പ്രധാനമന്ത്രി നരേന്ദ്രമോദിയെ തുടർച്ചയായി പ്രകീർത്തിച്ച് പാർട്ടിയെ വെട്ടിലാക്കിയ പ്രവർത്തകസമിതി അംഗം ശശി തരൂരിന് പുറത്തേക്കുള്ള വഴി  കാണിക്കുകയാണ്  കോൺഗ്രസ്. പ്രവർത്തകസമിതി അംഗമായ തരൂരിന് ഏത് വഴിയും സ്വീകരിക്കാമെന്ന സന്ദേശമാണ്, തരൂരിന്റെ മോദിസ്തുതി സംബന്ധിച്ച ചോദ്യങ്ങൾക്ക് കോൺഗ്രസ് അധ്യക്ഷൻ മല്ലികാർജുൻ ഖാർഗെ നൽകിയത്. തരൂരിന്റെ എഴുത്തുകളിലും പ്രസ്താവനകളിലും പ്രതികരിച്ചും വിശദീകരണം ചോദിച്ചും തരൂരിന് കൂടുതൽ ഇടം നൽകേണ്ടതില്ലെന്ന തീരുമാനത്തിലാണ് പാർട്ടി.

തരൂരിനെ ശ്രദ്ധിക്കാൻ സമയമില്ലെന്നും പാർട്ടിക്ക് രാജ്യവുമായി ബന്ധപ്പെട്ട വലിയ ലക്ഷ്യങ്ങളുണ്ടെന്നുമാണ് പാർട്ടി അധ്യക്ഷൻ മല്ലികാർജുൻ ഖാർഗെ പറഞ്ഞത്. കോൺഗ്രസിനെ സംബന്ധിച്ചിടത്തോളം അടഞ്ഞ അധ്യായമാണ്‌ ശശി തരൂർ എന്ന വ്യാഖ്യാനമാണിത്. 34 വർക്കിങ് പ്രസിഡന്റുമാരിലും മുപ്പതോളം സ്ഥിരം ക്ഷണിതാക്കളിലും അത്രതന്നെ പ്രത്യേക ക്ഷണിതാക്കളിലും ഒരാൾമാത്രമാണ് തരൂരെന്ന് പറഞ്ഞ ഖാർഗെ, ഓരോരുത്തർ എഴുതുന്നത് നോക്കി ബുദ്ധി കേടാക്കാനില്ലെന്നുംകൂടി പറഞ്ഞുവെച്ചു.

തരൂരിന്റെ നിലപാടുകൾ ബിജെപിക്കും മോദിക്കും ഗുണംചെയ്യുന്ന രീതിയിലായിരുന്നുവെന്നാണ് കോൺഗ്രസിന്റെ വിലയിരുത്തൽ. കേരളത്തിലും പാർട്ടിയെ നിർണായക സന്ദർഭങ്ങളിൽ തരൂർ പ്രതിരോധത്തിലാക്കിയെന്നും വിലയിരുത്തുന്നു. നിലമ്പൂർ ഉപതിരഞ്ഞെടുപ്പുദിവസം, പ്രചാരണത്തിന് ക്ഷണിച്ചില്ലെന്ന് പറഞ്ഞ് തരൂർ പാർട്ടിയെ വെട്ടിലാക്കി.

മോദിഭരണകൂടത്തിന്‌ എതിരേ പ്രമേയം പാസാക്കാൻ അഹമ്മദാബാദിൽ പ്രവർത്തകസമിതി യോഗം വിളിക്കാനിരിക്കെയായിരുന്നു മോദിയെയും കേരളത്തിലെ ഇടതുപക്ഷ സർക്കാരിനെയും പ്രശംസിച്ചുള്ള തരൂരിന്റെ ലേഖനം പുറത്തുവന്നത്. ഓപ്പറേഷൻ സിന്ദൂറിനുശേഷവും മോദിയെ പുകഴ്ത്തി പ്രസ്താവനകൾ നടത്തി. പിന്നാലെ, വിദേശത്തേക്കുള്ള നയതന്ത്രസംഘത്തിൽ ഉൾപ്പെടുത്തിയകാര്യം പാർട്ടിയെ അറിയിച്ചതുമില്ല.

