തിരുവനന്തപുരം കെഎസ്ആര്‍ടിസി ബസില്‍ യാത്രാമധ്യേ വീട്ടമ്മയുടെ 20 പവന്‍ സ്വര്‍ണാഭരണങ്ങള്‍ മോഷണം പോയി. വാവരമ്പലം എസ്എസ് മന്‍സിലില്‍ ഷമീന ബീവിയുടെ ബാഗിലുണ്ടായിരുന്ന 20 പവന്‍ സ്വര്‍ണമാണ് കവര്‍ന്നത്. നെടുമങ്ങാട് പനവൂര്‍ ആറ്റിന്‍പുറത്തുള്ള മരുമകളുടെ വീട്ടില്‍ പോയി തിരികേവരുകയായിരുന്നു. ശനിയാഴ്ച ഉച്ചയ്ക്ക് 12 മണിയോടെയാണ് സംഭവം നടന്നത്.

വെഞ്ഞാറമൂടുനിന്ന് കെഎസ്ആര്‍ടിസി ബസില്‍ പോത്തന്‍കോട് ബസ് ടെര്‍മിനലില്‍ ഇറങ്ങി പച്ചക്കറിക്കടയില്‍ കയറി സാധനം വാങ്ങാന്‍ ബാഗ് തുറക്കുമ്പോഴാണ് സ്വര്‍ണം നഷ്ടമായ വിവരം അറിയുന്നത്.

ആറു വള, ഒരു നെക്ലസ്, രണ്ട് ജോഡി കമ്മല്‍, അഞ്ച് മോതിരം എന്നിവയാണ് നഷ്ടപ്പെട്ടതെന്ന് ഷമീന ബീവി നല്‍കിയ പരാതിയില്‍ പറയുന്നു. ഹാന്‍ഡ് ബാഗിനുള്ളില്‍ ചെറിയ പഴ്സിനകത്ത് ചെറിയ ബോക്സിനുള്ളിലാണ് സ്വര്‍ണം സൂക്ഷിച്ചിരുന്നത്. ബാഗിന്റെയും ചെറിയ പഴ്സിന്റെയും സിബ്ബ് തുറന്നാണ് സ്വര്‍ണം കവര്‍ന്നത്.എവിടെ വെച്ചാണ് സ്വര്‍ണം മോഷണം പോയതെന്ന് വ്യക്തമല്ല.