കേരളത്തിലേക്ക് മയക്കുമരുന്ന് കടത്തുന്ന സംഘങ്ങളുടെ ഏജന്റുമാരായ യുവതികളെ 37.5 കിലോ കഞ്ചാവുമായി എറണാകുളം റെയില്‍വേ പൊലീസ് അറസ്റ്റ് ചെയ്തു. പശ്ചിമബംഗാള്‍ മുര്‍ഷിദാബാദ് റാണിനഗര്‍ സ്വദേശി അനിതാ ഖാത്തൂണ്‍ ബീബി (30), കാസിപാറ സ്വദേശി സോണിയാ സുല്‍ത്താന (21) എന്നിവരാണ് പിടിയിലായത്.

ഇന്നലെ രാവിലെ 7.30ന് ബംഗളൂരു കന്യാകുമാരി എക്‌സ്പ്രസ് ട്രെയിന്‍ എറണാകുളം നോര്‍ത്ത് സ്‌റ്റേഷന്‍ വിട്ടശേഷം രണ്ടാംനമ്പര്‍ പ്ലാറ്റ്‌ഫോമില്‍ ആര്‍.പി.എഫും റെയില്‍വേ പൊലീസും നടത്തിയ പരിശോധനയിലാണ് ഇവരെ കസ്റ്റഡിയിലെടുത്തത്. ഇവരുടെ കൈവശമുണ്ടായിരുന്ന മൂന്നു ട്രോളി ബാഗുകളില്‍ ബ്രൗണ്‍ പേപ്പര്‍ പൊതികളിലാണ് കഞ്ചാവ് ഒളിപ്പിച്ചിരുന്നത്. സംശയിക്കാതിരിക്കാന്‍ ഉത്തരേന്ത്യന്‍ ടൂറിസ്റ്റുകളുടെ വേഷത്തില്‍ വിലപിടിപ്പുള്ള ട്രോളിബാഗുകളുമായിട്ടാണ് സഞ്ചാരം.

ശനിയാഴ്ച രാത്രി ബംഗളൂരുവിന് സമീപം കൃഷ്ണരാജപുരം സ്‌റ്റേഷനില്‍ നിന്ന് എറണാകുളം നോര്‍ത്ത് സ്‌റ്റേഷനിലേക്ക് എടുത്ത ജനറല്‍ ടിക്കറ്റ് കൈവശമുണ്ടായിരുന്നു. ഒഡീഷ, ആന്ധ്ര, പശ്ചിമബംഗാള്‍ സംസ്ഥാനങ്ങളില്‍ നിന്നായിരിക്കാം കഞ്ചാവ് കടത്തിയതെന്ന് സംശയിക്കുന്നു. അന്യസംസ്ഥാന തൊഴിലാളികളുടെ സഹായത്തോടെ യുവതികളില്‍ നിന്ന് വിവരങ്ങള്‍ ശേഖരിക്കാന്‍ പൊലീസ് ശ്രമിച്ചെങ്കിലും വിഫലമായി. രണ്ട് മൊബൈല്‍ ഫോണുകള്‍ കസ്റ്റഡിയിലെടുത്തു. കഞ്ചാവുമായി മുന്‍പും ഇവര്‍ കൊച്ചിയിലെത്തിയിട്ടുണ്ടെന്നാണ് സൂചന. എറണാകുളം റെയില്‍വേ ഡിവൈ.എസ്.പി ജോര്‍ജ് ജോസഫ്, എസ്.ഐമാരായ നിസാറുദ്ദീന്‍, ഇ.കെ.അനില്‍കുമാര്‍ എന്നിവരുടെ നേതൃത്വത്തിലാണ് അന്വേഷണം.