ബിജെപി സംസ്ഥാന അധ്യക്ഷനും മുന്‍ കേന്ദ്രമന്ത്രിയുമായ രാജീവ് ചന്ദ്രശേഖറിന്റെ പിതാവ് എയര്‍ കമ്മഡോര്‍ മാങ്ങാട്ടില്‍ കാരക്കാട് (എം കെ) ചന്ദ്രശേഖര്‍( 92) അന്തരിച്ചു. ബെംഗളൂരുവിലെ ആശുപത്രിയില്‍ ചികിത്സയിലായിരുന്നു അദ്ദേഹം. 1954ല്‍ ഇന്ത്യന്‍ വ്യോമസേനയില്‍ പ്രവേശിച്ച എം കെ ചന്ദ്രശേഖര്‍ എയര്‍ കമ്മഡോറായി 1986 ല്‍ വിരമിച്ചു. തൃശ്ശൂര്‍ ദേശമംഗലം സ്വദേശിയാണ്.

നീണ്ടകാലം എയര്‍ കമ്മഡോര്‍ എം കെ ചന്ദ്രശേഖര്‍ ഇന്ത്യന്‍ വ്യോമസേനയുടെ അഭിമാന ചിഹ്നമായ ഡെക്കോട്ട വിമാനത്തിന്റെ വൈമാനികനായിരുന്നു. 1933 ല്‍ തൃശ്ശൂര്‍ ദേശമംഗലത്ത് ടി ഗോവിന്ദന്‍ നായരുടെ മകനായി എം.കെ ചന്ദ്രശഖറിന്റെ ജനനം. വിദ്യാഭ്യാസത്തിന് ശേഷം 1954ല്‍ അദ്ദേഹം ഇന്ത്യന്‍ വ്യോമസേനയുടെ ചേര്‍ന്നു.1986ല്‍ എയര്‍ കമ്മഡോറായി വിരമിച്ചു.

ഇക്കാല ഘട്ടത്തിനിടയില്‍ ഇന്ത്യന്‍ വ്യോമസേനയുടെ ചരിത്രത്തിന്റെ ഭാഗമായ നിര്‍ണ്ണായക ഓപ്പറേഷനുകളുടെ പങ്കെടുത്തു. 1947 മുതല്‍ 1971വരെ ഈ വിമാനം വായുസേനയുടെ അഭിമാനമായിരുന്നു ഡെക്കോട്ട വിമാനങ്ങള്‍. പാകിസ്ഥാനും ബംഗ്ലാദേശിനും എതിരായ യുദ്ധങ്ങളില്‍ അദ്ദേഹം ഡെക്കോട്ട വിമാനങ്ങള്‍ പറത്തി. കാലപ്പഴക്കത്താല്‍ ഡെക്കോട്ട വിമാനങ്ങളെ സൈന്യത്തില്‍ നിന്ന് പിന്‍വലിച്ചെങ്കിലും പിതാവിന്റെ യുദ്ധ സ്മരണകള്‍ നിറഞ്ഞു നില്‍ക്കുന്ന വിമാനം മകന്‍ രാജീവ് ചന്ദ്രശേഖര്‍ ഇംഗ്ലണ്ടില്‍ നിന്ന് തിരികെ എത്തിച്ച് കേടുപാടുകള്‍ തീര്‍ത്ത് വ്യോമസേനയ്ക്ക് തന്നെ സമ്മാനിക്കുകയും ചെയ്തു.