സംസ്ഥാനത്ത് കനത്ത മഴ തുടരും. ഇന്നും അതിശക്തമായ മഴയ്ക്ക് സാധ്യതയെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. 12 ജില്ലകളില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഇന്ന് ഓറഞ്ച് അലര്‍ട്ട് പ്രഖ്യാപിച്ചിട്ടുള്ളത്.

ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. ഇടിമിന്നലോട് കൂടിയ മഴയാണ് പ്രതീക്ഷിക്കുന്നത്. മലയോരമേഖലകളിലും തീരപ്രദേശങ്ങളിലും ജാഗ്രത തുടരണം.

അതേസമയം സംസ്ഥാനത്തെ മഴക്കെടുതിയിൽ എട്ട് പേർ മരിച്ചു. പത്തനംതിട്ട, ഇടുക്കി, കോഴിക്കോട് ജില്ലകളുടെ മലയോര മേഖലയിൽ രാത്രി പെയ്ത മഴയിൽ വ്യാപക നാശനഷ്ടമുണ്ടായി. കോട്ടയത്തും ഇടുക്കിയിലുമായി മണ്ണിടിച്ചിലിൽ നാല് പേർ മരിച്ചു. വടക്കൻ ജില്ലകളിൽ ഇന്നലെ പുലര്‍ച്ചെ തുടങ്ങിയ കനത്ത മഴ കാര്യമായ ശമനമില്ലാതെ തുടരുകയായിരുന്നു. ഉച്ചയോടെ ചിലയിടങ്ങളില്‍ മഴയുടെ തീവ്രത അല്‍പം കുറഞ്ഞിരുന്നെങ്കിലും വൈകുന്നേരത്തോടെ വീണ്ടും ശക്തി പ്രാപിച്ചു. മലപ്പുറത്തും വയനാട്ടിലുമായി മൂന്ന് പേര്‍ക്കാണ് മഴക്കെടുതിയില്‍ ജീവന്‍ നഷ്ടമായത്. കൊണ്ടോട്ടിയിലും വണ്ടൂരിലുമായാണ് രണ്ട് കുട്ടികളാണ് ഒഴുക്കില്‍ പെട്ട് മരിച്ചത്.