ജാമ്യം റദ്ദാക്കണമെന്ന് ആവശ്യപ്പെട്ടുള്ള അന്വേഷണസംഘത്തിൻ്റെ ഹരജിയിൽ മറുപടി നൽകാൻ വീണ്ടും സമയം ആവശ്യപ്പെട്ട് രാഹുൽ മാങ്കൂട്ടത്തിൽ എംഎൽഎ. ഇത് രണ്ടാം തവണയാണ് രാഹുൽ കോടതിയിൽ സമയം നീട്ടി ചോദിക്കുന്നത്. തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഹരജി അടുത്ത ചൊവ്വാഴ്ചത്തേക്ക് കേസ് മാറ്റി. കേസ് ഇന്ന് കോടതി വീണ്ടും പരിഗണിച്ചപ്പോഴാണ് മറുപടി സത്യവാങ്മൂലം സമർപ്പിക്കാൻ കൂടുതൽ സമയം വേണമെന്ന് രാഹുൽ മാങ്കൂട്ടത്തിൽ ആവശ്യപ്പെട്ടത്.

ഈ സാഹചര്യത്തിലാണ് മാർച്ച് 10-ലേക്ക് കേസ് മാറ്റിവെച്ചത്.തനിക്കെതിരെ പരാതി നൽകിയ അതിജീവിതയെ സ്വാധീനിക്കാൻ ശ്രമിച്ചു എന്നാരോപിച്ചാണ് അന്വേഷണസംഘം കോടതിയെ സമീപിച്ചത്. കോടതിയിൽ രഹസ്യമൊഴി നൽകിയതിന്റെ തൊട്ടടുത്ത ദിവസം രാഹുൽ മാങ്കൂട്ടത്തിൽ തന്നെ വാട്സാപ്പിലൂടെ വിളിക്കാൻ ശ്രമിച്ചതായി പരാതിക്കാരി അന്വേഷണസംഘത്തെ അറിയിച്ചിരുന്നു. ജാമ്യത്തിലിറങ്ങിയ പ്രതി സാക്ഷിയെ സ്വാധീനിക്കാൻ ശ്രമിച്ചത് ജാമ്യവ്യവസ്ഥകളുടെ ലംഘനമാണെന്നും അതിനാൽ ജാമ്യം റദ്ദാക്കണമെന്നുമാണ് പോലീസിന്റെ ആവശ്യം.