തിരുവല്ലയില്‍ നിയന്ത്രണം വിട്ട ഓട്ടോറിക്ഷ ഇടിച്ച് പരിക്കേറ്റ് ചികിത്സയിലായിരുന്ന കാല്‍നടയാത്രക്കാരന്‍ മരിച്ചു. മഞ്ഞാടി ആമല്ലൂര്‍ പ്ലാന്തറ വീട്ടില്‍ പി സി ജേക്കബ് (രാജു, 62) ആണ് മരിച്ചത്.

ഈ മാസം അഞ്ചാം തീയതി ഉച്ചകഴിഞ്ഞ് മൂന്നുമണിയോടെ മഞ്ഞാടി ജങ്ഷന് സമീപമായിരുന്നു അപകടം നടന്നത്. വീട്ടുസാധനങ്ങള്‍ വാങ്ങി നടന്നു പോകവേ തിരുവല്ല ഭാഗത്തു നിന്നും എത്തിയ ഓട്ടോറിക്ഷ ജേക്കബിനെ പിന്നില്‍ നിന്നും ഇടിച്ച് തെറിപ്പിക്കുകയായിരുന്നു. അപകട ശേഷം ഓട്ടോ നിര്‍ത്താതെ പോയി.

തലക്ക് ഗുരുതര പരിക്കേറ്റ ഇയാളെ സംഭവം കണ്ട നാട്ടുകാര്‍ ചേര്‍ന്ന് തിരുവല്ലയിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റിയ ജേക്കബ് ഇന്നലെ രാവിലെ മരണത്തിന് കീഴടങ്ങി.