പൂജയ്‌ക്കെത്തിയ യുവതിയെ പീഡിപ്പിച്ചെന്ന പരാതി വ്യാജമാണെന്നും ഹണിട്രാപ്പാണെന്നും കര്‍ണ്ണാടക പൊലീസ് കണ്ടെത്തി.സംഭവത്തില്‍ അഞ്ചുപേരെ അറസ്റ്റുചെയ്തു.ബംഗളൂരു സ്വദേശിനിയും മസാജ് പാര്‍ലര്‍ ജീവനക്കാരിയുമായ രത്‌ന,രത്‌നയുടെ സഹായി മോണിക്ക,പാലക്കാട് സ്വദേശിയും കൂര്‍ഗില്‍ താമസക്കാരനും ഇവന്റ് മാനേജ്‌മെന്റ് കമ്പനിയുടമയുമായ ശരത് മേനോന്‍,സജിത്ത്, ആലം എന്നിവരെയാണ് ബെലന്തൂരു പൊലീസ് അറസ്റ്റുചെയ്തത്. ദേവസ്ഥാനം തന്ത്രി ഉണ്ണി ദാമോദരന്റെ മരുമകന്‍ ടി.എ.അരുണിനെ ഹണിട്രാപ്പില്‍ കുടുക്കിയതാണെന്ന് എഫ്.ഐ.ആറിലുണ്ട്. കര്‍ണാടക ആഭ്യന്തരമന്ത്രി ജി.പരമേശ്വരയ്ക്ക് നല്‍കിയ പരാതിയിലാണിവര്‍ അറസ്റ്റിലായത്.

യുവതിയെ പീഡിപ്പിച്ചെന്ന പരാതിയില്‍ അരുണിനെ കര്‍ണാടക പൊലീസ് അറസ്റ്റുചെയ്തിരുന്നു.ഉണ്ണി ദാമോദരനെയും അറസ്റ്റുചെയ്യാന്‍ ശ്രമിച്ചിരുന്നു. കുടുംബത്തിനും ക്ഷേത്രത്തിനുമെതിരെ ഗൂഢാലോചന നടത്തി വ്യാജ പ്രചാരണം നടത്തുന്നവര്‍ക്കെതിരെ കൂടുതല്‍ അന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയനുള്‍പ്പെടെ പരാതി നല്‍കിയിട്ടുണ്ടെന്ന് ഉണ്ണി ദാമോദരന്റെ മകള്‍ ഉണ്ണിമായ സൂരജ് പറഞ്ഞു.