തിരുവനന്തപുരം : ഫയർമാൻ അഡ്വൈസ് മെമ്മോ ലഭിച്ചവർക്ക് പോലീസ് വേരിഫിക്കേഷൻ റിപ്പോർട്ട് വൈകിപ്പിച്ച് നിയമന ഉത്തരവ് നൽകാത്തത് ഉദ്യോഗാർത്ഥികളോടുള്ള സർക്കാരിന്റെ അരാജകത്വ സമീപനം കൊണ്ടാണെന്ന് ആർ വൈ എഫ് സംസ്ഥാന പ്രസിഡന്റ് ഉല്ലാസ് കോവൂരും സെക്രട്ടറി വിഷ്ണു മോഹനും കുറ്റപ്പെടുത്തി.

ഉദ്യോഗാർത്ഥികൾക്ക് ലഭിച്ച അഡ്വൈസ് മെമ്മോയുടെ കാലവധി തീരാൻ ദിവസങ്ങൾ മാത്രം ശേഷിക്കെ പോലീസ് വേരിഫിക്കേഷൻ എന്ന സാങ്കേതികത്വത്തിന്റെ പേരിൽ നിയമനം നിഷേധിക്കുന്നത് അന്യായമാണ്. നിയമന ഉത്തരവ് ലഭിച്ചെങ്കിൽ മാത്രമേ നിയമനം വേണ്ടാത്തവരുടെ ഒഴിവുകൾ (എൻ ജെ ഡി ) റിപ്പോർട്ട് ചെയ്യാനും റാങ്ക് ലിസ്റ്റിൽ ഉൾപ്പെട്ട മറ്റു ഉദ്യോഗ്യാർത്ഥികൾക്ക് അഡ്വൈസ് മെമ്മോ അയക്കാൻ സാധിക്കുകയുള്ളു.

ആറ് റീജണുകളായി നടക്കുന്ന പോലീസ് വേരിഫിക്കേഷൻ യുദ്ധകാലാടിസ്ഥാനത്തിൽ പൂർത്തികരിക്കാൻ നടപടി സ്വീകരിക്കണമെന്നാവശ്യപ്പെട്ട് ആർ വൈ എഫ് സംസ്ഥാന പോലീസ് മേധാവിയ്ക്ക് പരാതി നൽകി. റാങ്ക് ലിസ്റ്റും ഒഴിവുകളും ഉണ്ടായിട്ടും വിവിധ വകുപ്പുകൾക്ക് പി എസ് സി
നിയമനങ്ങൾ പരമാവധി നിഷേധിക്കാനുള്ള നിർദ്ദേശങ്ങൾ നൽകി അപ്രഖ്യാപിത നിയമന നിരോധനം സർക്കാർ സംസ്ഥാനത്ത് പ്രായോഗിക തലത്തിൽ നടപ്പിലാക്കുകയാണെന്നും ഇരുവരും കുറ്റപ്പെടുത്തി.