ഇന്ന് പുലര്‍ച്ചെ തിരുവനന്തപുരത്തുണ്ടായ 2 റോഡപകടങ്ങളില്‍ 4 യുവാക്കള്‍ക്കു ദാരുണാന്ത്യം. ഉള്ളൂരിലും വേളിയിലുമാണ് അപകടമുണ്ടായത്. ഉള്ളൂര്‍ ആക്കുളം റോഡില്‍ പ്രശാന്ത് നഗര്‍ റോഡിന് സമീപം ബൈക്കില്‍ കാറിടിച്ചായിരുന്നു അപകടം. ആക്കുളം ഭാഗത്ത് നിന്നു ഉള്ളൂരിലേക്ക് വന്ന ബൈക്കില്‍ എതിര്‍ ഭാഗത്ത് നിന്ന് വന്ന കാറിടിച്ചാണ് ബൈക്ക് യാത്രികരായ യുവാക്കള്‍ മരിച്ചത്. അഴിക്കോട് കുറുങ്ങോട് ആലമുക്ക് സര്‍ജ്ജു മന്‍സിലില്‍ മുഹമ്മദ് ഫവാസ് (23), അഴിക്കോട് മണ്ടക്കുഴി തെറ്റിയോടുമുകള്‍ വീട്ടില്‍ മുഹമ്മദ് ഫൈസി (21) എന്നിവരാണ് മരിച്ചത്. മുഹമ്മദ് ഫവാസ് കരകുളം കെല്‍ട്രോണ്‍ ജംക്ഷനിലെ മൊബൈല്‍ ഷോപ്പിലും ഫൈസി അഴീക്കോടിലെ കോഴിക്കടയിലുമാണ് ജോലി ചെയ്തിരുന്നത്.

വേളിയിലും വ്യാഴാഴ്ച പുലര്‍ച്ചെ കാറും ബൈക്കും കൂട്ടിയിടിച്ച് രണ്ടു യുവാക്കള്‍ മരിച്ചു. പൂന്തുറ മാണിക്യവിളാകം സ്വദേശി അബ്ബാസ് (20), പൂന്തുറ സ്വദേശി ശഫാത്ത് (26) എന്നിവരാണ് മരിച്ചത്. ഓള്‍സെയ്ന്റ്‌സ് ഭാഗത്തുനിന്ന് വേളിയിലേക്കു പോയ ബൈക്കില്‍ എതിര്‍ഭാഗത്തുനിന്ന് വന്ന കാര്‍ ഇടിക്കുകയായിരുന്നു. ഇടിയുടെ ആഘാതത്തില്‍ റോഡില്‍ തെറിച്ചുവീണ യുവാക്കളെ വലിയതുറ പൊലീസ് മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. ഇരുവരുടെയും മൃതദേഹങ്ങള്‍ പൂന്തുറ പുത്തന്‍പള്ളി ഖബര്‍സ്ഥാനില്‍ കബറടക്കി.