യുവതിക്ക് നേരെ ലൈംഗികാതിക്രമം നടത്തിയെന്ന പരാതിയില്‍ കെപിസിസി അംഗവും താമരശ്ശേരി പഞ്ചായത്ത് മുന്‍ പ്രസിഡന്റുമായ എ.അരവിന്ദനെതിരെ താമരശ്ശേരി പൊലീസ് കേസെടുത്തു. താമരശ്ശേരിയില്‍ പഞ്ചായത്തിന്റെ ഉടമസ്ഥതയിലുള്ള സ്ഥാപനത്തിന്റെ പ്രവര്‍ത്തന കാലാവധി നീട്ടി നല്‍കുന്നതുമായി ബന്ധപ്പെട്ട് സംസാരിക്കാന്‍ വീട്ടിലേക്ക് വിളിച്ച് വരുത്തി അപമര്യാദയായി പെരുമാറിയെന്നാണ് യുവതി താമരശ്ശേരി പൊലീസിന് നല്‍കിയ പരാതിയില്‍ പറയുന്നത്.

ഞായറാഴ്ച ഉച്ചയ്ക്കാണ് പരാതിക്ക് ആധാരമായ സംഭവം നടന്നതായി പറയുന്നത്. അരവിന്ദന്‍ പഞ്ചായത്ത് പ്രസിഡന്റ് ആയിരുന്ന കാലയളവില്‍ അനുമതി നല്‍കി പ്രവര്‍ത്തനം തുടങ്ങിയ സ്ഥാപനത്തിന്റെ കാലാവധി അടുത്ത മാസം 14 ന് അവസാനിക്കാനിരിക്കുകയാണ്. ഇതിന്റെ കാലാവധി നീട്ടിക്കിട്ടാനായി പഞ്ചായത്തില്‍ ശുപാര്‍ശ ചെയ്യണമെന്ന് യുവതി അരവിന്ദനോട് ഫോണില്‍ ആവശ്യപ്പെട്ടിരുന്നു. ഇക്കാര്യം സംസാരിക്കാന്‍ എത്തിയപ്പോഴാണ് ലൈംഗികാതിക്രമം നടത്തിയതെന്നാണ് യുവതി പൊലീസിനു നല്‍കിയ പരാതിയില്‍ പറയുന്നത്.

അതേസമയം, സ്ഥാപനത്തിന്റെ കാലാവധി നീട്ടുന്നത് സംബന്ധിച്ച കാര്യം സംസാരിക്കുന്നതിനായി വീട്ടിലേക്ക് വന്നതാണെന്നും അക്കാര്യം താന്‍ വിചാരിച്ചാല്‍ നടക്കില്ലെന്നും പഞ്ചായത്ത് ഭരണ സമിതിയാണ് ഇത് സംബന്ധിച്ച് തീരുമാനം എടുക്കേണ്ടതെന്നും യുവതിയോട് പറയുകയാണ് ചെയ്തതെന്ന് എ.അരവിന്ദന്‍ പ്രതികരിച്ചു. കൊടുവള്ളി ബ്ലോക്ക് പഞ്ചായത്ത് വൈസ് പ്രസിഡന്റായും പല തവണ താമരശ്ശേരി ഗ്രാമപഞ്ചായത്ത് പ്രസിഡന്റായും പ്രവര്‍ത്തിച്ചിട്ടുള്ളയാളാണ് എ.അരവിന്ദന്‍.