നയതന്ത്രദൗത്യം കഴിഞ്ഞ്‌ വന്നശേഷവും പാർട്ടിനിലപാടിന്‌ വിരുദ്ധമായ പ്രസ്താവനകൾ തുടർന്നുവെന്നാണ് പാർട്ടിനേതാക്കളുടെ അഭിപ്രായം. ‘ദ ഹിന്ദു’വിൽ സർക്കാരിന്റെ വിദേശനയത്തെ സോണിയാ ഗാന്ധി വിമർശിച്ച് ലേഖനമെഴുതിയതിന് പിന്നാലെ, അതേ നയത്തെ പ്രശംസിച്ച് തരൂർ രംഗത്ത്‌ വന്നു. പാർട്ടിയുടെ ഉന്നതപദവിയിലിരുന്ന് ബിജെപിക്ക് കൃത്യമായ രാഷ്ട്രീയ ആയുധമാണ് തരൂർ നൽകുന്നതെന്നും ഇത് എന്തെങ്കിലും പദവിയോ ലക്ഷ്യമോ മുന്നിൽക്കണ്ടുള്ള കളിയാണെന്നുമാണ് കോൺഗ്രസ് വിലയിരുത്തുന്നത്. അച്ചടക്കനടപടിയെടുത്ത് തരൂരിന് കൂടുതൽ പ്രസക്തി നൽകുന്നില്ലെന്നാണ് ജനറൽ സെക്രട്ടറി കെ.സി. വേണുഗോപാലിന്റെ പ്രതികരണത്തിലും തെളിയുന്നത്. അങ്ങനെയെങ്കിൽ, താനും പുറത്തേക്കെന്ന സൂചനയാണ് തരൂർ ‘എക്‌സി’ൽ നൽകിയ പരോക്ഷ മറുപടിയിലുള്ളത്.

ശശി തരൂർ തിരുവനന്തപുരം പാർലമെന്റ് മണ്ഡലത്തിന്റെ കാര്യത്തിൽ  തീരെ ശ്രദ്ധാലുവല്ല. എഴുത്തുകാരൻ, പ്രഭാഷകൻ എന്നീ നിലകളിൽ തനിക്ക് പിടിപ്പത് പണിയുണ്ടെന്നാണ് അദ്ദേഹത്തിന്റെ നിലപാട്. തിരുവനന്തപുരത്തെ കോൺഗ്രസ് പ്രവർത്തകർക്കും ഇതിൽ നിരാശയുണ്ട്. കൂടുതൽ സമയവും അദ്ദേഹം ഡൽഹിയിലാണ് താമസം. 

ഇതെല്ലാം കെ പി സി സി നേതൃത്വത്തെ ചൊടിപ്പിച്ചിട്ടുണ്ട്. കോൺഗ്രസുകാരനായിരിക്കണമെങ്കിൽ പാർട്ടിക്ക് വിധേയനായിരിക്കണം എന്നു തന്നെയാണ് നേതാക്കൾ വിശ്വസിക്കുന്നത്. ഇതെല്ലാം ബി ജെ പിയുടെ സാധ്യതകൾ വർധിപ്പിക്കുന്നു.തരൂരിനെതിരെ മത്സരിക്കാൻ  ഇടതു മുന്നണിക്ക് സാധാരണ ഗതിയിൽ സ്ഥാനാർത്ഥികളെ കിട്ടാറില്ല. സി പി ഐ ക്കാണ് തിരുവനന്തപുരം സീറ്റ് ഇടതു മുന്നണി നൽകിയിട്ടുള്ളത്.  കിട്ടുന്ന ആരെയെങ്കിലും മത്സരിപ്പിക്കുക  എന്നതിൽ കവിഞ്ഞ് തിരുവനന്തപുരത്ത് സി പി ഐ ക്ക് സ്ഥിരം സ്ഥാനാർത്ഥികളൊന്നുമില്ല.ശശി തരൂരും കോൺഗ്രസ് നേതൃത്വവും തമ്മിലുള്ള ഭിന്നത രൂക്ഷമാണ്. ഡൽഹിയിൽ രാഹുൽ ഗാന്ധിയുമായി കൊമ്പുകോർക്കുന്ന തരൂർ കേരളത്തിൽ  കെ സുധാകരൻ ഉൾപ്പെടെയുള്ള നേതാക്കളുമായി  പലവട്ടം കൊമ്പുകോർത്തിട്ടുണ്ട്. 

