പിതാവിന്റെ മരണവുമായി ബന്ധപ്പെട്ട ദുരൂഹത നീക്കണമെന്നാവശ്യപ്പെട്ട് മകന്‍ പൊലീസില്‍ കൊടുത്ത പരാതിയെതുടര്‍ന്ന് രണ്ടാഴ്ച മുമ്പ് ഖബറടക്കിയ മൃതദേഹം പുറത്തെടുത്ത് പരിശോധിച്ചു.

പയ്യോളി തുറയൂര്‍ അട്ടക്കുണ്ടിലെ ഈളുവയലില്‍ മുഹമ്മദാണ് (58) കഴിഞ്ഞ മേയ് 26ന് മരണപ്പെട്ടത്. ഇദ്ദേഹത്തിന്റെ മകന്‍ പയ്യോളി കണ്ണംകുളം കുഴിച്ചാലില്‍ മുഫീദ് പിതാവിന്റെ മരണത്തില്‍ സംശയം പ്രകടിപ്പിച്ച് പൊലീസില്‍പരാതി നല്‍കി . ഇതേ തുടര്‍ന്ന് മുഹമ്മദിന്റെ മയ്യത്ത് ഖബര്‍ തുറന്നു പുറത്തെടുത്ത് പോസ്റ്റ്‌മോര്‍ട്ടം നടത്തി പരിശോധിക്കുകയായിരുന്നു.

ആര്‍.ഡി.ഒ പി. അന്‍വര്‍ സാദത്തിന്റെ നേതൃത്വത്തില്‍ തിങ്കളാഴ്ച രാവിലെ 10.45 ഓടെയാണ് ഖബറില്‍നിന്ന് മൃതദേഹം പുറത്തെടുത്ത് സമീപത്ത് നിന്നുതന്നെ പോസ്റ്റ്‌മോര്‍ട്ടം ചെയ്തത്.

മെഡിക്കല്‍ കോളജ് പൊലീസ് സര്‍ജന്‍ ഡോ. പി.എസ്. സഞ്ജയ് പോസ്റ്റ്‌മോര്‍ട്ടത്തിന് നേതൃത്വം നല്‍കി. പോസ്റ്റ്‌മോര്‍ട്ടം നടപടികള്‍ പൂര്‍ത്തിയാക്കിയശേഷം ഉച്ചക്ക് ഒന്നരയോടെ മൃതദേഹം വീണ്ടും മറവ് ചെയ്തു. എന്നാല്‍ പോസ്റ്റ്‌മോര്‍ട്ടം റിപ്പോര്‍ട്ടില്‍, മരണത്തില്‍ അസ്വാഭാവികത ഇല്ലെന്ന് കണ്ടെത്തി. ഹൃദയാഘാതം മൂലമാണ് മുഹമ്മദ് മരണപ്പെട്ടതെന്നും ഒന്നില്‍ കൂടുതല്‍ തവണ ഹൃദയസ്തംഭനം സംഭവിച്ചതായി പോസ്റ്റ്‌മോര്‍ട്ടത്തിലൂടെ വ്യക്തമായതുമാണ് പ്രാഥമിക നിഗമനം.

അതേ സമയം ആന്തരികാവയവങ്ങളുടെ സാമ്പിളുകള്‍ ഫോറന്‍സിക് ലാബില്‍ പരിശോധനക്ക് അയച്ചിട്ടുണ്ടെന്നും, അതോടുകൂടി മാത്രമേ റിപ്പോര്‍ട്ട് പൂര്‍ത്തിയാവുകയുള്ളൂവെന്നും വ്യക്തമാക്കി അന്വേഷണസംഘം .