തിരുവനന്തപുരം വിമാനത്താവളത്തിനു അംഗീകാരം; എയര്ബസ് പുതിയ മോഡലിന്റെ പരീക്ഷണപ്പറക്കലിനായി തിരഞ്ഞെടുക്കപ്പെട്ടതു തിരുവനന്തപുരം രാജ്യാന്തരവിമാനത്താവളം
ലോകത്തെ മുന്നിര വിമാന നിര്മാതാക്കളായ എയര്ബസ് തങ്ങളുടെ പുതിയ മോഡലായ എ-20 നിയോ വിമാനവുമായി പരീക്ഷണപ്പറക്കലിനു തിരുവനന്തപുരം രാജ്യാന്തരവിമാനത്താവളത്തില് എത്തി.
ഫ്രാന്സില് നിന്നെത്തിയ വിമാനം നാളെവരെ തലസ്ഥാനത്തുണ്ടാകും. കേരളത്തിലെ കാലാവസ്ഥയില് പരീക്ഷണപ്പറക്കല് നടത്തുകയാണു ലക്ഷ്യം. തിരുവനന്തപുരത്തെ പരീക്ഷണപ്പറക്കലിനു തിരഞ്ഞെടുക്കാന് എയര്ബസ് അധികൃതരെ പ്രേരിപ്പിച്ചത് കടല്നിരപ്പിലുള്ള വിമാനത്താവളം എന്ന പ്രത്യേകതയാണ്.
കഴിഞ്ഞ 13-ന് എത്തിയ വിമാനത്തില് ആറു പൈലറ്റുമാരും ഇരുപത്തിയഞ്ചോളം സാങ്കേതികവിദഗ്ധരുമുണ്ട്. ലോകത്തെ ഏറ്റവും ഉയര്ന്ന പ്രദേശത്തുള്ള വിമാനത്താവളമായ ലഡാക്കിലും പരീക്ഷണപ്പറക്കല് നടത്തുന്നുണ്ട്.
എയര്ബസിന്റെ എ-320-യുടെ ന്യൂ എഞ്ചിന് ഓപ്ഷന് (നിയോ) വിമാനമാണു തിരുവനന്തപുരത്തുള്ളത്. ഈ സീരീസില്പ്പെട്ട ആദ്യവിമാനം കഴിഞ്ഞ ജനുവരിയില് ലുഫ്താന്സ എയര് സ്വന്തമാക്കിയിരുന്നു. 20 ശതമാനം ഇന്ധനം ലാഭിക്കാന് കഴിയുന്ന രീതിയിലുള്ള പുതിയ എന്ജിനുകളും ഷാര്ക്ലെറ്റ് വിങ് ടിപ് ഡിവൈസ് ഉള്പ്പെടെയുള്ള സാങ്കേതികസൗകര്യങ്ങളും വിമാനത്തിലുണ്ട്.
എയര്പോര്ട്ട് അതോറിറ്റിയുടെ പ്രത്യേക അനുമതിയോടെയാണു വിമാനം എത്തിയിട്ടുള്ളത്. എയര്ബസ് പുതിയ മോഡലിന്റെ പരീക്ഷണപ്പറക്കലിനായി തിരഞ്ഞെടുക്കപ്പെട്ടതു തിരുവനന്തപുരം രാജ്യാന്തരവിമാനത്താവളത്തിനു ലഭിച്ച അംഗീകാരമാണെന്ന് എയര്പോര്ട്ട് ഡയറക്ടര് ജോര്ജ് ജി.തരകന് പറഞ്ഞു. പരീക്ഷണപ്പറക്കലിന് ആവശ്യമായ സാങ്കേതികസഹായങ്ങളെല്ലാം ലഭ്യമാക്കിയിട്ടുണ്ടെന്നും അദ്ദേഹം പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
