തിരഞ്ഞെടുപ്പില്‍ ഒരാളെ നിര്‍ബന്ധിപ്പിച്ചു മല്‍സരിപ്പിക്കാനാകില്ലെന്നും പിന്മാറേണ്ടവര്‍ക്കു പിന്മാറാമെന്ന് മുഖ്യമന്ത്രി ഉമ്മന്‍ ചാണ്ടി. മല്‍സരിക്കുന്നവരും പാര്‍ട്ടിയുമാണ് അന്തിമ തീരുമാനം എടുക്കേണ്ടത്. യുവാക്കള്‍ക്ക് അവസരം നല്‍കുന്നതിനായി താന്‍ മല്‍സര രംഗത്തുനിന്നു പിന്മാറുകയാണെന്ന് ടി.എന്‍.പ്രതാപന്‍ പറഞ്ഞിരുന്നു. അതേസമയം, ടി.എന്‍.പ്രതാപനെ മുന്‍നിര്‍ത്തിയുള്ള കെപിസിസി പ്രസിഡന്റ് വി.എം.സുധീരന്റ നീക്കത്തിനു തടയിട്ട് എ, ഐ ഗ്രൂപ്പുകള്‍. സുധീരന്‍ നിലപാടു കടുപ്പിച്ചാല്‍ ഹൈക്കമാന്‍ഡിനെ സമീപിക്കാനാണ് ഇരുകൂട്ടരുടെയും തീരുമാനം.

സുധീരനെതിരെ പരോക്ഷ വിമര്‍ശനങ്ങളുമായി ഗ്രൂപ്പ് നേതാക്കള്‍ രംഗത്തെത്തിയിരുന്നു. സ്ഥാനാര്‍ഥി നിര്‍ണയ ചര്‍ച്ചകള്‍ അന്തിമ ഘട്ടത്തിലേക്കു കടക്കവെയാണ് നാലുതവണ ജയിച്ചവര്‍ മാറിനില്‍ക്കണമെന്ന നിലപാട് വി.എം.സുധീരന്‍ കടുപ്പിക്കുന്നത്. കെ.സിജോസഫ്, അടൂര്‍ പ്രകാശ്, തിരുവഞ്ചൂര്‍ രാധാകൃഷ്ണന്‍, ആര്യാടന്‍ മുഹമ്മദ് തുടങ്ങി ഇരുഗ്രൂപ്പുകളിലെയും പ്രമുഖരെ ഉന്നമിട്ടാണിത്. ടി.എന്‍.പ്രതാപന്റ മല്‍സര രംഗത്ത് നിന്നുള്ള സ്വയം പിന്‍മാറ്റവും സുധീരന്‍ ആയുധമാക്കുന്നു. എന്നാല്‍ അതിനെ വകവച്ചു കൊടുക്കേണ്ടെന്നാണ് ഇരുഗ്രൂപ്പുകളുടെയും നിലപാട്.

പ്രതാപന്റേത് വ്യക്തിപരമായ തീരുമാനം മാത്രമാണന്നും എ ഗ്രൂപ്പ് നേതൃത്വം പറയുന്നു. അതേസമയം സുധീരനെ അനുകൂലിക്കുന്നവര്‍ പ്രതാപനെ പിന്തുണച്ച് രംഗത്തെത്തി. എന്തായാലും സുധീരനെതിരെ ഒന്നിച്ചുനീങ്ങാന്‍ എ,ഐ ഗ്രൂപ്പുകള്‍ തീരുമാനിച്ച സാഹചര്യത്തില്‍ സ്ഥാനാര്‍ഥി നിര്‍ണയ ചര്‍ച്ചകള്‍ സങ്കീര്‍ണമാകും. 26നാണ് കരടുപട്ടിക ചര്‍ച്ച ചെയ്യാന്‍ തിരഞ്ഞെടുപ്പ് കമ്മിറ്റി യോഗം ചേരുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha