തോട്ടില്‍ നിന്ന് തേങ്ങയെടുക്കാന്‍ ശ്രമിക്കവേ ഒഴുക്കില്‍പ്പെട്ട് കാണാതായി. ഒടുവില്‍ വയോധികന്റെ മൃതദേഹം പത്താംദിവസം കണ്ടെത്തി.
വലിയതോട്ടില്‍വീണ് കാണാതായ മീനടം കാട്ടുമറ്റത്തില്‍ ഈപ്പന്‍ തോമസിന്റെ (കുഞ്ഞ്-66) മൃതദേഹമാണ് കണ്ടെത്തിയത്.

അപകടമുണ്ടായ സ്ഥലത്തുനിന്ന് നാലു കിലോമീറ്ററോളം ദൂരത്തുനിന്നാണ് ഈരാറ്റുപേട്ടയില്‍ നിന്നുള്ള ടീം എമര്‍ജന്‍സി കേരള അംഗങ്ങള്‍ മൃതദേഹം കണ്ടെടുത്തത്. വെള്ളം ഇറങ്ങിത്തുടങ്ങിയ തോട്ടില്‍ തിങ്കളാഴ്ച രാവിലെ മുതല്‍തന്നെ തിരച്ചില്‍ ആരംഭിച്ചിട്ടുണ്ടായിരുന്നു. തോടിനു കുറുകെ കിടന്ന മരത്തിന് സമീപം ഉടക്കികിടക്കുന്ന നിലയിലായിരുന്നു മൃതദേഹം. മേയ് 31-ന് വൈകുന്നേരം 3.30-ഓടെ മീനടം ചക്കുങ്കല്‍പ്പടിയിലായിരുന്നു അപകടം സംഭവിച്ചത്.

തൊഴിലാളിയെക്കൊണ്ട് പുരയിടത്തിലെ തേങ്ങ ഇടീക്കുന്നതിനിടെ തോട്ടിലേക്കുവീണ തേങ്ങ എടുക്കാനിറങ്ങിയപ്പോള്‍ ഈപ്പന്‍ ഒഴുക്കില്‍പ്പെടുകയായിരുന്നു. കോട്ടയം, പാമ്പാടി എന്നിവിടങ്ങളില്‍ നിന്നുള്ള അഗ്നിരക്ഷാ സേനാംഗങ്ങളും തിരച്ചില്‍ നടത്തിയിരുന്നു. കൈതേപ്പാലത്തിന് പടിഞ്ഞാറുഭാഗത്തുള്ള ചക്കാലക്കടവിന് സമീപം തിങ്കളാഴ്ച വൈകുന്നേരം കണ്ടെത്തിയ മൃതദേഹം രാത്രി ഒമ്പതുമണിയോടെ കോട്ടയം മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റി.

മൃതദേഹം ഇന്ന് മീനടം ആശുപത്രിപ്പടിയിലുള്ള വീട്ടിലെത്തിക്കും. തുടര്‍ന്ന് മീനടം സെയ്ന്റ് ജോണ്‍സ് യാക്കോബായ പള്ളി സെമിത്തേരിയില്‍ സംസ്‌കാര ചടങ്ങുകള്‍ നടത്തും.