തിരുവല്ല പുഷ്പഗിരി മെഡിസിറ്റി ദന്തല്‍ കോളജ് ഹോസ്റ്റലില്‍ താമസിക്കുന്ന വിദ്യാര്‍ഥികള്‍ക്ക് ഭക്ഷ്യ വിഷബാധയെന്ന് സംശയം. കോളജ് ഹോസ്റ്റലില്‍ താമസിക്കുന്ന 25 വിദ്യാര്‍ഥികളാണ് ഛര്‍ദ്ദിയെ തുടര്‍ന്ന് ചികിത്സ തേടിയത്. ബുധനാഴ്ച 15 പേരും , വ്യാഴാഴ്ച 10 പേരുമാണ് കലശലായ ഛര്‍ദ്ദിയെ തുടര്‍ന്ന് പുഷ്പഗിരി ആശുപത്രിയില്‍ ചികിത്സ തേടിയത്.

സംഭവത്തെ തുടര്‍ന്ന് ജില്ലാ മെഡിക്കല്‍ ഓഫിസില്‍നിന്നും എത്തിയ സംഘം കോളേജിലെയും ഹോസ്റ്റലിലെയും ജലത്തിന്റെ സാമ്പിളും ഹോസ്റ്റലില്‍നിന്നുള്ള ആഹാര സാമ്പിളുകളും ശേഖരിച്ചു. അതേസമയം കുട്ടികളില്‍ പലരും ഹോസ്റ്റലിന് പുറത്തുനിന്നുള്ള ഭക്ഷ്യ വസ്തുക്കള്‍ ഉപയോഗിക്കാറുള്ളതായും അത് മുഖേനയാണോ ചര്‍ദ്ദി അനുഭവപ്പെട്ടതെന്ന് സംശയിക്കുന്നതായും ആശുപത്രി വൃത്തങ്ങള്‍ പ്രതികരിച്ചു.