അസഭ്യം പറഞ്ഞത് ചോദ്യം ചെയ്ത യുവാവിനെ ക്രൂരമായി മര്‍ദ്ദിച്ച സംഭവത്തില്‍ സഹോദരങ്ങള്‍ അറസ്റ്റില്‍. വെങ്ങാനൂര്‍ നെല്ലിവിള ചരുവിള സ്വദേശികളായ അഖില്‍ (24), അജിന്‍ (23) എന്നിവരെയാണ് വിഴിഞ്ഞം പൊലീസ് പിടികൂടിയത്. നെല്ലിവിള കൊല്ലന്‍വിള സ്വദേശിയായ എ.എം. അരുണിനാണ് (23) ആക്രമണത്തില്‍ പരിക്കേറ്റത്. ചൊവ്വാഴ്ച രാത്രി വവ്വാമൂല കായല്‍ തീരത്തായിരുന്നു സംഭവം.

പ്രതികള്‍ അസഭ്യം പറയുന്നത് ചോദ്യം ചെയ്തതിലുള്ള വിരോധമാണ് ആക്രമണത്തില്‍ കലാശിച്ചത്. വാക്കേറ്റം കയ്യാങ്കളിയിലെത്തുകയും അരുണിനെ ബിയര്‍ കുപ്പി കൊണ്ട് തലയ്ക്കടിക്കുകയും മുഖത്ത് ക്രൂരമായി മര്‍ദ്ദിച്ച് പരിക്കേല്‍പ്പിക്കുകയും ചെയ്യുകയായിരുന്നു. അറസ്റ്റിലായ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു. ഇരുവരും റൗഡിപ്പട്ടികയിലുള്ളവരാണെന്ന് പൊലീസ് പറഞ്ഞു.