ക്ലബ് ഫുട്ബോള്‍ ലോകകപ്പിന്റെ പരിഷ്‌കരിച്ച പതിപ്പിന് നാളെ തുടക്കം. ഉദ്ഘാടന മത്സരത്തില്‍ പുലര്‍ച്ചെ 5.30ന് ആതിഥേയരായ ഇന്റര്‍ മയാമിയും ഈജിപ്ത് ക്ലബ്ബായ അല്‍ അഹ്ലിയും ഏറ്റുമുട്ടുന്നതാണ്. അമേരിക്കയിലെ 11 നഗരങ്ങളിലെ 12 വേദികളില്‍ നടക്കുന്ന ടൂര്‍ണമെന്റില്‍ ലോകത്തെ 32 ടീമുകളാണ് പങ്കെടുക്കുന്നത്.

48 ടീമുകള്‍ പങ്കെടുക്കുന്ന അടുത്ത വര്‍ഷത്തെ ലോകകപ്പിനായുള്ള മുന്നൊരുക്കംകൂടിയാണ് അമേരിക്കയ്ക്ക് ഈ ചാമ്പ്യന്‍ഷിപ്പ്. ലോകകപ്പ് അമേരിക്ക ഉള്‍പ്പെടെ മൂന്ന് രാജ്യങ്ങളിലായാണ് നടക്കുന്നത്.
ലോക ഫുട്ബോളില്‍ കഴിഞ്ഞ അഞ്ച് വര്‍ഷത്തിനിടെ പല രാജ്യങ്ങളിലെ ക്ലബ്ബുകളിലേക്ക് ചേക്കേറിയ കളിക്കാരുടെ സംഗമംകൂടിയാണ് ക്ലബ് ലോകകപ്പ്.

എല്ലാ മേഖലയില്‍ നിന്നുമുള്ള ടീമുകളുമുണ്ട്. ഇതുവരെ ഓരോ മേഖലാ ചാമ്പ്യന്‍മാര്‍ തമ്മിലുള്ള പോരാട്ടമായിരുന്നു. ഇക്കുറി അതിന് മാറ്റംവന്നുകഴിഞ്ഞു. കഴിഞ്ഞ നാല് വര്‍ഷത്തിനിടെ പുറത്തെടുത്ത പ്രകടനങ്ങളുടെ അടിസ്ഥാനത്തിലായിരുന്നു ക്ലബ്ബുകളുടെ തെരഞ്ഞെടുപ്പ്. റയല്‍ മാഡ്രിഡ്, മാഞ്ചസ്റ്റര്‍ സിറ്റി, പിഎസ്ജി, ബയേണ്‍ മ്യൂണിക്, അത്ലറ്റികോ മാഡ്രിഡ്, ഇന്റര്‍ മിലാന്‍, ചെല്‍സി, യുവന്റസ് തുടങ്ങി 12 യൂറോപ്യന്‍ ക്ലബ്ബുകള്‍ ലോകകപ്പില്‍ കളിക്കും. കോണ്‍കാകാഫില്‍ നിന്ന് മെസിയുടെ ഇന്റര്‍ മയാമി ഉള്‍പ്പെടെ അഞ്ച് ക്ലബ്ബുകളും ലാറ്റിനമേരിക്കയില്‍ നിന്ന് ആറ് ടീമുകളും പങ്കെടുക്കും. ആഫ്രിക്ക (4), ഏഷ്യ (4), ഓഷ്യാനിയ (1) എന്നീ മേഖലകളില്‍ നിന്നാണ് മറ്റ് ടീമുകളുള്ളത്.