അംബേദ്കറിന്റെ സംഭാവനകളെ പൂഴ്ത്തിവച്ച കോണ്ഗ്രസ് രാജ്യത്തോട് മാപ്പു പറയണമെന്ന് മോഡി
ഇന്ത്യന് ഭരണഘടനയുടെ ശില്പിയായ ഡോ. ബി.ആര്.അംബേദ്കറുടെ സംഭാവനകളെ ഇത്രകാലവും പൂഴ്ത്തിവച്ച കോണ്ഗ്രസ് രാജ്യത്തോട് മാപ്പു പറയണമെന്ന് പ്രധാനമന്ത്രി നരേന്ദ്ര മോഡി. അംബേദ്കറിന്റെ 125-ാം ജന്മവാര്ഷികത്തോട് അനുബന്ധിച്ച് അദ്ദേഹത്തിന്റെ ജന്മഗ്രാമമായ മൗവില് സംഘടിപ്പിച്ച റാലിയില് സംസാരിക്കവെയാണ് കോണ്ഗ്രസിനെതിരെ ആഞ്ഞടിച്ചത്. തന്റെ സര്ക്കാരിന്റെ പ്രവര്ത്തനങ്ങളത്രെയും അംബേദ്കറിന്റെ സ്വപ്നങ്ങള് പൂവണിയിക്കുന്നതിനുള്ളതാണെന്നും മോഡി വ്യക്തമാക്കി.
അംബേദ്കറിനെക്കുറിച്ച് വാചാലരാകുന്ന കോണ്ഗ്രസുകാര് എന്തുകൊണ്ടാണ് 60 വര്ഷത്തോളം കാലം രാജ്യം ഭരിച്ചിട്ടും അംബേദ്കറിന്റെ ജീവിതത്തിലെ നിര്ണായകമായ അഞ്ച് സ്ഥലങ്ങളില് സ്മാരകങ്ങളൊന്നും നിര്മിക്കാതിരുന്നതെന്നും മോഡി ചോദിച്ചു. വിവിധ സര്ക്കാരുകള് വര്ഷങ്ങളോളം പൂഴ്ത്തിവച്ച അംബേദ്കറിന്റെ സ്വപ്നങ്ങള്ക്ക് ചിറക് നല്കുന്ന പ്രവര്ത്തനങ്ങളാണ് അധികാരമേറ്റതു മുതല് തന്റെ സര്ക്കാര് ചെയ്യുന്നതെന്നും മോഡി അവകാശപ്പെട്ടു.
മോഡി ഇതൊക്കെ ചെയ്യുന്നതില് ചില ആളുകള് നിരാശരായിരിക്കുകയാണ്. ഇത് നമുക്ക് രാജ്യത്തോടുള്ള അര്പ്പണ മനോഭാവത്തിന്റെയും നമ്മുടെ ബോധ്യത്തിന്റെയും പ്രശ്നമാണ്. സാമൂഹിക ഐക്യമെന്നത് നേടാന് ഏറ്റവും ഉചിതമായ മാര്ഗം അംബേദ്കര് നമുക്ക് കാണിച്ചു തന്നതാണ്. അദ്ദേഹത്തിന്റെ പാദാന്തികത്തിങ്കത്തില് ജോലി ചെയ്യുന്നതില് എനിക്ക് അഭിമാനം തോന്നുന്നുവെന്ന് മോഡി പറഞ്ഞു.
സാധാരണക്കാരിയായ ഒരു അമ്മയുടെ മകന് ഇന്ത്യയുടെ പ്രധാനമന്ത്രിയാകാന് സാധിച്ചിട്ടുണ്ടെങ്കില് അതിന്റെ മുഴുവന് ക്രെഡിറ്റും അംബേദ്കറിനുള്ളതാണെന്നും മോഡി പറഞ്ഞു. ഡല്ഹിയിലെ 26-ാം നമ്പര് ആലിപുര് റോഡില് അംബേദ്കര് തന്റെ അവസാന കാലം ചെലവിട്ട വീട് സ്മാരകമാക്കി മാറ്റാനുള്ള തീരുമാനത്തിലാണ് മോഡി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
