വാഹനാപകടത്തിൽപ്പെട്ട് ഗുരുതരമായി പരിക്കേറ്റ സ്ത്രീയെ ആശുപത്രിയിലേക്കു കൊണ്ടുപോകും വഴി ഓട്ടോറിക്ഷാ ഡ്രൈവർ കുഴഞ്ഞുവീണ് മരിച്ചു. എസ്റ്റേറ്റ് പൂഴിക്കുന്ന് കാർത്തിക ഭവനിൽ സജിത്ത്കുമാർ(55) ആണ് മരിച്ചത്. ഇന്നലെ രാവിലെ കോലിയക്കോട് ഭാഗത്തുവെച്ച് സ്‌കൂട്ടറുകൾ കൂട്ടിയിടിച്ചാണ് ഒരു സ്ത്രീയ്ക്ക് ഗുരുതരമായി പരിക്കേറ്റത്‌.

സംഭവസ്ഥലത്തുണ്ടായിരുന്ന സജിത്ത് കുമാർ ഓടിയെത്തി പരിക്കേറ്റ സ്ത്രീയെ ഓട്ടോറിക്ഷയിൽ കയറ്റി ആശുപത്രിയിലേക്കു തിരിച്ചു. കിള്ളിപ്പാലത്തിനു സമീപമെത്തിയപ്പോൾ ഓട്ടോറിക്ഷയിൽ ഒപ്പമുണ്ടായിരുന്ന സജിയെന്നയാളോട് തലചുറ്റുന്നുവെന്നുപറഞ്ഞ് സജിത്ത്കുമാർ വാഹനമൊതുക്കിനിർത്തി. ഇതിനുപിന്നാലെ കുഴഞ്ഞുവീഴുകയും ചെയ്തു.

പരിക്കേറ്റ സ്ത്രീയെ മറ്റൊരു വാഹനത്തിൽ ആശുപത്രിയിലെത്തിച്ചു. കുഴഞ്ഞുവീണ സജിത്ത് കുമാറിനെ ആംബുലൻസിൽ ജനറൽ ആശുപത്രിയിലുമെത്തിച്ചെങ്കിലും രക്ഷിക്കാൻ കഴിഞ്ഞില്ല. സംസ്കാരം ബുധനാഴ്ച നടത്തും. ഭാര്യ: മീനകുമാരി. മക്കൾ: അശ്വതി, ലക്ഷ്മി. മരുമക്കൾ: വിനീത്, സന്തോഷ്.