കണ്ണൂര്‍ നഗരത്തില്‍ രണ്ടു ദിവസത്തിനിനിടെ തെരുവുനായുടെ കടിയേറ്റത് എഴുപതിലധികം പേര്‍ക്ക്
കണ്ണൂരില്‍ തെരുവുനായകളുടെ ശല്യം രൂക്ഷമായതിനാല്‍ ജില്ലാ പഞ്ചായത്തിന്റെ നേതൃത്വത്തില്‍ നായ്ക്കളെ വന്ധ്യംകരിക്കുന്ന നടപടികള്‍ ത്വരിതഗതിയിലാക്കി. നിരവധി നായ്ക്കളെ ഇതിനകം തന്നെ പിടികൂടി. രണ്ടു ദിവസത്തിനുള്ളില്‍ എഴുപതിലധികം പേരെയാണ് നഗരത്തില്‍ മാത്രം തെരുവുനായ കടിച്ചു പരുക്കേല്‍പ്പിച്ചത്. നഗരത്തില്‍ ആക്രമണം കുറഞ്ഞെങ്കിലും ജില്ലയുടെ മറ്റു സ്ഥലങ്ങളില്‍ തെരുവുനായ ശല്യം രൂക്ഷമാണ്. ഇന്നലെ കണ്ണാടിപ്പറമ്പില്‍ വയോധികയെ തെരുവുനായ്ക്കള്‍ കടിച്ചു കീറി. ഇവര്‍ പരിയാരം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. പേവിഷ ബാധ സ്ഥിരീകരിച്ച അഞ്ചുവയസ്സുകാരനും മെഡിക്കല്‍ കോളജ് ആശുപത്രിയില്‍ ഗുരുതരാവസ്ഥയില്‍ തുടരുകയാണ്.
ജില്ലയിലെ നിരവധി നായ്ക്കളെ ഇതിനകം തന്നെ പിടികൂടിയെന്ന് ജില്ലാ പഞ്ചായത്ത് പ്രസിഡന്റ് രത്‌നകുമാരി പറഞ്ഞു. നായയെ പിടിക്കുന്നതിന് പരിശീലനം നല്‍കാനുള്ള നീക്കം നടത്തുന്നുണ്ടെങ്കിലും തയാറായി വരുന്ന ആളുകള്‍ കുറവാണെന്നും അവര്‍ പറഞ്ഞു. തെരുവുനായ ശല്യത്തെ തുടര്‍ന്ന് മൂന്ന് ദിവസത്തിനുള്ളില്‍ ഷെല്‍റ്റര്‍ ഹോമുകള്‍ സജ്ജമാക്കണമെന്ന് കഴിഞ്ഞ വെള്ളിയാഴ്ച മന്ത്രിയുടെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനിച്ചിരുന്നു. എന്നാല്‍ ഇതുവരെ ഷെല്‍റ്റര്‍ ഹോമുകള്‍ തുറന്നിട്ടില്ല.
ഷെല്‍റ്റര്‍ ഒരാഴ്ച്ചയ്ക്കുള്ളില്‍ സജ്ജമാക്കുമെന്നാണ് കണ്ണൂര്‍ കോര്‍പറേഷന്‍ അറിയിച്ചത്. 100 തെരുവുനായ്ക്കളെ വരെ പാര്‍പ്പിക്കാനാകുന്ന ഷെല്‍റ്ററാണു കോര്‍പറേഷന്‍ ഒരുക്കുന്നത്. ആവശ്യത്തിനനുസരിച്ച് കൂടുകളുടെ എണ്ണം ഉയര്‍ത്തും. എടക്കാട് സോണലില്‍ കോര്‍പറേഷന്റെ ഉടമസ്ഥതയിലുള്ള മാളികപറമ്പിലാണു ഷെല്‍റ്റര്‍ സ്ഥാപിക്കുന്നത്. ആക്രമണകാരികളായ തെരുവുനായ്ക്കളെയാണ് പിടികൂടി ഷെല്‍റ്ററില്‍ പാര്‍പ്പിക്കുക.
കോര്‍പറേഷന്‍ അസിസ്റ്റന്റ് എക്‌സിക്യുട്ടീവ് എന്‍ജിനീയര്‍ക്കാണ് പദ്ധതിയുടെ ചുമതല. ജില്ലാ ആസൂത്രണ സമിതി മുന്‍പാകെ അംഗീകാരത്തിനായി പദ്ധതി സമര്‍പ്പിച്ചിട്ടുണ്ട്. കോര്‍പറേഷന്റെ ഉടമസ്ഥതയിലുള്ള സ്ഥലങ്ങളുടെ റജിസ്റ്റര്‍ പരിശോധിച്ച് ഏറ്റവും അനിയോജ്യമായ ഇടം എന്ന നിലയിലാണ് മാളിക പറമ്പ് ഷെല്‍റ്ററിനായി തിരഞ്ഞെടുത്തത്. എന്നാല്‍ കന്റോണ്‍മെന്റില്‍ ഉള്‍പ്പെടെ രണ്ട് ഷെല്‍റ്റര്‍ ഹോമുകള്‍ കൂടി സ്ഥാപിക്കാന്‍ തീരുമാനിച്ചെങ്കിലും നടപടിയായില്ല.
https://www.facebook.com/Malayalivartha
