അറസ്റ്റ് ഭയന്ന് സുധാകരന്... മുഖ്യമന്ത്രിയേയും മന്ത്രിമാരേയും വെല്ലുവിളിക്കാനിറങ്ങിയ പ്രതിപക്ഷ നേതാവിനും കോണ്ഗ്രസ് പ്രസിഡന്റിനും പ്രതിരോധം തീര്ക്കാനാകുന്നില്ല; കെ സുധാകരന് പറയുന്നതെല്ലാം കളവെന്ന് പരാതിക്കാരന്; പണം കൈപ്പറ്റിയിട്ടുണ്ടെന്ന് ഷെമീര്
സര്ക്കാരിനെതിരെ പോരിനിറങ്ങിയ പ്രതിപക്ഷ നേതാവും കോണ്ഗ്രസ് പ്രസിഡന്റും ഇപ്പോള് സ്വയം പ്രതിരോധത്തിലാണ്. പരാതിക്കാരനായ ഷെമീര് ഉറച്ച് നിന്നതോടെ സുധാകരന് വലിയ വെല്ലുവിളിയായി. മോന്സന് മാവുങ്കല് ഉള്പ്പെട്ട തട്ടിപ്പ് കേസില് കെപിസിസി പ്രസിഡന്റ് കെ സുധാകരനെതിരെ പരാതിക്കാരന് ഷെമീര് രംഗത്തെത്തി. സുധാകരന് മോന്സനില് നിന്നും പണം വാങ്ങിയിട്ടുണ്ടെന്ന് അദ്ദേഹം പറഞ്ഞു.
പണം നല്കിയ അനൂപുമായി കെ സുധാകരന് കൂടിക്കാഴ്ച നടത്തിയിട്ടുണ്ട്. കെപിസിസി പ്രസിഡന്റായ കെ സുധാകരന് ഇപ്പോള് പറയുന്നതെല്ലാം കളവാണെന്നും അദ്ദേഹം പറഞ്ഞു. മോന്സന് മാവുങ്കല് 25 ലക്ഷം കൈപ്പറ്റി, അതില് നിന്ന് കെ സുധാകരന് പത്ത് ലക്ഷം വാങ്ങിയെന്നുമാണ് രഹസ്യമൊഴിയെന്ന് അദ്ദേഹം പറഞ്ഞു. എന്നാല് കെ സുധാകരനെതിരെ യാതൊരു നടപടിയും എടുക്കാന് ക്രൈം ബ്രാഞ്ച് തയ്യാറായിരുന്നില്ല. ഇത്തരത്തിലുള്ള ഇടപാടുകാരില് നിന്നും തട്ടിപ്പുകാരില് നിന്നുമാണല്ലോ ഈ പണം പോകുന്നത്.
കേരള ഹൈക്കോടതി ഇടപെടലും എന്ഫോഴ്സെന്റ് സംഘത്തിന് വ്യകതമായ തെളിവ് കിട്ടിയതുമാണ് ക്രൈം ബ്രാഞ്ച് അന്വേഷണ സംഘം നിലപാട് മാറ്റാന് കാരണമെന്നും അദ്ദേഹം പറഞ്ഞു. കേരളാ പൊലീസ് ഐപിഎസ് ഉദ്യോഗസ്ഥരെ പ്രതിചേര്ത്തത് സ്വാഗതം ചെയ്യുന്നു. കൂടുതല് പേര്ക്ക് മോന്സന് പണം കൈമാറിയതിന്റെ രേഖ ക്രൈം ബ്രാഞ്ചിന് കൈമാറി.
മുന് ഡിഐജി സുരേന്ദ്രന്റെ ഭാര്യക്കും സിഐ അനന്ത ലാലിനും പണം നല്കിയിട്ടുണ്ട്. ഇതേക്കുറിച്ച് അന്വേഷണം വേണമെന്നും അദ്ദേഹം പറഞ്ഞു. കേസില് സിബിഐ അന്വേഷണം ആവശ്യപ്പെട്ടുള്ള ഹര്ജി ഈ മാസം 15 ന് കേരള ഹൈക്കോടതി പരിഗണിക്കും. ക്രൈം ബ്രാഞ്ച് നിലപാട് അനുസരിച്ചായിരിക്കും തങ്ങളുടെ സമീപനമെന്നും അദ്ദേഹം വ്യക്തമാക്കി.
