സംസ്ഥാനത്ത് ശക്തമായ മഴ ഇന്നുകൂടി തുടരും. നാളെ മുതല്‍ തീവ്രത കുറയും. 70 കിലോമീറ്റര്‍ വരെ വേഗതയില്‍ വീശുന്ന പടിഞ്ഞാറന്‍ കാറ്റിന്റെ ശക്തി നാളെക്കഴിഞ്ഞ് 5 മുതല്‍ 10 കിലോമീറ്റര്‍ വരെയായി കുറയും. ശക്തമായ കടലാക്രമണത്തിന് സാദ്ധ്യതയുള്ളതിനാല്‍ മത്സ്യബന്ധനം പാടില്ല.

ഇടുക്കിയില്‍ കുമളി ചെക്ക്‌പോസ്റ്റിന് സമീപം നിറുത്തിയിട്ട ലോറിക്ക് മുകളില്‍ മരംവീണ് ചങ്ങനാശേരി സ്വദേശി ശ്രീജിത്ത് (19) മരിച്ചു. തിരുവനന്തപുരത്ത് മുരുക്കുംപുഴയിലും കടയ്ക്കാവൂരിലും ആലപ്പുഴ തകഴിയിലും അരൂരിലും ട്രാക്കില്‍ മരംവീണ് ഏറെനേരം ട്രെയിന്‍ ഗതാഗതം തടസപ്പെട്ടു.

കാലവര്‍ഷം ആരംഭിച്ചത് മുതല്‍ ഇന്നലെ വരെ (അഞ്ച് ദിവസം) സംസ്ഥാനത്ത് ലഭിച്ചത് 319 മി. മീറ്റര്‍ മഴ. 57.2 മി.മീറ്റര്‍ ലഭിക്കേണ്ട സ്ഥാനത്താണിത്. റെഡ് അലര്‍ട്ട് ഇന്ന് ഇടുക്കി, കണ്ണൂര്‍, കാസര്‍കോട് ഓറഞ്ച് അലര്‍ട്ട്
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്9 ജില്ലകളില്‍ അവധി കണ്ണൂര്‍, എറണാകുളം, കാസര്‍കോട്, കോട്ടയം, തൃശൂര്‍, ഇടുക്കി, വയനാട്, പാലക്കാട്, പത്തനംതിട്ട ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി. എം.ജി സര്‍വകലാശാല ഇന്ന് നടത്താനിരുന്ന പരീക്ഷകള്‍ മാറ്റി.

അതേസമയം കണ്ണൂരില്‍ രണ്ടു വീടുകള്‍ തകര്‍ന്നു. കൊട്ടിയൂര്‍ പട്ടറപ്പറമ്പില്‍ സ്വദേശി ഭാര്‍ഗവിയുടെയും ചാത്തമംഗലം സ്വദേശി വര്‍ഗീസിന്റെയും വീടുകള്‍ മഴയില്‍ തകര്‍ന്നു. കണ്ണൂര്‍ ജില്ലയില്‍ പലയിടത്തും കാറ്റില്‍ വലിയ നാശനഷ്ടമുണ്ടായി. വൈദ്യുതി പോസ്റ്റുകള്‍ തകര്‍ന്നു. ലോട്ടറി കട തലകീഴായി മറിഞ്ഞ് ലോട്ടറി വില്‍പ്പനക്കാരന് പരിക്കേല്‍ക്കുകയും ചെയ്തു. പാലക്കാടും പെരുമഴയില്‍ രണ്ടു വീടുകള്‍ തകര്‍ന്നു. മൂലത്തറ റെഗുലേറ്ററിന്റെ രണ്ടു ഷട്ടറുകള്‍ തുറന്നതിനാല്‍ ചിറ്റൂര്‍പുഴയില്‍ ജലനിരപ്പ് കൂടി. വൃഷ്ടിപ്രദേശത്തു ശക്തമായ മഴ തുടരുന്നതിനാല്‍ കാഞ്ഞിരപ്പുഴ ഡാമില്‍ നിന്നും വെള്ളം തുറന്നുവിട്ടേക്കും.