ഗുണ്ടുമലയില്‍ എട്ടു വയസ്സുകാരി ദുരൂഹ സാഹചര്യത്തില്‍ മരിച്ച കേസില്‍ അന്വേഷണം വഴിമുട്ടി. അന്വേഷണമേറ്റെടുത്ത ശേഷം എസ്പിമാരടക്കമുള്ള ഉദ്യോഗസ്ഥര്‍ അടിക്കടി മാറുന്നതാണ് കാരണമെന്നാണ് ആരോപണം. 2019 സെപ്റ്റംബര്‍ 9നാണ് ഗുണ്ടുമല അപ്പര്‍ ഡിവിഷനിലെ വീടിനുള്ളില്‍ എട്ടു വയസ്സുകാരിയെ മരിച്ച നിലയില്‍ കണ്ടെത്തിയത്. പ്ലാസ്റ്റിക് വള്ളി കഴുത്തില്‍ ചുറ്റി നിലത്ത് കിടക്കുന്ന നിലയിലായിരുന്നു മൃതദേഹം. ആത്മഹത്യ എന്നായിരുന്നു ആദ്യ നിഗമനം.

എന്നാല്‍ കോട്ടയം മെഡിക്കല്‍ കോളജ് ആശുപത്രിയില്‍ നടത്തിയ മൃതദേഹ പരിശോധനയില്‍ കുട്ടി ക്രൂരമായ പീഡനത്തിനിരയായതായി കണ്ടെത്തി. ഇതോടെയാണ് മരണം കൊലപാതകമാണെന്ന സംശയത്തിലേക്ക് നീങ്ങിയത്. ലോക്കല്‍ പൊലീസിന്റെ അന്വേഷണത്തില്‍ പുരോഗതിയില്ലാതെ വന്നതോടെ നര്‍കോട്ടിക് ഡിവൈഎസ്പിയുടെ നേതൃത്വത്തിലുള്ള പ്രത്യേക സംഘത്തിന് കേസ് കൈമാറിയിരുന്നു.

ഫൊറന്‍സിക് വിദഗ്ധരടങ്ങുന്ന സംഘം നടത്തിയ ശാസ്ത്രീയ പരിശോധനയിലും ഡമ്മി പരീക്ഷണത്തിലും കൊലപാതകമാണെന്നായിരുന്നു നിഗമനം. പെണ്‍കുട്ടിയെ കെട്ടിത്തൂക്കിയോ, പ്ലാസ്റ്റിക് വള്ളി കഴുത്തില്‍ വലിച്ചു മുറുക്കിയോ ആണ് കൊലപാതകം നടത്തിയിരിക്കുന്നതെന്നായിരുന്നു സംഘത്തിന്റെ കണ്ടെത്തല്‍. എന്നാല്‍ പ്രതിയെ കണ്ടെത്താന്‍ നര്‍കോട്ടിക് സംഘത്തിന് കഴിഞ്ഞില്ല.കുട്ടിയുടെ അമ്മയുടെ പരാതിയെത്തുടര്‍ന്ന് കേസ് പിന്നീട് െ്രെകംബ്രാഞ്ചിന് കൈമാറിയിരുന്നു.

രണ്ടു വര്‍ഷത്തിനിടയില്‍ െ്രെകം ബ്രാഞ്ചിലെ രണ്ട് എസ്പിമാരും ഒരു ഡിവൈഎസ്പിയും കേസ് അന്വേഷിച്ചെങ്കിലും മരണം കൊലപാതകമാണോ ആത്മഹത്യയാണോ എന്നു പോലും കണ്ടെത്താനായില്ല. നിലവില്‍ കേസ് അന്വേഷിച്ചിരുന്ന എസ്പി സ്ഥലമാറിപ്പോകുകയും ഡിവൈഎസ്പി വിരമിക്കുകയും ചെയ്തതോടെ അന്വേഷണം നിലച്ച നിലയിലാണ്.