ഒരു കോടി രൂപ അടിസ്ഥാന സൗകര്യ വികസനത്തിനായി സ്കൂളിന് അനുവദിച്ചു; തിരുവനന്തപുരം ഫോർട്ട് ഗവൺമെന്റ് സംസ്കൃതം ഹൈസ്കൂളിനെ നിലനിർത്തുന്നതിന് വേണ്ട നടപടികൾ സ്വീകരിക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി

തിരുവനന്തപുരം ഫോർട്ട് ഗവൺമെന്റ് സംസ്കൃതം ഹൈസ്കൂളിനെ നിലനിർത്തുന്നതിന് വേണ്ട നടപടികൾ സ്വീകരിക്കുമെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി. സ്ഥലം എംഎൽഎ അഡ്വ.ആന്റണി രാജുവിനൊപ്പം സ്കൂൾ സന്ദർശിച്ചതിനുശേഷം മാധ്യമപ്രവർത്തകരോട് സംസാരിക്കുകയായിരുന്നു മന്ത്രി. 2024 - 25 അധ്യയന വർഷം 21 വിദ്യാർത്ഥികളാണ് സ്കൂളിൽ പഠിച്ചിരുന്നത്. ഒരു കുട്ടി മാത്രമാണ് പത്താംക്ലാസിൽ പഠിച്ചിരുന്നത്.
നിലവിൽ 25 കുട്ടികളും ഇതിൽ അഞ്ചുപേർ പത്താം ക്ലാസുകാരുമാണ്. പത്താം ക്ലാസ് പരീക്ഷയെഴുതി ഉപരിപഠനത്തിന് യോഗ്യത നേടിയ സൂര്യ തിലകേഷിനെ മന്ത്രിയും എംഎൽഎയും അഭിനന്ദിച്ചു. സംസ്കൃതം ഒന്നാം ഭാഷയായും രണ്ടാം ഭാഷയായും പഠിപ്പിക്കുന്ന സ്കൂളിൽ മലയാളം ഒരു വിഷയം എന്ന രീതിയിൽ കൊണ്ടുവരാൻ വേണ്ട നടപടികൾ കൈക്കൊള്ളുമെന്ന് മന്ത്രി പറഞ്ഞു. സ്ഥിരമായി സ്കൂളിൽ ഉണ്ടാകുന്ന രീതിയിൽ സംസ്കൃതത്തിന് താൽക്കാലിക അധ്യാപകനെ നിയമിക്കും. ഒരു കോടി രൂപ അടിസ്ഥാന സൗകര്യ വികസനത്തിനായി സ്കൂളിന് അനുവദിച്ചു എന്നും മന്ത്രി അറിയിച്ചു.
സംസ്ഥാന സ്കൂൾ പ്രവേശനോത്സവത്തിന്റെ ആശംസാ വീഡിയോകൾ പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി പ്രകാശനം ചെയ്തു. 2025 ജൂൺ രണ്ടിന് ആലപ്പുഴ കലവൂരിലാണ് സംസ്ഥാനതല പ്രവേശനോത്സവം. ഇതിനൊപ്പം സംസ്ഥാനത്തെ എല്ലാ സ്കൂളുകളിലും പ്രവേശനോത്സവങ്ങൾ നടക്കും. സ്കൂളിലേക്ക് എത്തുന്ന കുരുന്നുകൾക്ക് നിരവധി പ്രമുഖർ ആശംസയും സന്ദേശവും അറിയിച്ചു. കുരുന്നുകൾ നവ യുഗ ശില്പികളായി വളരട്ടെ എന്ന് ചലച്ചിത്ര നടൻ മോഹൻലാൽ ആശംസയിൽ പറഞ്ഞു.
എഴുത്തുകാരായ എം മുകുന്ദൻ, ജോർജ് ഓണക്കൂർ,ബെന്യാമിൻ, ഗായിക ചിത്ര, സംഗീത സംവിധായകരായ എം ജയചന്ദ്രൻ, ജാസി ഗിഫ്റ്റ് തുടങ്ങിയവർ ആശംസകൾ അറിയിച്ചു. പ്രകാശന ചടങ്ങിൽ പൊതു വിദ്യാഭ്യാസ ഡയറക്ടർ എസ് ഷാനവാസ് ഐ എ എസ്, എസ് ഐ ഇ ടി ഡയറക്ടർ ബി അബുരാജ്, വിദ്യാകിരണം ജോയിൻറ് കോഡിനേറ്റർ ഡോക്ടർ സി രാമകൃഷ്ണൻ, എസ് ഐ ഇ ടി അക്കാദമി കോഡിനേറ്റർ സുരേഷ് ബാബു തുടങ്ങിയവർ സംബന്ധിച്ചു.
https://www.facebook.com/Malayalivartha

























