സെക്രട്ടേറിയറ്റിലും വകുപ്പ് അധ്യക്ഷന്മാരുടെ കാര്യാലയങ്ങളിലും മെയ് 31 വരെയുള്ള ഫയലുകള്‍ രണ്ട് മാസത്തിനകം തീര്‍പ്പാക്കാന്‍ മന്ത്രിസഭാ യോഗ തീരുമാനമായി. ഇതിനായി ജൂലൈ ഒന്നുമുതല്‍ ഓഗസ്റ്റ് 31 വരെ അദാലത്ത് സംഘടിപ്പിക്കാനും മന്ത്രിസഭാ യോഗം തീരുമാനിച്ചു.

ആദ്യ ഘട്ടത്തില്‍ ഓരോ വകുപ്പിന്റെയും സെക്രട്ടറി/ ഡയറക്ടര്‍/ സ്ഥാപന മേധാവികള്‍ ജീവനക്കാരുടെ യോഗം വിളിച്ച് അദാലത്തിന്റെ പ്രാധാന്യവും ഉദ്ദേശ്യവും നടപ്പാക്കുന്ന രീതിയും ഉത്തരവാദിത്വവും വിശദീകരിക്കുന്നതാണ്. അധിക നിര്‍ദേശങ്ങള്‍ സംസ്ഥാനതലത്തില്‍ ചീഫ് സെക്രട്ടറിയും വകുപ്പുതലത്തില്‍ വകുപ്പ് സെക്രട്ടറിമാരും തയ്യാറാക്കി നല്‍കുകയും ചെയ്യും.