ഏറെ നേരം കഴിഞ്ഞിട്ടും തിരിച്ചു വന്നില്ല... കാസര്‍കോട് മധുവാഹിനി പുഴയില്‍ തുണിയലക്കുന്നതിനിടെ വീട്ടമ്മ ഒഴുക്കില്‍പ്പെട്ട് മരിച്ചു. മല്ലം ക്ഷേത്രത്തിന് സമീപത്തെ ഗോപിക (75 ) ആണ് മരിച്ചത്.

വീടിന് 20 മീറ്റര്‍ മാത്രം അകലത്തിലുള്ള പുഴയില്‍ തുണി അലക്കാന്‍ പോയതായിരുന്നു വീട്ടമ്മ. ഏറെ നേരം കഴിഞ്ഞിട്ടും തിരിച്ചു വരാത്തതിനെ തുടര്‍ന്ന് നടത്തിയ തെരച്ചിലിനൊടുവില്‍ ഒരു കിലോ മീറ്റര്‍ ദൂരത്തായാണ് മൃതദേഹം കണ്ടെത്തിയത്.

അതേസമയം സംസ്ഥാനത്ത് ശക്തമായ മഴ ഇന്നുകൂടി തുടരും. നാളെ മുതല്‍ തീവ്രത കുറയും. 70 കിലോമീറ്റര്‍ വരെ വേഗതയില്‍ വീശുന്ന പടിഞ്ഞാറന്‍ കാറ്റിന്റെ ശക്തി നാളെക്കഴിഞ്ഞ് 5 മുതല്‍ 10 കിലോമീറ്റര്‍ വരെയായി കുറയും. ശക്തമായ കടലാക്രമണത്തിന് സാദ്ധ്യതയുള്ളതിനാല്‍ മത്സ്യബന്ധനം പാടില്ല.

കാലവര്‍ഷം ആരംഭിച്ചത് മുതല്‍ ഇന്നലെ വരെ (അഞ്ച് ദിവസം) സംസ്ഥാനത്ത് ലഭിച്ചത് 319 മി. മീറ്റര്‍ മഴ. 57.2 മി.മീറ്റര്‍ ലഭിക്കേണ്ട സ്ഥാനത്താണിത്. കണ്ണൂര്‍ ജില്ലയില്‍ പലയിടത്തും കാറ്റില്‍ വലിയ നാശനഷ്ടമുണ്ടായി. വൈദ്യുതി പോസ്റ്റുകള്‍ തകര്‍ന്നു. ലോട്ടറി കട തലകീഴായി മറിഞ്ഞ് ലോട്ടറി വില്‍പ്പനക്കാരന് പരിക്കേല്‍ക്കുകയും ചെയ്തു. പാലക്കാടും പെരുമഴയില്‍ രണ്ടു വീടുകള്‍ തകര്‍ന്നു. മൂലത്തറ റെഗുലേറ്ററിന്റെ രണ്ടു ഷട്ടറുകള്‍ തുറന്നതിനാല്‍ ചിറ്റൂര്‍പുഴയില്‍ ജലനിരപ്പ് കൂടി. വൃഷ്ടിപ്രദേശത്തു ശക്തമായ മഴ തുടരുന്നതിനാല്‍ കാഞ്ഞിരപ്പുഴ ഡാമില്‍ നിന്നും വെള്ളം തുറന്നുവിട്ടേക്കും. തിരുവനന്തപുരത്തും ഇന്നലത്തെ മഴയില്‍ കനത്ത നാശനഷ്ടമുണ്ടായി. നിരവധി മരങ്ങള്‍ മറിഞ്ഞ് വീണ് വൈദ്യുതി പ്രതിസന്ധിയുണ്ടായി.