ആ കാഴ്ച കണ്ണീര്‍ക്കാഴ്ചയായി... ആലപ്പുഴയില്‍ തെരുവുനായ കുറുകെ ചാടിയതിനെ തുടര്‍ന്ന് നിയന്ത്രണം വിട്ട ബൈക്കില്‍ നിന്നും ലോറിക്കടിയിലേക്ക് വീണ യുവാവ് മരണത്തിന് കീഴടങ്ങി. പുറക്കാട് പഞ്ചായത്ത് പതിനഞ്ചാം വാര്‍ഡ് കണിയാംപറമ്പ് വീട്ടില്‍ അനില്‍ കുമാര്‍- ശാലിനി ദമ്പതികളുടെ മകന്‍ അഭിരാം (21) ആണ് ദാരുണമായി മരിച്ചത്.

അപകടം നടന്നത് ദേശീയപാതയില്‍ കുറവന്‍തോടാണ് . ബൈക്കില്‍ പോവുകയായിരുന്ന അഭിരാമിന് മുന്നിലേക്ക് തെരുവുനായ ചാടുകയായിരുന്നു. നിയന്ത്രണം വിട്ട് ബൈക്ക് മറിഞ്ഞ് റോഡില്‍ വീണ അഭിരാമിന്റെ ദേഹത്ത് പുറകിലൂടെ വന്ന ലോറി കയറി. ഇന്നലെ രാത്രി എട്ടരയോടെയാണ് അപകടം സംഭവിച്ചത്.

പുന്നപ്രയിലെ ബന്ധുവീട്ടില്‍ പോയി തിരികെ സ്വന്തം വീട്ടിലേക്ക് മടങ്ങുകയായിരുന്നു യുവാവ്. സംഭവ സ്ഥലത്ത് വച്ചു തന്നെ യുവാവ് മരിച്ചു. വിവരമറിഞ്ഞ് പുന്നപ്ര പൊലീസ് സ്ഥലത്തെത്തുകയും നാട്ടുകാരുടെ കൂടെ സഹായത്തോടെ പൊലീസ് മൃതദേഹം ആലപ്പുഴ മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റുകയും ചെയ്തു. പോസ്റ്റ്മോര്‍ട്ടം അടക്കം നടപടിക്രമങ്ങള്‍ പൂര്‍ത്തിയാക്കിയ ശേഷം മൃതദേഹം ബന്ധുക്കള്‍ക്ക് വിട്ടുനല്‍കും.