നിയമസഭാ തിരഞ്ഞെടുപ്പ് ഫലം വരുന്നതിന് മുന്‍പ് മുഖ്യമന്ത്രി സ്ഥാനത്തെച്ചൊല്ലി ചര്‍ച്ചകള്‍ നടക്കുന്നത് സ്വാഭാവികമാണെന്നും അതില്‍ തെറ്റില്ലെന്നും കെ.പി.സി.സി അധ്യക്ഷന്‍ കെ. സുധാകരന്‍. ഇത്തരം ചര്‍ച്ചകള്‍ കോണ്‍ഗ്രസിന്റെ രാഷ്ട്രീയ രീതിയുടെ ഭാഗമാണെന്നും ജനാധിപത്യ സംവിധാനത്തില്‍ എല്ലാവര്‍ക്കും അഭിപ്രായം പറയാന്‍ സ്വാതന്ത്ര്യമുണ്ടെന്നും അദ്ദേഹം മാധ്യമങ്ങളോട് പറഞ്ഞു.

തിരഞ്ഞെടുപ്പ് ഫലം വരും മുന്‍പുള്ള ചര്‍ച്ചകള്‍ പാര്‍ട്ടിയെ ഒരു തരത്തിലും ദോഷകരമായി ബാധിക്കില്ലെന്ന് സുധാകരന്‍ വ്യക്തമാക്കി. 'തീരുമാനമെടുക്കുന്നത് വരെ ചര്‍ച്ചകള്‍ നടക്കാം. ചര്‍ച്ചകള്‍ നടന്നാല്‍ മാത്രമേ വ്യക്തമായ ഒരു തീരുമാനത്തിലേക്ക് എത്താന്‍ സാധിക്കൂ. ഇത് വ്യക്തിപരമായ താല്‍പ്പര്യങ്ങളല്ല, മറിച്ച് പാര്‍ട്ടി തലത്തിലുള്ള ചര്‍ച്ചകളാണ്. കേരളത്തില്‍ മുന്‍പും ഇത്തരം കീഴ്വഴക്കങ്ങള്‍ ഉണ്ടായിട്ടുണ്ട്,' അദ്ദേഹം കൂട്ടിച്ചേര്‍ത്തു. അന്തിമ തീരുമാനം എടുക്കേണ്ടത് ഹൈക്കമാന്‍ഡാണെന്നും അതിനുള്ള പ്രക്രിയയുടെ ഭാഗമാണ് ഈ ചര്‍ച്ചകളെന്നും അദ്ദേഹം ഓര്‍മ്മിപ്പിച്ചു.

മുഖ്യമന്ത്രി സ്ഥാനത്തെക്കുറിച്ച് എം.കെ രാഘവന്‍ എം.പി നടത്തിയ പരാമര്‍ശങ്ങള്‍ അദ്ദേഹത്തിന്റെ വ്യക്തിപരമായ അഭിപ്രായമാണെന്ന് സുധാകരന്‍ പറഞ്ഞു. ഓരോരുത്തര്‍ക്കും വ്യത്യസ്തമായ അഭിപ്രായങ്ങള്‍ ഉണ്ടാകാം. അവ തുറന്നു പറയാനുള്ള പൂര്‍ണ്ണമായ സ്വാതന്ത്ര്യം കോണ്‍ഗ്രസിനുള്ളിലുണ്ട്. അത്തരം അഭിപ്രായങ്ങള്‍ സ്വീകരിക്കണോ വേണ്ടയോ എന്നത് പാര്‍ട്ടി തീരുമാനിക്കും. അഭിപ്രായസ്വാതന്ത്ര്യത്തെ ഉള്‍ക്കൊള്ളുന്നതാണ് കോണ്‍ഗ്രസിന്റെ ജനാധിപത്യ രീതിയെന്നും അദ്ദേഹം വിശദീകരിച്ചു.