അഹമ്മദാബാദ് വിമാനാപകടത്തില്‍ മരിച്ച പത്തനംതിട്ട പുല്ലാട് കുറങ്ങഴക്കാവ് കൊഞ്ഞോണ്‍ വീട്ടില്‍ രഞ്ജിത ആര്‍. നായരുടെ (39) മൃതദേഹം നാട്ടിലെത്തിക്കാന്‍ വൈകും. ഡി.എന്‍.എ പരിശോധനക്കുശേഷം രഞ്ജിതയുടേതാണെന്ന് ഉറപ്പാക്കിയശേഷമാകും ബന്ധുക്കള്‍ക്ക് വിട്ടുകൊടുക്കുക. ഇതിനായി ഡി.എന്‍.എ സാമ്പിള്‍ നല്‍കാനായി രഞ്ജിതയുടെ ഇളയ സഹോദരന്‍ രതീഷ് വെള്ളിയാഴ്ച രാത്രി അഹമ്മദാബാദിലേക്ക് പുറപ്പെട്ടു. ബന്ധുവും കൂടെയുണ്ട്.

കൊച്ചി വിമാനത്താവളത്തില്‍ നിന്ന് രാത്രിയോടെ പുറപ്പെട്ട ഇവര്‍ മുംബൈയിലെത്തിയശേഷം അടുത്ത വിമാനത്തിലാകും അഹമ്മദാബാദിലേക്ക് പോകുക. ജില്ല ഭരണകൂടത്തിന്റെ നേതൃത്വത്തിലാണ് യാത്രക്കുള്ള ക്രമീകരണങ്ങള്‍ ഏര്‍പ്പെടുത്തിയിരിക്കുന്നത്. സാക്ഷ്യപത്രവും വിമാനടിക്കറ്റും വെള്ളിയാഴ്ച ഉച്ചയോടെ ഡെപ്യൂട്ടി കലക്ടര്‍ കൊഞ്ഞോണ്‍ വീട്ടിലെത്തി ബന്ധുക്കള്‍ക്ക് കൈമാറി.


വേഗത്തില്‍ ഡി.എന്‍.എ പരിശോധനക്കുള്ള ക്രമീകരണങ്ങള്‍ ഒരുക്കിയെന്ന് അധികൃതര്‍ വ്യക്തമാക്കുന്നുണ്ടെങ്കിലും ഫലം ലഭിക്കാന്‍ 72 മണിക്കൂര്‍ വരെ കാത്തിരിക്കേണ്ടിവരുമെന്നാണ് ജില്ല ഭരണകൂടത്തിന്റെ വിലയിരുത്തല്‍. മൃതദേഹം ലഭിക്കുന്നതു വരെ രതീഷ് അഹ്മദാബാദില്‍ തുടരും. വിദേശത്തായിരുന്ന മൂത്ത സഹോദരന്‍ രഞ്ജിത്തും നാട്ടിലെത്തിയിട്ടുണ്ട്.
വീട്ടില്‍ സംസ്‌കാരച്ചടങ്ങുകള്‍ക്കുള്ള ഒരുക്കം തുടങ്ങി. രഞ്ജിതയുടെ സ്വപ്നമായിരുന്ന നിര്‍മാണം പുരോഗമിക്കുന്ന പുതിയ വീടിന്റെ മുറ്റത്ത് പന്തലും ഉയര്‍ന്നു. ഇത് നാടിന് വേദനയുമായി. പാലുകാച്ചലിനായി എത്തുമെന്ന് അമ്മക്കും മക്കള്‍ക്കും വാക്കുനല്‍കി മടങ്ങിയ രഞ്ജിത, നിശ്ചലമായി പുതിയ വീട്ടിലേക്ക് എത്തുന്നതിന്റെ വേദനയിലാണ് ബന്ധുക്കള്‍.