അതേസമയം സംസ്ഥാന സര്ക്കാരിനും കേരള പൊലീസിനുമെതിരെ രൂക്ഷ വിമര്ശനവുമായി പ്രതിപക്ഷ നേതാവ് വിഡി സതീശന് രംഗത്തെത്തി. പൊലീസിന്റെ വിശ്വാസ്യത ഇത്രമാത്രം തകര്ന്നൊരു കാലമുണ്ടായിട്ടില്ല. യഥാര്ത്ഥ കുറ്റവാളികള്ക്ക് പൊലീസ് കുടപിടിച്ച് കൊടുക്കുകയാണ്. പ്രതികളെല്ലാം നടുറോഡില് കയ്യും വീശി നടക്കുമ്പോള് കൈകാലുകളില് കൂച്ചുവിലങ്ങിട്ട് ലോക്കപ്പിലാണ് കേരള പൊലീസ്. മുഖ്യമന്ത്രിയുടെ ഒഫീസില് നിന്നും സിപിഎം നേതാക്കളില് നിന്നും തിട്ടൂരം വാങ്ങി ജോലി ചെയ്യുന്നവരായി കേരള പൊലീസ് അധഃപതിച്ചുവെന്ന് പ്രതിപക്ഷ നേതാവ് ആരോപിച്ചു.
ഏഴു വര്ഷങ്ങള്ക്കു മുമ്പ് ക്രമസമാധാന പാലനത്തിലും കാര്യക്ഷമതയിലും ലോകത്തിനു മാതൃകയായിരുന്നു കേരള പൊലീസ്. എന്നാല് ഇന്ന് പോലീസ് സേന അടിമുടി അടിമവത്ക്കരിക്കപ്പെട്ടു. കേരള ചരിത്രത്തിലെ ഏറ്റവും മോശം ആഭ്യന്തര മന്ത്രി ആരെന്ന് ചോദിച്ചാല്, സിപിഎമ്മുകാര്ക്ക് പോലും രണ്ടാമതൊന്ന് ആലോചിക്കേണ്ടി വരില്ല. വഴിവക്കില് നില്ക്കുന്നവന്റെ മുഖത്തടിക്കുന്നത് മുതല് ജനപ്രതിനിധികള്ക്കെതിരെ കള്ളക്കേസെടുക്കുന്നതു വരെ നീളുന്നു പൊലീസിന്റെ പരാക്രമങ്ങള്. നിയമപാലകന് ക്രിമിനലും ക്രിമിനലുകളുടെ സുഹൃത്തും സംരക്ഷകനും ആകുന്നതിനെ എന്തു പേരിട്ടാണ് വിളിക്കേണ്ടത്? പൊലീസ്-ഗുണ്ടാ ബന്ധം എന്ന പ്രയോഗം മലയാളിക്കിപ്പോള് അരി - പയര് എന്നൊക്കെ പറയും പോലെ സുപരിചിതമായിരിക്കുന്നു- സതീശന് ആരോപിച്ചു.
അതേസമയം മോന്സന് മാവുങ്കല് കേസില് പ്രതിയായ കെപിസിസി പ്രസിഡന്റ് കെ സുധാകരന് ഇന്ന് അന്വേഷണ സംഘത്തിന് മുന്നില് ഹാജരാകില്ല. കേസിനെ നിയമപരമായി നേരിടുമെന്ന് സുധാകരന് അറിയിച്ചു. അതേസമയം, മുഖ്യമന്ത്രിയുടെ പി എസ് വരെ ഇടപെട്ട കേസാണിതെന്നും കെ സുധാകരന് ബന്ധമില്ലെന്നും മോന്സന് മാവുങ്കല് പറഞ്ഞു.
കൊച്ചിയിലെ ക്രൈംബ്രാഞ്ച് ഓഫീസില് നാളെ ഹാജരായാല് അറസ്റ്റ് ഉണ്ടാകുമെന്നുറപ്പായതോടെ കെ സുധാകരന് നിയമവഴിയിലേക്ക് നീങ്ങുകയാണ്. മോന്സന് മാവങ്കലിനായി വിദേശത്ത് നിന്നെത്തിയ ശതകോടികള് കേന്ദ്ര സര്ക്കാരില് നിന്ന് വിട്ടുകിട്ടാന് പത്ത് ലക്ഷം വാങ്ങിയെന്ന പരാതിക്കാരുടെ ആരോപണത്തിന് ശക്തമായ തെളിവുണ്ടെന്നാണ് ക്രൈംബ്രാഞ്ചിന്റെ നിലപാട്.
"
https://www.facebook.com/Malayalivartha
