കരുവന്നൂര്‍ ബാങ്ക് തട്ടിപ്പ് പാര്‍ട്ടി നേതൃത്വത്തിന്റെ അറിവോടെ. തട്ടിപ്പ് സംബന്ധിച്ച് ബാങ്ക് ജീവനക്കാര്‍ മുഖ്യമന്ത്രിയ്ക്ക് നേരിട്ട് കത്തയച്ചു. എന്നാല്‍ രണ്ട് തവണ അയച്ച കത്തുകളും മുഖ്യമന്ത്രി അവഗണിച്ചു. സിപിഎം കൊള്ളയ്ക്ക് കണ്ണടച്ച് കൊടുത്തു മുഖ്യമന്ത്രി. ഇതോടെ മുഖ്യമന്ത്രിയ്ക്കെതിരെ രോഷം അണപൊട്ടുന്നു. കുറ്റക്കാര്‍ക്കെതിരെ അന്നേ നടപടി എടുത്തിരുന്നുവെങ്കില്‍ മുഖ്യമന്ത്രിയ്ക്ക് ഇപ്പോള്‍ ഇങ്ങനെ നാറേണ്ടി വരില്ലായിരുന്നു. കരുവന്നൂരില്‍ പാര്‍ട്ടി ഒത്താശയോടെ നടന്ന കോടികളുടെ തട്ടിപ്പാണ്.

കരുവന്നൂര്‍ സഹകരണ ബാങ്കില്‍ കാലങ്ങളായി നടന്ന തട്ടിപ്പ് സി.പി.എം. ജില്ലാനേതൃത്വത്തിന്റെ അറിവോടെയാണെന്ന് കാണിച്ച് ബാങ്കിന്റെ ഭരണസമിതിയംഗങ്ങള്‍ മുഖ്യമന്ത്രിക്ക് രണ്ടുതവണ പരാതി അയച്ചെങ്കിലും പരിഗണിച്ചില്ല. 2021 നവംബര്‍ രണ്ട്, 2022 ഒക്ടോബര്‍ 28 തീയതികളിലാണ് മുഖ്യമന്ത്രിക്ക് പരാതി അയച്ചത്. 2022ല്‍ അയച്ച തെളിവുസഹിതമുള്ള പരാതി സി.പി.എം. സംസ്ഥാന സെക്രട്ടറി എം.വി. ഗോവിന്ദന്‍, സി.പി.െഎ. സംസ്ഥാന സെക്രട്ടറി കാനം രാജേന്ദ്രന്‍ എന്നിവര്‍ക്കും നല്‍കി. ആരും പരാതി പരിഗണിച്ചില്ല.

2019ലെ ഓഡിറ്റ് റിപ്പോര്‍ട്ട് കിട്ടിയ ഉടന്‍തന്നെ ഭരണസമിതിക്ക് തട്ടിപ്പ് ബോധ്യമാകുകയും സി.പി.എം. ജില്ലാനേതൃത്വത്തിന് വിവരം രേഖാമൂലം കൈമാറുകയും ചെയ്തതാണ്. ക്രമക്കേടില്‍ പാര്‍ട്ടിതലത്തിലും സഹകരണതലത്തിലും അന്വേഷണം നടത്തി. ബാങ്കില്‍ വന്‍ തട്ടിപ്പ് നടക്കുന്നതായി കണ്ടെത്തി. 2021 ജൂണ്‍ 22ന് സി.പി.എം. ജില്ലാ കമ്മിറ്റി ഓഫീസില്‍ കരുവന്നൂര്‍ ബാങ്കിന്റെ പാര്‍ട്ടി സബ് കമ്മിറ്റി യോഗം വിളിച്ചു. ബാങ്കിലെ ജീവനക്കാരും ഇടനിലക്കാരുമായ ആറുപേരെ പുറത്താക്കാനും ക്രിമിനല്‍നടപടി സ്വീകരിക്കാനും സി.പി.എം. ജില്ലാ സെക്രട്ടറിയും രണ്ട് സംസ്ഥാനസമിതി അംഗങ്ങളും പങ്കെടുത്ത യോഗത്തില്‍ തീരുമാനിച്ചു.

എന്നാല്‍, ഇരിങ്ങാലക്കുട ഏരിയാ കമ്മിറ്റി ഈ തീരുമാനം മനഃപൂര്‍വം വൈകിച്ചു. ഇതു മനസ്സിലാക്കി ബാങ്കിന്റെ ഭരണസമിതിയംഗങ്ങള്‍ ജൂലായ് 12ന് ഇരിങ്ങാലക്കുട പോലീസില്‍ പരാതി നല്‍കി. എന്നാല്‍, പിറ്റേന്നുതന്നെ ഇരിങ്ങാലക്കുട ഏരിയാ സെക്രട്ടറി ബാങ്കിന്റെ പ്രസിഡന്റിനെ വിളിച്ച് പരാതി പിന്‍വലിപ്പിച്ചു. അതിന്റെ പിറ്റേന്ന് ബാങ്കിന്റെ സെക്രട്ടറി ഇന്‍ ചാര്‍ജിനെ ഉപയോഗിച്ച് കേസ് നല്‍കി. ഈ കേസില്‍ ഭരണസമിതിയംഗങ്ങള്‍ പ്രതിയാക്കപ്പെട്ടെന്നും 2022 ഒക്ടോബര്‍ 28ന് മുഖ്യമന്ത്രിക്ക് അയച്ച പരാതിയിലുണ്ട്. ഈ പരാതി മുഖ്യമന്ത്രി പരിഗണിച്ചില്ല. പാര്‍ട്ടി നേതൃത്വത്തിന്റെ പിന്തുണയോടെ ബാങ്ക് സെക്രട്ടറിയും ഏതാനും ജീവനക്കാരും ബിനാമികളും നടത്തിയ സാമ്പത്തികക്കൊള്ളയാണ് കരുവന്നൂര്‍ ബാങ്കില്‍ നടന്നതെന്നും മുഖ്യമന്ത്രിക്കും പാര്‍ട്ടി സെക്രട്ടറിക്കും നല്‍കിയ പരാതിയിലുണ്ട്.

ഒന്നും രണ്ടുമല്ല 300 കോടിയുടെ തട്ടിപ്പാണ് കരുവന്നൂരില്‍ നടന്നത്. അതേക്കുറിച്ചുള്ള വിവരം കിട്ടിയിട്ടും കണ്ണടച്ചിരുന്ന ഒരു മുഖ്യമന്ത്രി. പാവപ്പെട്ടവന്റെ പാര്‍ട്ടി ആ പാവപ്പെട്ടവരുടെ പിച്ചച്ചട്ടിയില്‍ കൈയ്യിട്ടുവാരി. ബാങ്കില്‍ പണം നിക്ഷേപിച്ചവര്‍ അലമുറയിട്ട് കരയുകയാണ്. സ്വന്തം പണം കൊണ്ട് നിക്ഷേപിച്ചിട്ട് ബാങ്കിന് മുന്നില്‍ കൈനീട്ടേണ്ട ഗതികേട്. മുന്‍ മന്ത്രി എസി മൊയ്തീന്റെ വീട്ടില്‍ വരെ ഇഡി കയറി ഇറങ്ങിയതോടെ തട്ടിപ്പ് വിവരത്തിന്റെ കത്ത് മുഖ്യന്‍ മുക്കിയതിന്റെ വഴി മനസ്സിലാകുന്നത്. പാവങ്ങളെ പച്ചയ്ക്ക് വഞ്ചിച്ച് തിന്നാല്‍ ദഹിക്കില്ല.