ലോക്‌സഭാ തിരഞ്ഞെടുപ്പില്‍ രാഹുല്‍ ഗാന്ധി വയനാട്ടില്‍ നിന്നു തന്നെ മത്സരിക്കാന്‍ സാധ്യതയെന്ന് ബെന്നി ബെഹനാന്‍ എംപി. രാഹുല്‍ ഗാന്ധി വയനാട്ടില്‍ തന്നെ മത്സരിക്കണമെന്നാണ് തങ്ങളെപ്പോലുള്ളവരുടെ ആഗ്രഹമെന്നും ആവശ്യം അദ്ദേഹത്തെ അറിയിച്ചിട്ടുണ്ടെന്നും ബെന്നി ബെഹനാന്‍ റിപ്പോര്‍ട്ടര്‍ ടിവിയോട് പറഞ്ഞു.രാഹുല്‍ ഗാന്ധി മത്സരിക്കുമ്പോള്‍ മാറിനില്‍ക്കാനുള്ള വിവേകം ഇടതുപക്ഷം കാണിക്കണം. മത്സരത്തില്‍ നിന്ന് സിപിഐ മാറിനില്‍ക്കണം.പുതുപ്പള്ളി വിജയത്തിന് ശേഷം മാധ്യമങ്ങളെ കാണാന്‍ വന്നപ്പോള്‍ കെപിസിസി പ്രസിഡന്റും പ്രതിപക്ഷനേതാവും പെരുമാറിയ രീതിയില്‍ ഒരു കോണ്‍ഗ്രസ് പ്രവര്‍ത്തകനെന്ന നിലയില്‍ പ്രയാസം തോന്നി. ദൃശ്യങ്ങള്‍ വാട്ട്‌സാപ്പിലൂടെയാണ് കണ്ടത്.

എന്നാല്‍ അതിന് ശേഷം കെപിസിസി പ്രസിഡന്റും പ്രതിപക്ഷനേതാവും അതിനെക്കുറിച്ച് വിശദീകരിച്ചപ്പോള്‍ പ്രശ്‌നം അവസാനിച്ചു.കൂട്ടായ നേതൃത്വമാണ് നിലവില്‍ എ ഗ്രൂപ്പിനെ നയിക്കുന്നതെന്നും ബെന്നി ബെഹനാന്‍ പറഞ്ഞു. സംഘടനാപരമായി ഒരുമിച്ച് തീരുമാനങ്ങള്‍ എടുക്കാറുണ്ട്. കരുണാകരനെപ്പോലെയോ ആന്റണിയെപ്പോലെയോ ഉമ്മന്‍ചാണ്ടിയെപ്പോലെയോ ആജ്ഞാശക്തിയുള്ളവര്‍ ഇപ്പോള്‍ ഇല്ല.
ചാലക്കുടിയില്‍ മത്സരിക്കുമോ എന്ന ചോദ്യത്തിന് അത് പാര്‍ട്ടി തീരുമാനിക്കുമെന്നും മത്സരിക്കണം എന്ന് ഇതുവരെ ആവശ്യപ്പെട്ടിട്ടില്ലെന്നും അദ്ദേഹം കൂട്ടിച്ചേര്‍ത്തു.ലോക്‌സഭാ തെരഞ്ഞെടുപ്പില്‍ രാഹുല്‍ ഗാന്ധി തങ്ങളുടെ സംസ്ഥാനത്തു മത്സരിക്കണമെന്ന ആവശ്യവുമായി കേരളത്തിനു പുറമേ കര്‍ണാടക, തമിഴ്‌നാട് പ്രദേശ് കോണ്‍ഗ്രസ് കമ്മറ്റികളും രംഗത്ത്. രാഹുല്‍ ഗാന്ധി വയനാട്ടില്‍ നിന്നു വീണ്ടും ജനവിധി തേടണമെന്ന് കേരളത്തിലെ കെ.പി.സി.സി. നേതൃത്വം ആവശ്യപ്പെട്ടതിന് പിന്നാലെ തമിഴ്‌നാട്ടിലെയും കര്‍ണാടകയിലെയും കോണ്‍ഗ്രസ് നേതൃത്വങ്ങളും െഹെക്കമാന്‍ഡിനെ സമീപിച്ചു.

കന്യാകുമാരി മണ്ഡലത്തില്‍ നിന്നു രാഹുല്‍ ജനവിധി തേടണമെന്നാണ് തമിഴ്‌നാട് കോണ്‍ഗ്രസ് നേതൃത്വത്തിന്റെ ആവശ്യം. കന്യാകുമാരിയില്‍ നിന്നു മത്സരിച്ചാല്‍ അയല്‍സംസ്ഥാനമെന്ന നിലയില്‍ കേരളത്തിനും പ്രയോജനം ലഭിക്കുമെന്ന് തമിഴ്‌നാട് പി.സി.സി. ചൂണ്ടിക്കാട്ടുന്നു. രാഹുലിന്റെ പ്രതിച്ഛായ ഉയര്‍ത്തിയ ഭാരത് ജോഡോ യാത്രയ്ക്കു തുടക്കമിട്ട കന്യാകുമാരിയില്‍ രാഹുല്‍ ജനവിധി തേടുന്നതു രാജ്യമൊട്ടാകെയുള്ള തെരഞ്ഞെടുപ്പ് പ്രചാരണത്തിന് ആവേശം പകരുമെന്നും തമിഴ്‌നാട്ടിലെ കോണ്‍ഗ്രസ് നേതൃത്വം പറയുന്നു.