളികുന്നം, നൂറനാട് മേഖലകളില്‍ വില്‍ക്കാന്‍ കൊണ്ടുവന്നതാണെന്നും ഗ്രാമിന് മുവായിരം മുതല്‍ അയ്യായ്യിരം രൂപയ്ക്ക് വരെയാണ് വില്‍ക്കുന്നതെന്നും പ്രതി പോലീസിനോട് പറഞ്ഞു. ഇയാള്‍ വിയ്യൂര്‍ സെന്‍ട്രല്‍ ജയിലില്‍ നിന്ന് കാപ്പാ ശിക്ഷ കഴിഞ്ഞ് ഇറങ്ങിയിട്ട് കഴിഞ്ഞ മാസം രണ്ടു മൂന്നു തവണ ബാംഗ്‌ളൂരില്‍ പോയി എംഡിഎംഎ നാട്ടിലെത്തിച്ച് വില്‍പ്പന നടത്തി വരികയായിരുന്നു.

കഴിഞ്ഞ ദിവസം എംഡിഎംഎയുമായി പിടിയിലായവരില്‍ നിന്നും ലഭിച്ച വിവരമാണ് ഇയാളെ പിടികൂടാന്‍ പോലീസിന് സഹായകമായത്. കഴിഞ്ഞ ഒരു മാസമായി ജില്ലാ ആന്റി നര്‍ക്കോട്ടിക് ടീം ഇയാളെ നിരിക്ഷിച്ചു വരികവേയാണ് പിടിയിലാകുന്നത്,