കാസെറ്റ് കടയില്‍ നിന്ന് പൊലീസ് പത്ത് അശ്ലീല കാസെറ്റുകള്‍ പിടിച്ചെടുത്തു; 28 വര്‍ഷങ്ങള്‍ക്കുശേഷം കോട്ടയം സ്വദേശിയെ കുറ്റവിമുക്തനാക്കി കോടതി
വര്‍ഷങ്ങള്‍ക്കുമുമ്പ് കാസെറ്റ് കടയില്‍ നിന്ന് അശ്ലീല വീഡിയോ കാസെറ്റുകള്‍ പിടിച്ചു എന്ന കുറ്റത്തിന് ശിക്ഷിക്കപ്പെട്ടയാളെ 28 വര്‍ഷത്തിനുശേഷം കുറ്റവിമുക്തനാക്കി ഹൈക്കോടതി. കോട്ടയം കൂരോപ്പട സ്വദേശിയെയാണ് ഹൈക്കോടതി കുറ്റവിമുക്തനാക്കിയത്. തെളിവിനായി ഹാജരാക്കിയ കാസെറ്റുകള്‍ മജിസ്‌ട്രേറ്റ് സ്വമേധയാ പരിശോധിച്ചില്ല എന്നതിനാല്‍ ഇന്ത്യന്‍ തെളിവുനിയമം അനുസരിച്ച് കേസ് നിലനില്‍ക്കില്ല എന്ന് വ്യക്തമാക്കിയാണ് ജസ്റ്റിസ് കൗസര്‍ എടപ്പഗത്ത് വിധി പുറപ്പെടുവിച്ചത്.
1997ലാണ് കേസിനാസ്പദമായ സംഭവം നടന്നത്. കൂരോപ്പട പഞ്ചായത്തില്‍ ഹര്‍ജിക്കാരന്റെ ഉടമസ്ഥതയിലുള്ള കാസെറ്റ് കടയില്‍ നിന്ന് പൊലീസ് പത്ത് അശ്ലീല കാസെറ്റുകള്‍ പിടിച്ചെടുത്തിരുന്നു. ഇവയില്‍ അശ്ലീല ദൃശ്യങ്ങള്‍ ഉണ്ടെന്ന് പറഞ്ഞായിരുന്നു നടപടി. ഇന്ത്യയില്‍ അശ്‌ളീല ദൃശ്യങ്ങള്‍ വില്‍ക്കുന്നതും വിതരണം ചെയ്യുന്നതും വാണിജ്യാവശ്യത്തിനായി ഉപയോഗിക്കുന്നതും കുറ്റകരമാണ്. തുടര്‍ന്ന് കോട്ടയം മജിസ്‌ട്രേറ്റ് കോടതി കോട്ടയം സ്വദേശിയെ രണ്ടുവര്‍ഷം തടവിനും 2000 രൂപ പിഴയ്ക്കും ശിക്ഷിച്ചു. ഇതിനെതിരെ ഹര്‍ജിക്കാരന്‍ സെഷന്‍സ് കോടതിയെ സമീപിച്ചപ്പോള്‍ ശിക്ഷാവിധി ഒരു വര്‍ഷമായും 1000 രൂപയായും കുറച്ചു. തുടര്‍ന്ന് ഹര്‍ജിക്കാരന്‍ ഹൈക്കോടതിയെ സമീപിക്കുകയായിരുന്നു.
അന്വേഷണ ഉദ്യോഗസ്ഥനായ ഏഴാം സാക്ഷി ഉള്‍പ്പെടെ ഏഴ് സാക്ഷികളാണ് കേസിലുള്ളത്. ഒന്നും രണ്ടും സാക്ഷികള്‍ക്കൊപ്പം ഏഴാം സാക്ഷി കാസെറ്റുകള്‍ കടയില്‍ വച്ചുതന്നെ കണ്ട് ഇവയില്‍ അശ്ലീല ദൃശ്യങ്ങള്‍ ഉണ്ടെന്ന് കണ്ടെത്തിയതായി പ്രോസിക്യൂഷന്‍ വാദിച്ചു. അന്വേഷണത്തിനിടയില്‍ തഹസില്‍ദാര്‍ വീഡിയോ കാസെറ്റുകള്‍ കാണുകയും അവയില്‍ അശ്ലീല ദൃശ്യങ്ങളുണ്ടെന്ന് സാക്ഷ്യപ്പെടുത്തുകയും ചെയ്തു. അന്നത്തെ പാമ്പാടി എസ്‌ഐയും തഹസില്‍ദാര്‍ക്കൊപ്പം കാസെറ്റ് കണ്ട് ഇവയില്‍ അശ്ലീല ദൃശ്യങ്ങളുണ്ടെന്ന് സാക്ഷ്യപ്പെടുത്തി.
എന്നാല്‍ പിടിച്ചെടുത്ത വീഡിയോ കാസെറ്റില്‍ അശ്ലീല ദൃശ്യങ്ങളുണ്ടോയെന്ന് വാദം കേട്ട മജിസ്‌ട്രേറ്റ് സ്വമേധയാ കണ്ട് ബോദ്ധ്യപ്പെട്ടില്ല എന്ന് ഹര്‍ജിക്കാരന്‍ വാദിച്ചു. ഇതാണ് ഹൈക്കോടതി അംഗീകരിച്ചത്. സാക്ഷിമൊഴികള്‍ ഉണ്ടെങ്കിലും തന്റെ മുമ്പാകെ ഹാജരാക്കിയ തെളിവ് നേരിട്ട് പരിശോധിച്ച് ഉറപ്പാക്കുകയെന്നത് മജിസ്‌ട്രേറ്റ് ചെയ്യേണ്ട കാര്യമായിരുന്നുവെന്നും ഹൈക്കോടതി നിരീക്ഷിച്ചു. അതിനാല്‍ത്തന്നെ കടയില്‍ നിന്ന് പിടിച്ചെടുത്ത കാസെറ്റുകളില്‍ അശ്ലീല ദൃശ്യങ്ങളുണ്ടെന്ന പേരില്‍ ഹര്‍ജിക്കാരനെ ശിക്ഷിച്ചതും കേസും റദ്ദാക്കുന്നുവെന്ന് കോടതി ഉത്തരവിട്ടു.
https://www.facebook.com/Malayalivartha