തിരുവനന്തപുരം വിമാനത്താവളം സ്വകാര്യവത്കരണത്തിൽ തരൂർ നിന്നത്  നരേന്ദ്ര മോദിക്ക് ഒപ്പമാണ്. കരൺ അദാനിയുമായുള്ള ബന്ധമാണ് ഇതിന് പിന്നിലെന്ന് കോൺഗ്രസ് നേതൃത്വം കരുതുന്നത്. തരൂരിന്റെ ഭാര്യയുടെ മരണവുമായി ബന്ധപ്പെട്ട് ബി ജെ പി സ്വീകരിക്കുന്ന തണുപ്പൻ  നീക്കം അദാനി കുടുംബത്തിന്റെ ഇടപെടൽ വഴി സംഭവിച്ചതെന്നാണ് കോൺഗ്രസ് കരുതുന്നത്. വിമാനത്താവള വിഷയത്തിൽ സംസ്ഥാന കോൺഗ്രസ് തൂരിനെ തള്ളിയിരുന്നു.നരേന്ദ്ര മോദിയുമായി തരൂരിന് നല്ല ബന്ധമുണ്ടെന്ന് കോൺഗ്രസ് നേതൃത്വം കരുതുന്നു.  കരൺ അദാനി തിരുവനന്തപുരത്ത്എത്തുമ്പോൾ തരൂരിൻ്റെ അതിഥിയാകുന്നതു  പതിവാണ്.

കോൺഗ്രസ് അധ്യക്ഷ സ്ഥാനത്തേക്ക് മത്സരിച്ച് തോറ്റ തരൂർ പാർട്ടിയിലില്ലാത്തതു പോലെയാണ് ഇപ്പോഴും.. ജ്യോതി രാജസിന്ധ്യ മുതൽ ഗലാം നബി ആസാദ് വരെയുള്ള നേതാക്കൾ പുറത്തു പോയത് തരൂരിന് നന്നായി അറിയാം.

ബി ജെ പിയുടെ ലക്ഷ്യം കോൺഗ്രസിനുള്ളിൽ കലഹം ഉണ്ടാക്കുക എന്നത് മാത്രമായിരിക്കും. സീനിയർ നേതാക്കൾ ഓരോരുത്തരായി പുറത്തു പോയി ബിജെപി പാളയത്തിൽ ചേക്കേറുന്നത് കോൺഗ്രസ് നേതൃത്വം കണ്ടിട്ടും പ്രതികരിക്കാതിരിക്കുന്നത് അതുകൊണ്ടാണ്. പോകുന്നവരെല്ലാം പോകട്ടെ എന്ന നിലപാടാണ് ഹൈകമാൻറിനുള്ളത്.തരൂരിൻ്റെ പോക്കും അവർ കണക്കുകൂട്ടുന്നു.തരൂർ പോയാൽ തിരുവനന്തപുരം സീറ്റ് കിട്ടുമല്ലോ എന്ന പ്രതീക്ഷയിലാണ്  കോൺഗ്രസ് നേതാക്കൾ.